ວັນທີ 14 – 15 ກຸມພາ 2024 ນີ້, ທ່ານ ນາງ ອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ, ປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ປະທານ ສະພາປະຊາຊົນ ແຂວງຫົວພັນ ແລະ ທ່ານ ສຸກສົມພັນ ແກ້ວມີໄຊ ເລຂາພັກເມືອງ ເຈົ້າເມືອງໆກວັນ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງກວັນ ລົງພົບປະ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 6 ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງກວັນ 2 ຈຸດ ຄື: ບ້ານນາທອງ ແລະ ບ້ານເມືອງນາ ເມືອງ ກວັນ ແຂວງຫົວພັນ ມີຜູ້ເຂົ້າຮ່ວມຮັບຟັງທັງໝົດ 137 ຄົນ, ຍິງ 65 ຄົນ.

ການລົງເຄື່ອນໄຫວ ເຜີຍແຜ່ຜົນສໍາເລັດຄັ້ງນີ້ ໄດ້ນໍາເອົາເນື້ອໃນຜົນສຳເລັດທີ່ ກອງປະຊຸມໄດ້ພິຈາລະນາຮັບຮອງເອົາ ເປັນຕົ້ນແມ່ນ ບັນດາ ມະຕິ ຂອງກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ແຂວງຫົວພັນ ຊຸດທີ II ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ, ສອງວາລະແຫ່ງຊາດກ່ຽວກັບການແກ້ໄຂຂໍ້ຄວາມຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ນໍາມາເຜີຍແຜ່ ໃຫ້ພໍ່ແມ່ປະຊາຊົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ເນື້ອໃນຜົນສຳເລັດຂອງສອງກອງປະຊຸມດັ່ງກ່າວ..

ຈາກນັ້ນ, ທ່ານ ສສຊ ແລະ ສສຂ ກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມ ສະເໜີຂໍ້ຂັດຂ້ອງໝອງໃຈ ແລະ ບັນຫາຕ່າງໆ ທີ່ຕິດພັນກັບການດຳລົງຊີວິດ ຂອງພໍ່ແມ່ປະຊາຊົນ ທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ນຳໄປໄປຄົ້ນຄວ້າ, ພິຈາລະນາ ແລະ ປະສານສົບທົບນຳພາກສ່ວນທີ່ກ່ຽວຂ້ອງແກ້ໄຂ ເພື່ອຊອກຫາທາງອອກ ພ້ອມນີ້ ທ່ານ ສສຊ ແລະ ສສຂ ກໍໄດ້ມີຄຳເຫັນອະທິບາຍ, ຊີ້ແຈງ ກັບທີ່ ໃຫ້ພໍ່ແມ່ ປະຊາຊົນເຂົ້າໃຈເລິກເຊິ່ງຕື່ມອີກ. ໂອກາດດຽວກັນນີ້ ທ່ານ ສສຊ ແລະ ສສຂ ຍັງໄດ້ເນັ້ນໜັກບາງບັນຫາ ໂດຍສະເພາະແມ່ນການເພີ່ມທະວີ ການເຕົ້າໂຮມຄວາມສາມັກຄີເປັນເອກະພາບ, ເປັນເຈົ້າການໃນການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດທີ່ວາງອອກ, ຈົ່ງພ້ອມກັນຕ້ານ 3 ກະແສແນວຄິດຄື: ແນວຄິດຄອງເດີມ, ແນວຄິດຄັບແຄບ ແລະ ແນວຄິດເອື້ອອິງ, ສຸມໃສ່ພັດທະນາພັດທະນາເສດຖະກິດ-ສັງຄົມ ໃຫ້ດີຂຶ້ນກ່ວາເກົ່າ ເອົາໃຈໃສ່ປັບປຸງອົງການຈັດຕັ້ງບ້ານໃຫ້ມີຄວາມເຂັ້ມແຂງ ພ້ອມທັງກໍ່ສ້າງພັກ ໃຫ້ປອດໃສ ເຂັ້ມແຂງ ໜັກແໜ້ນ, ເປັນເຈົ້າການຕ້ານສະກັດກັ້ນບັນຫາປະກົດການຫຍໍ້ທໍ້ຕ່າງໆໃນສັງຄົມ ເອົາໃຈໃສ່ຈັດຕັ້ງປະຕິບັດ 2 ວາລະແຫ່ງຊາດ ກ່ຽວກັບບັນຫາການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ, ສືບຕໍ່ສ້າງຄອບຄົວໃຫ້ມີຄວາມຜາສຸກ ດ້ວຍຄວາມເປັນເຈົ້າການພັດທະນາເສດຖະກິຄອບຄົວເຊັ່ນ: ປູກຝັງ, ລ້ຽງສັດ, ຕໍ່າຫູກທໍໄໝ ຜະລິດເປັນສິນຄ້າສົ່ງອອກພາຍໃນ ແລະ ຕ່າງປະເທດ ເພື່ອເເກ້ໄຂຊີວິດການເປັນຢູ່ຂອງຄອບຄົວໃຫ້ນັບມື້ດີຂຶ້ນ.

ພາບ ແລະ ຂ່າວໂດຍ ນັກຂ່າວ ສພຂ ຫົວພັນ.