ໃນລະຫວ່າງວັນທີ 6-10 ມີນາ 2023 ທີ່ຜ່ານມານີ້ ທ່ານ ຂັນເພັດ ບຸນຕໍ່າ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ ພ້ອມດ້ວຍຄະນະສະມາຊິກສະພາປະຊາຊົນແຂວງປະຈໍາເມືອງກາສີໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອໂຄສະນາເຜີຍແຜ່​ເນື້ອ​ໃນຜົນສໍາເລັດກອງ​ປະຊຸມສະ​ໄໝສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ IXແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ IIໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າຢູ່ເມືອງກາສີ, ແຂວງວຽງຈັນ; ການລົງເຄື່ອນໄຫວໃນຄັ້ງນີ້ ແມ່ນໄດ້ລົງເຄື່ອນໄຫວຢູ່ 5 ຈຸດ ເລີ່ມຈາກ ບ້ານຜາຕໍ່, ບ້ານຜາຫຼັກ,ບ້ານນາລັນ, ບ້ານນໍ້າພົດ ແລະ ສະໂມສອນປົກຄອງເມືອງກາສີ.

ບັນດາເນື້ອໃນເອກະສານທີ່ນໍາໄປເຜີຍແຜ່ ປະກອບມີມະຕິສໍາຄັນຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IXແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II ໂດຍຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີຂອງ ສສຊ ແລະ ສສຂ ໃຫ້ສະມາຊິກພັກ, ພະນັກງານ-ລັດຖະກອນ ແລະ ພໍ່ແມ່ປະຊາຊົນໄດ້ຮັບຮູ້, ເຊື່ອມຊຶມເນື້ອໃນກອງປະຊຸມ ແລະ ແນວທາງນະໂຍບາຍຂອງພັກ-ລັດ; ຈາກນັ້ນ, ຍັງໄດ້ຮັບຟັງຄໍາຄິດຄໍາເຫັນ, ຄໍາສະເໜີຄວາມຂັດຂ້ອງໝອງໃຈ,ຄວາມຫຍຸ້ງຍາກລໍາບາກໃນການດໍາລົງຊິວິດຂອງພໍ່ແມ່ປະຊາຊົນ ເຊິ່ງກໍ່ໄດ້ມີຫຼາຍບັນຫາທີ່ສະເໜີຕໍ່ ສສຊ ແລະ ສສຂ ພ້ອມທັງໄດ້ຊີ້ແຈງອະທິບາຍແລະ ໃຫ້ຄວາມກະຈ່າງແຈ້ງ ຕໍ່ພໍ່ແມ່ປະຊາຊົນໄດ້ຮັບຊາບແລະ ນໍາເອົາທຸກຄໍາສະເໜີຂອງປະຊາຊົນໄປສົມທົບກັບຂະແໜງການ, ເມືອງ, ແຂວງ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາແກ້ໄຂຕາມຂັ້ນຕອນແລະ ລະບຽບການວາງອອກ. ພ້ອມດຽວກັນນັ້ນ ສສຊ ແລະ ສສຂ ໄດ້ຖືໂອກາດມອບເຄື່ອງນຸ່ງຫົ່ມຈໍານວນໜຶ່ງ ໃຫ້ແກ່ຄອບຄົວທີ່ຂາດເຂີນຢູ່ບ້ານຜາຕໍ່.

( ຂ່າວໂດຍ:  ຄໍາພັນ ໄຊຍະປະທຸມ)