ໃນລະຫວ່າງວັນທີ 13 ຫາ 17 ມີນາ 2023 ທີຜ່ານມານີ້ ນໍາໂດຍ ທ່ານ ສຈ.ປອ ຈະເລີນ ເຍຍປາວເຮີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ ພ້ອມດ້ວຍຄະນະສະມາຊິກສະພາປະຊາຊົນແຂວງປະຈໍາ ເມືອງໂພນໂຮງ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າຢູ່ ເມືອງໂພນໂຮງ, ແຂວງວຽງຈັນ; ການລົງເຄື່ອນໄຫວໃນຄັ້ງນີ້ ແມ່ນໄດ້ລົງເຄື່ອນໄຫວຢູ່ 10 ຈຸດ ເລີ່ມຈາກ ບ້ານ ໂພນໂຮງ, ຫ້ອງວ່າການເມືອງ,ບ້ານ ໂພນຄໍາໃຕ້, ສະໂມສອນໃຫ່ຍວິທະຍາຄານກົມມະດໍາ, ບ້ານ ນາຊູ, ບ້ານ ດົງຂາວ, ບ້ານ ຫ້ວຍທົນ, ບ້ານ ໂນນສະຫວ່າງ, ບ້ານ ຂາມ ແລະ  ຢ້ຽມຢາມໂຮງງານຫົວອາຫານດາວໄຟ.

ບັນດາເນື້ອໃນເອກະສານທີ່ນໍາໄປເຜີຍແຜ່ ປະກອບມີມະຕິສໍາຄັນຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໂດຍຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີຂອງ ສສຊ ແລະ ສສຂ ໃຫ້ສະມາຊິກພັກ, ພະນັກງານ-ລັດຖະກອນ ແລະ ພໍ່ແມ່ປະຊາຊົນໄດ້ຮັບຮູ້, ເຊື່ອມຊຶມເນື້ອໃນກອງປະຊຸມ ແລະ ແນວທາງນະໂຍບາຍຂອງພັກ-ລັດ; ຈາກນັ້ນ, ຍັງໄດ້ຮັບຟັງຄໍາຄິດຄໍາເຫັນ, ຄໍາສະເໜີຄວາມຂັດຂ້ອງໝອງໃຈ,ຄວາມຫຍຸ້ງຍາກລໍາບາກໃນການດໍາລົງຊິວິດຂອງພໍ່ແມ່ປະຊາຊົນ ເຊິ່ງກໍ່ໄດ້ມີຫຼາຍບັນຫາທີ່ສະເໜີຕໍ່ ສສຊ ແລະ ສສຂ ພ້ອມທັງໄດ້ຊີ້ແຈງອະທິບາຍ ແລະ ໃຫ້ຄວາມກະຈ່າງແຈ້ງ ຕໍ່ພໍ່ແມ່ປະຊາຊົນໄດ້ຮັບຊາບ ແລະ ນໍາເອົາທຸກຄໍາສະເໜີຂອງປະຊາຊົນໄປສົມທົບກັບຂະແໜງການ, ເມືອງ, ແຂວງ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາແກ້ໄຂຕາມຂັ້ນຕອນແລະ ລະບຽບການວາງອອກ. ພ້ອມດຽວກັນນັ້ນ ສສຊ ແລະ ສສຂ ໄດ້ຖືໂອກາດມອບ ໂນດບຸກ, ອຸປະກອນຮັບໃຊ້ຫ້ອງການໃຫ້ແກ່ບ້ານ, ເມືອງ ແລະ ເຄື່ອງກິລາຈໍານວນໜຶ່ງ ໃຫ້ແກ່ວິທະຍາຄານກົມມະດໍາ.