(ສພຂ) ໃນລະຫວ່າງວັນທີ 16-17 ກຸມພາທີ່ຜ່ານມາ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ14 ແລະ ສະມາ ຊິກສະພາປະຊາຊົນແຂວງສາລະວັນ ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II. ຢູ່ທີ່ເມືອງຕະໂອ້ຍ, ຄົງເຊໂດນ, ເມືອງສາລະວັນ. ແບ່ງອອກເປັນ 3 ທິມງານໃນການເຄື່ອນໄຫວ ຄື: ທິມງານທີ 1 ເມືອງຕະໂອ້ຍ ມີ 2ຈຸດຄືເທດສະບານ ຈຸດບ້ານຮູກະໂຢ ນໍາໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ຄສຊ ເຂດ 14 ທັງແມ່ນປະທານສພຂ, ທ່ານ ປະເດີມພອນ ສົນທະນີ ສສຊ ເຂດ 14, ທ່ານ ນາງ ພອນເພັດ ອຸ່ນແກ້ວ ສສຊ ເຂດ 14 ທ່ານ ບຸນຍັງ ສິງຄຳດີ ຫົວໜ້າຄະນະ ສສຂ ປະຈຳເມືອງ, ທ່ານ ນາງ ບຸດສະດີ ແນະວິລະກອນ ຮອງຫົວໜ້າຄະນະສສຂ ປະຈຳເມືອງ, ທ່ານ ນາງ ບຸນໂຮມ ໂງ່ນກະເສີມສຸກ ແລະ ທ່ານ ເລີດສະໄໝ ວິໄລສຸກ ສສຂ ປະຈຳເມືອງ; ທິມງານທີ 2 ເມືອງຄົງເຊໂດນມີ 4 ຈຸດຄືບ້ານສະໂອ, ບ້ານນາໂຄກ, ບ້ານນາໂນງ, ບ້ານນາມ່ວງ ນໍາໂດຍ ທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ ສສຊ ເຂດ 14, ທ່ານ ນາງ ທອງໃບ ໄຊຍະສານ ສສຊ ເຂດ 14,ທ່ານ ວັນນະລອນ ອິນທະພອນເດດ ຫົວໜ້າຄະນະ ສສຂ ປະຈຳເມືອງ; ທ່ານ ພັອ ແພງສີ ໄຊຍະເພັດ ແລະ ທ່ານ ນາງ ເທວາ ສີລາດວງໃຈ ສສຂເມືອງຄົງເຊໂດນ;ທິມງານທີ 3 ເມືອງສາລະວັນ 2 ຈຸດ ຄືຈຸດບ້ານໜອງບົວ, ບ້ານບຶງຂາມ ນຳໂດຍ ທ່ານ ນາງ ສູນໄຖ ໄຊຍະແສງຮອງປະທານ ສພຂ, ສສຂ ເມືອງສາລະວັນ, ທ່ານ ນາງ ພອນເພັດ ອຸ່ນແກ້ວ ສສຊ ເຂດ 14, ທ່ານ ສຸກສະຫວັນ ຈັນທິສຸກ ສສຊເຂດ 14, ທ່ານ ນາງ ບຸນຖັນ ແກ້ວມາລາ ສສຂ ປະຈຳເມືອງ; ໃຫ້ກຽດເຂົ້າຮ່ວມການເຄື່ອນໄຫວມີຄະນະພັກ-ອຳນາດການປົກຄອງເມືອງ, ພະນັກງານຊ່ວຍວຽກຕິດຕາມເຄື່ອນໄຫວ; ເຂົ້າຮ່ວມຮັບຟັງມີຄະນະປະຈຳພັກເມືອງ, ກຳມະການພັກເມືອງ, ພະນັກງານ-ລັດຖະກອນ, ຄູອາຈານ, ຕໍາຫຼວດ, ເລຂາໜ່ວຍພັກນາຍບ້ານ, ພໍ່ແມ່ປະຊາຊົນຜູ້ມີສິດເລືອກຕັ້ງຮັບຟັງທັງໝົດ 722 ຄົນ, ຍິງ 329 ຄົນ.
