ເມື່ອບໍ່ດົນມານີ້, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແລະ ບັນດາທ່ານ ສະມາຊິກສະພາປະຊາຊົນແຂວງ (ສສຂ) ນໍາພາໂດຍ ທ່ານ ສົມຈິດ ຫັບລະກອນ ກໍາມະການປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ຮອງປະທານຄະນະປະຈໍາສະພາປະຊາຊົນແຂວງ ພ້ອມດ້ວຍບັນດາທ່ານ ສສຂ ມີ ທ່ານ ດຣ ບຸນສາລີ ຈິດດາພອນ ກໍາມະການພັກແຂວງ, ຫົວໜ້າພະແນກສາທາລະນະສຸກແຂວງ; ທ່ານ ພັທ ຄໍາດາ ໂສລະພົມ ປະທານຄະນະກໍາມະການຍຸຕິທໍາ ແລະ ປກຊ-ປກສ; ໄດ້ລົງຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ເທດສະບານ ເມືອງຜົ້ງສາລີ ມີ 2 ຈຸດ: (1) ຈຸດພະແນກການ ຢູ່ສະໂມສອນເມືອງຜົ້ງສາລີ ປະກອບມີບັນດາທ່ານຄະນະນໍາ, ພະນັກງານ-ລັດຖະກອນ ຂອງພະແນກ ແລະ (2) ຈຸດກອງບັນຊາການທະຫານແຂວງ ທີ່ສະໂມສອນກອງບັນຊາການທະຫານແຂວງ ມີບັນດາທ່ານຄະນະນໍາ, ນາຍ ແລະ ພົນທະຫານ ກອງບັນຊາການທະຫານແຂວງ, ໂຮງໝໍ ກອງບັນຊາການທະຫານແຂວງ ແລະ ກອງຮ້ອຍ 23 ເຂົ້າຮ່ວມຢ່າງຕັ້ງໜ້າ.
ການລົງເຄື່ອນໄຫວໃນຄັ້ງນີ້, ແມ່ນເພື່ອນໍາເອົາເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ໃນນີ້, ວຽກງານສະພາແຫ່ງຊາດ ມີ 20 ສະບັບ, ມີກົດໝາຍສ້າງໃໝ່ 2 ສະບັບ ຄື: ກົດໝາຍວ່າດ້ວຍສະຫະກອນ; ກົດໝາຍວ່າດ້ວຍຊັບພະຍາກອນທີ່ເປັນຢາ. ກົດໝາຍປັບປຸງ 11 ສະບັບ ຄື: ກົດໝາຍວ່າດ້ວຍການຕ້ານການສໍ້ລາດບັງຫຼວງ; ກົດໝາຍວ່າດ້ວຍການປົກປັກຮັກສາສິ່ງແວດລ້ອມ; ກົດໝາຍວ່າດ້ວຍສະພາແຫ່ງຊາດ; ກົດໝາຍວ່າດ້ວຍສະພາປະຊາຊົນຂັ້ນແຂວງ; ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ; ກົດໝາຍວ່າດ້າຍການສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດ; ກົດໝາຍວ່າອາກອນມູນຄ່າເພີ່ມ; ກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ; ກົດໝາຍວ່າດ້ວຍການສົ່ງເສີມການລົງທຶນ; ກົດໝາຍວ່າດ້ວຍການທ່ອງທ່ຽວ; ກົດໝາຍວ່າດ້ວຍສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ. ວຽກງານສະພາປະຊາຊົນແຂວງ ມີ 4 ສະບັບ, ໄປຄຽງຄູ່ກັບການຈັດຕັ້ງຜັນຂະຫຍາຍເນື້ອໃນມະຕິ ກອງປະຊຸມຄົບຄະນະບໍລິຫານງານພັກແຂວງ ສະໄໝທີ 9 ແລະ ເອກະສານສຳຄັນຂອງພັກ ຕິດພັນກັບ 2 ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂບັນຫາຢາເສບຕິດ; 9 ຄາດໝາຍ ແລະ ຈຸດໝາຍສະເພາະໜ້າທີ່ລັດຖະບານຕ້ອງແກ້ໄຂບັນຫາ, ບົດຊີ້ແຈງຂອງລັດຖະມົນຕີ ໃນກອງປະຊຸມສະພາແຫ່ງຊາດ, ບາງວຽກງານກ່ຽວກັບ 4 ໜ້າທີ່ໃຫຍ່ 26 ແຜນງານ ຂອງກະຊວງປ້ອງກັນປະເທດ ເພື່ອໄປຈັດຕັ້ງຜັນຂະຫຍາຍໃຫ້ຜູ້ມີສິດເລືອກຕັ້ງ ກໍຄືພະນັກງານຫຼັກແຫຼ່ງ, ນາຍ ແລະ ພົນທະຫານ ຮັບຮູ້, ເຂົ້າໃຈ ໄດ້ຢ່າງກວ້າງຂວາງ ທັງເກັບກໍາບັນດາສະພາບການທີ່ມີຫ່າງສຽງໃນສັງຄົມ, ຄໍາຄິດເຫັນ ຫຼື ຄໍາສະເໜີຕ່າງໆ ເພື່ອນໍາມາຄົ້ນຄວ້າ ແລະ ສົ່ງໃຫ້ພາກສ່ວນກ່ຽວຂ້ອງ ແກ້ໄຂຕາມພາລະບົດບາດໄດ້ຢ່າງທັນການ.
ຜ່ານການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່, ກອງປະຊຸມໄດ້ຕີລາຄາສູງ ເພາະຜູ້ເຂົ້າຮ່ວມກອງປະຊຸມ ໄດ້ໃຫ້ຄວາມສໍາຄັນ ແລະ ມີຄວາມເອົາໃຈໃສ່ໃນການເຊື່ອມຊຶມ, ຮັບຟັງຕໍ່ການບັນຍາຍ ຂອງສະມາຊິກສະພາແຫ່ງຊາດ, ສສຂ, ເຮັດໃຫ້ຜູ້ແທນກອງປະຊຸມຮັບຮູ້, ເຂົ້າໃຈ ຕໍ່ເນື້ອໃນຜົນສໍາເລັດກອງປະຊຸມສະໄໝສາມັນຄັ້ງນີ້ ໄດ້ຢ່າງເລິກເຊິ່ງ ແລະ ເຫັນໄດ້ເຖິງສະພາບບັນຫາເສດຖະກິດຂອງຊາດ ກໍຄືໃນແຂວງຜົ້ງສາລີ ທີ່ພົບວິກິດການຕ່າງໆ ໃນປະຈຸບັນ ເປັນຕົ້ນ: ຄວາມຫຍຸ້ງຍາກທາງດ້ານເສດຖະກິດ-ການເງິນ, ໄພເງິນເຟີ້ ແລະ ອຶ່ນໆ; ກອງປະຊຸມໄດ້ໃຊ້ເວລາ 1 ວັນ ແລະ ສໍາເລັດຕາມຄາດໝາຍທີ່ວາງໄວ້.
ພາບ-ຂ່າວ: ພອນແກ້ວປະເສີດ ສຸລິວົງ)