ໃນລະຫວ່າງວັນທີ 09 ຫາ 10 ມັງກອນ 2025 ນີ້, ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ຮອງປະທານຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ພ້ອມຄະນະ ໄດ້ເຄື່ອນໄຫວພົບປະເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 08 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງອາດສະພອນ ໂດຍການຕ້ອນຮັບ ແລະ ຮ່ວມເຄື່ອນໄຫວ ຂອງທ່ານ ບຸນລັດ ລໍບານເຢັນ ວ່າການເລຂາພັກເມືອງ-ວ່າການເຈົ້າເມືອງອາດສະພອນ ທັງເປັນປະທານຄະນະສະມາຊິກສະພາປະຊາຊົນແຂວງ ປະຈຳເລືອກຕັ້ງເມືອງອາດສະພອນ ແລະ ທ່ານ ນາງ ອິນປອນ ພອນວິໄລ ກຳມະການພັກເມືອງປະທານສະພັນແມ່ຍິງເມືອງ ຮອງປະທານຄະນະສະມາຊິກສະພາປະຊາຊົນແຂວງ ປະຈຳເລືອກຕັ້ງເມືອງອາດສະພອນ ມີບັນດາທ່ານກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ກໍາລັງປກສ-ປກຊ , ພະນັກງານ-ລັດຖະກອນ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນພາຍໃນເມືອງອາດສະພອນ ຊຶ່ງມີຜູ້ເຂົ້າຮ່ວມທັງໝົດ 468 ທ່ານ, ຍິງ 155 ທ່ານ.
ການລົງເຄື່ອນໄຫວພົບປະເຜີຍແຜ່ຂອງບັນດາທ່ານ ສສຊ ແລະ ສສຂໃນຄັ້ງນີ້ແມ່ນໄດ້ລົງຢູ່ 03 ຈຸດຄື: ຈຸດສຸມນາເລົ່າ, ບ້ານນາມົນ ແລະ ບ້ານທາດດອກແກ້ວ ຊຶ່ງໃນແຕ່ລະຈຸດທີ່ລົງບັນດາທ່ານ ສສຊ ແລະ ສສຂ ກໍ່ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານການຊີ້ນໍາ-ນຳພາວຽກງານຂອງອຳນາດການປົກຄອງທັງ 03 ຈຸດ, ຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນ ເທື່ອທີ 08 ຂອງສະພາແຫ່ງຊາດ ຊຸດທີ IX ແລະສະພາປະຊາຊົນແຂວງຊຸດທີ II ໃຫ້ປະຊາຊົນຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈ, ທັງເປັນການລົງພົບປະຜູ້ມີສິດເລືອກຕັ້ງ ເພື່ອເປັນການເກັບກຳຄຳຄິດ-ຄຳເຫັນ ຕໍ່ວຽກງານການຄຸ້ມຄອງບໍລິຫານລັດຕື່ມອີກ. ພາຍຫຼັງທີ່ບັນດາທ່ານ ສສຊ, ສສຂ ໄດ້ເຜີຍແຜ່ຜົນສຳເລັດດັ່ງກ່າວແລ້ວ ຍັງໄດ້ເປີດໂອກາດໃຫ້ການນໍາຂອງເມືອງ,ການຈັດຕັ້ງຂັ້ນບ້ານ ກໍ່ຄືປະຊາຊົນພາຍໃນແຕ່ລະກຸ່ມບ້ານໄດ້ຊັກຖາມ ແລະ ມີຄຳສະເໜີ18 ຄຳສະເໜີ ໂດຍສະເພາະແມ່ນບັນຫາການພັດທະນາພື້ນຖານໂຄງລ່າງ ການສ້ອມແປງທາງເລກທີ 10 ບ່ອນທີ່ສ້ອມແປງບໍ່ທັນສໍາເລັດປະຈຸບັນພົບຄວາມຫຍຸ້ງຍາກໃນການສັນຈອນ; ການຍົກລະດັບເສັ້ນທາງຂອງບ້ານດົງນາງາມຫາບ້ານບ້ານນາມົນ ( ໄລຍະທາງ 3 ກິລາແມັດ) ແລະ ແຕ່ບ້ານນາມົນຫາບ້ານກຸດນ້ຳແລ້ງ ( ໄລຍະທາງ 3 ກິໂລແມັດ ) ການສ້າງຂົວຂ້າມຫ້ວຍກູ້ ທາງໄປຝາຍຊົນລະປະທານເຊຈຳພອນ ພ້ອມທັງການຊຸກຍູ້ສົ່ງເສີມວຽກງານກະສິກຳ. ທັງນີ້ກໍເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນ, ຈາກນັ້ນ ບັນດາທ່ານ ສສຊ ແລະ ສສຂ ຍັງໄດ້ຕອບບັນຫາການຊັກຖາມຂອງ ພໍ່ແມ່ປະຊາຊົນເພື່ອໃຫ້ຮັບຮູ້ ແລະ ເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມຕໍ່ກັບການພັດທະນາ ຂອງປະເທດເຮົາໃນໄລຍະປະຈຸບັນ ພ້ອມທັງຮັບເອົາຄໍາສະເໜີຂອງອຳນາດການປົກຄອງບ້ານ ແລະ ພໍ່ແມ່ປະຊາຊົນໄປນຳສະເໜີ ຕໍ່ຂະແໜງການກ່ຽວຂ້ອງ,ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ ນອກຈາກນີ້ ສສຊ ແລະ ສສຂ ຍັງໄດ້ມີຄໍາເຫັນຫຼາຍດ້ານຕໍ່ກັບການການພັດທະນາພື້ນຖານໂຄງລ່າງ,ການພັດທະນາທາງດ້ານເສດຖະກິດ,ການແກ້ໄຂທາງດ້ານບັນຫາຢາເສບຕິດ ພ້ອມທັງຮຽກຮ້ອງໃຫ້ທຸກພາກສ່ວນເປັນເຈົ້າການໃນການຈັດຕັ້ງປະຕິບັດຕໍ່ວຽກງານດັ່ງກ່າວ ໃຫ້ປະສົບຜົນສຳເລັດຕາມລະດັບຄາດໝາຍທີ່ວາງໄວ້.
ໂອກາດດັ່ງກ່າວ ສສຊ ແລະ ສສຂ ຍັງໄດ້ລົງຢຽມຊົມຊົນລະປະທານ ຝາຍນ້ຳລົ້ນເຊຈຳພອນ (ແກ້ງນາມົນ) ບ້ານນາມົນ ເມືອງອາດສະພອນ ຊຶ່ງຊົນລະປະທານແຫ່ງນີ້ ແມ່ນໄດ້ນຳໃຊ້ເຂົ້າໃນການຜະລິດໃນວຽກງານກະສິກຳຂອງພໍ່ແມ່ປະຊາຊົນໃນເຂດດັ່ງກ່າວ ແລະ ເຂດໃກ້ຄຽງອີກດ້ວຍ.