ການພົບປະຄັ້ງນີ້ ຄະນະກໍໄດ້ຮັບຟັງການລາຍງານ ກ່ຽວກັບສະພາບການພັດທະນາເສດຖະກິດ-ສັງຄົມ ໃນໄລຍະຜ່ານມາໂດຍຫຍໍ້ຈາກເມືອງ ແລະ ບ້ານ; ຈາກນັ້ນ ສສຊ, ສສຂກໍ່ຜັດປ່ຽນກັນເຜີຍແຜ່ມະຕິກອງປະຊຸມສະໄໝສາມັນ ເທື່ອທີ 02 ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II, ຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີ່ຂອງ ສພຊ ແລະ ສພຂ, ເນື້ອໃນຂອງ 2 ວາລະແຫ່ງຊາດ ທີ່ລັດຖະບານ ແລະ ອົງການປົກຄອງແຂວງ ຈະໄດ້ສຸມໃສໃນການຈັດຕັ້ງປະຕິບັດ. ຈາກນັ້ນກໍໄດ້ຮັບຟັງປະຊາຊົນສະເໜີຄວາມຂັດຂ້ອງໝອງໃຈຕ່າງໆ ສ່ວນຫຼາຍແມ່ນບັນຫາທີ່ມີຜົນກະທົບຕໍ່ການດໍາລົງຊີວິດຄວາມຕ້ອງການພັດທະນາພື້ນຖານໂຄງລ່າງຂອງເຂົາເຈົ້າ ເປັນຕົ້ນ: ເສັ້ນທາງເຂົ້າບ້ານ, ການສ້າງສູນພັກເຊົາໃນເວລາເກີດໄພພິບັດ, ການສ້າງອ່າງເກັບນ້ຳ, ຮຽນຈົບວິຊາຊີບແລ້ວ ແຕ່ບໍ່ມີວຽກເຮັດ; ສ້າງຂົວຂ້າມຫ້ວຍ; ການບຸກເບີກເນື້ອທີ່ນາ ແລະ ບັນຫາອື່ນໆ; ຕາງໜ້າສສຊ, ສສຂ ໄດ້ອະທິບາຍ, ຊີ້ແຈງຕໍ່ຄໍາສະເໜີຂອງປະຊາຊົນ, ສ່ວນຄໍາສະເໜີໃດທີ່ມີຜົນກະທົບຕໍ່ການພັດທະ ນາເສດຖະກິດ-ສັງຄົມ ກໍຈະໄດ້ນໍາເອົາຄໍາສະເໜີນັ້ນໄປຊຸກຍູ້ ແລະ ປະສານສົມທົບກັບພາກສ່ວນກ່ຽວຂ້ອງ ເພື່ອຄົ້ນ ຄວ້າ ແລະ ມີການແກ້ໄຂ ເພື່ອຕອບສະໜອງຄວາມຮຽກຮ້ອງຕ້ອງການອັນຈໍາເປັນໃຫ້ແກ່ພໍ່ແມ່ປະຊາຊົນ.
ໂອກາດນີ້ ສສຊ, ສສຂ ໄດ້ນຳເຄື່ອງຊ່ວຍເຫຼືອໃຫ້ເມືອງຕະໂອ້ຍມີ: ເຄື່ອງນຸ່ງຫົ່ມ, ເກີບ, ໂທລະໂຄ່ງ ແລະ ເມືອງຄົງເຊໂດນມີ: ເຄື່ອງນຸ່ງຫົ່ມ, ເກີບ ລວມມູນຄ່າທັງໝົດ 33.840.000 ລ້ານກີບ. (ນາງ ຄັດສອນ ຮຸ່ງສະຫວ່າງ)