(ສພຂ)ເພື່ອປະຕິບັດຕາມພາລະບົດບາດ, ສິດ ແລະ ນາທີ່ ຂອງ ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໃນນາມທີ່ເປັນຕົວແທນຂອງປະຊາຊົນບັນດາເຜົ່າ, ລະຫວ່າງ ວັນທີ 11-13 ກັນຍາ 2023, ທ່ານ ພັທ ສອນວິໄລ ຕຸລາທອງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 4 ແຂວງອຸດົມໄຊ ແລະ ທ່ານ ໄລພອນ ລິດຕະວົງ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຮຸນ, ແຂວງອຸດົມໄຊ ໄດ້ລົງພົບປະພົນລະເມືອງຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດ ຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ເມືອງຮຸນ ໄດ້ 6 ຈຸດຄື: ບ້ານວັງລໍາ, ກອງພັນ407, ບ້ານໂພນສະຫວາດ, ບ້ານໜອງບົວແດງ, ບ້ານມົກໄປຼ ແລະ ຫ້ອງວ່າການເມືອງຮຸນ ມີຜູ້ເຂົ້າຮ່ວມຮັບທັງໝົດ 601 ຄົນ, ຍິງ 178 ຄົນ.
ຈຸດປະສົງໃນການລົງເຄື່ອນໄຫວຄັ້ງນີ້, ເພື່ອຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຈິດໃຈຜົນສໍາເລັດ ຂອງກອງສອງປະຊຸມ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ. ໂອກາດດັ່ງກ່າວ ຍັງໄດ້ຮັບຟັງການລາຍງານສະພາບລວມໂດຍຫຍໍ້ຂອງອົງປົກຄອງບ້ານແຕ່ລະບ້ານ ພ້ອມນີ້, ຍັງໄດ້ຮັບຟັງຄໍາຄິດຄໍາເຫັນ, ຄໍາສະເໜີຂອງປະຊາຊົນ, ບັນດາຄໍາສະເໜີດັ່ງກ່າວ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ອະທິບາຍ, ຊີ້ແຈງ ບາງບັນຫາກັບທີ່ ແລະ ໄດ້ສັງລວມ ເພື່ອຈະນໍາເອົາຂໍ້ສະເໜີໄປປຶກສາຫາລືກັນ ແລ້ວນໍາສົ່ງໃຫ້ພາກສ່ວນທີ່ກ່ຽວຂ້ອງ ແກ້ໄຂຕາມພາລະບົດບາດ ແລະ ທັນກັບເວລາ.
ການເຄື່ອນໄຫວໃນຄັ້ງນີ້, ທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຍັງໄດ້ມີຄິດຄິດຄໍາເຫັນໂອ້ລົມຕໍ່ພໍ່ແມ່ປະຊາຊົນ, ທ່ານ ສສຊ -ສສຂ ໄດ້ສະແດງຄວາມຊົມເຊີຍຕໍ່ອົງການປົກຄອງບ້ານ ແລະ ເມືອງ ທີ່ໄດ້ເອົາໃຈໃສ່ຕໍ່ໜ້າທີ່ຄວາມຮັບຊອບ, ປະກອບສ່ວນໃນການປົກປັກຮັກສາ, ພັດທະນາບ້ານ ກໍ່ຄື: ການຍົກລະດັບຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ ພ້ອມກັນ, ຍັງໄດ້ເນັ້ນໜັກ ໃຫ້ອົງການປົກຄອງບ້ານ, ພໍ່ແມ່ປະຊາຊົນ ເພີ່ມທະວີຄວາມສາມັກຄີລະຫວ່າງຄະນະບ້ານກັບປະຊາຊົນ, ເປັນເຈົ້າໃນການພັດທະນາບ້ານ ໂດຍສະເພາະແມ່ນການປູກການລ້ຽງເປັນສິນຄ້າ, ຮັບປະກັນຄວາມສະຫງົບສຸກ, ວຽກງານການສຶກ, ວຽກງານສອງວາລະແຫ່ງຊາດ, ວຽກງານສາທາລະນະສຸກ ເຝົ້າລະວັງການແຜ່ລະບາດຂອງພະຍາດຕາມລະດູການ ແລະ ວຽກງານອື່ນໆ.
ຂ່າວ: ສະພາປະຊາຊົນແຂວງ.