ວັນທີ 19 – 23 ກຸມພາ 2024 ນີ້, ທ່ານ ນາງ ສວຍເພັດ ທອງສົມບັດ ກຳມະການພັກແຂວງ ປະທານສະຫະພັນແມ່ຍິງແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ແລະ ທ່ານ ເພັດໄຊ ວິໄລທອງ ຮອງເລຂາພັກເມືອງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງຊໍາໃຕ້ ລົງພົບປະ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 6 ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງ ຊໍາໃຕ້ ຈໍານວນ 4 ຈຸດ ຄື: ບ້ານນໍ້າໄຕ, ບ້ານ ພຽງຄູນ, ບ້ານພູແລ ແລະ ບ້ານໂພນໄຊ ເມືອງ ຊໍາໃຕ້ ແຂວງຫົວພັນ ມີຜູ້ເຂົ້າຮ່ວມຮັບຟັງທັງໝົດ 462 ຄົນ, ຍິງ 218 ຄົນ.
ການລົງພົບປະປະຊາຊົນຄັ້ງນີ້, ໄດ້ນໍາເອົາເນື້ອໃນຜົນສຳເລັດທີ່ ກອງປະຊຸມໄດ້ພິຈາລະນາຮັບຮອງເອົາ ເປັນຕົ້ນແມ່ນ ບັນດາ ມະຕິ ຂອງກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ, ສອງວາລະແຫ່ງຊາດກ່ຽວກັບການແກ້ໄຂຂໍ້ຄວາມຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ລວມທັງ ພາລະບົດບາດ, ສິດ ແລະ ໜ້າທີ່ ຂອງ ສສຊ ແລະ ສສຂ ໃນນາມເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າ ນໍາມາເຜີຍແຜ່ ໃຫ້ພໍ່ແມ່ປະຊາຊົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ.
ຈາກນັ້ນ, ທ່ານ ສສຊ ແລະ ສສຂ ກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມ ສະເໜີຂໍ້ຂັດຂ້ອງໝອງໃຈ ແລະ ບັນຫາຕ່າງໆ ທີ່ຕິດພັນກັບການດຳລົງຊີວິດ ຂອງພໍ່ແມ່ປະຊາຊົນບັນດາເຜົ່າ ທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ນຳໄປໄປຄົ້ນຄວ້າ, ພິຈາລະນາ ແລະ ປະສານສົບທົບນຳພາກສ່ວນທີ່ກ່ຽວຂ້ອງແກ້ໄຂ ເພື່ອຊອກຫາທາງອອກ ພ້ອມນີ້ ທ່ານ ສສຊ ແລະ ສສຂ ກໍໄດ້ມີຄຳເຫັນອະທິບາຍ, ຊີ້ແຈງ ກັບທີ່ ໃຫ້ພໍ່ແມ່ ປະຊາຊົນເຂົ້າໃຈເລິກເຊິ່ງຕື່ມອີກ. ນອກນີ້, ທ່ານ ສສຊ ແລະ ສສຂ ຍັງໄດ້ເນັ້ນໜັກບາງບັນຫາ ໂດຍສະເພາະແມ່ນການເພີ່ມທະວີ ການເຕົ້າໂຮມຄວາມສາມັກຄີເປັນເອກະພາບ, ເປັນເຈົ້າການໃນການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດທີ່ວາງອອກ, ສຸມໃສ່ພັດທະນາເສດຖະກິດ-ສັງຄົມ ໃຫ້ດີຂຶ້ນກ່ວາເກົ່າ ເອົາໃຈໃສ່ປັບປຸງອົງການຈັດຕັ້ງບ້ານໃຫ້ມີຄວາມເຂັ້ມແຂງ ເປັນເຈົ້າການຕ້ານສະກັດກັ້ນບັນຫາປະກົດການຫຍໍ້ທໍ້ຕ່າງໆໃນສັງຄົມ ເອົາໃຈໃສ່ຈັດຕັ້ງປະຕິບັດ 2 ວາລະແຫ່ງຊາດ ກ່ຽວກັບບັນຫາການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ, ສືບຕໍ່ສ້າງຄອບຄົວໃຫ້ມີຄວາມຜາສຸກ ດ້ວຍຄວາມເປັນເຈົ້າການພັດທະນາເສດຖະກິດຄອບຄົວ ເຊັ່ນ: ປູກຝັງ, ລ້ຽງສັດ, ຕໍ່າຫູກທໍໄໝ ຜະລິດເປັນສິນຄ້າສົ່ງອອກພາຍໃນ ແລະ ຕ່າງປະເທດ ເພື່ອເເກ້ໄຂຊີວິດການເປັນຢູ່ຂອງຄອບຄົວໃຫ້ນັບມື້ດີຂຶ້ນເປັນກ້າວໆ.
ໂອກາດດຽວກັນນີ້, ທ່ານຍັງໄດ້ ໂຄສະນາກ່ຽວກັບ ການສົ່ງເສີມບົດບາດຍິງ-ຊາຍ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ສິດທິແມ່ຍິງ ແລະ ເດັກນ້ອຍ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕື່ມອີກ.
ພາບ ແລະ ຂ່າວໂດຍ ນັກຂ່າວ ສພຂ ຫົວພັນ.