ວັນທີ 14 – 17 ມີນາ 2022 ນີ້. ທ່ານ ນາງ ອໍາໄພວອນ ລ້ອມບຸນແພງ ກໍາມະການສໍາຮອງສູນກາງພັກ, ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ປະທານສະພາປະຊາຊົນແຂວງ ຫົວພັນ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ພ້ອມການນຳ ຂອງເມືອງ ຫົວເມືອງ ແລະ ວິຊາການ ລົງພົບປະຢ້ຽມຢາມ ແລະ ເຜີຍແຜຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ຢູ່ເມືອງຫົວເມືອງໄດ້ 5 ຈຸດ: ຈຸດເທດສະບານເມືອງ, ຈຸດບ້ານເມືອງບໍ, ບ້ານທາດຜາຕັ້ງ, ບ້ານທາດ ແລະ ບ້ານປ່າຄາໃຕ້ ມີພະນັກງານທະຫານ, ຕຳຫລວດ ຕະຫລອດຮອດພໍ່ແມ່ປະຊາຊົນບັນດາເຜົ່າເຂົ້າຮ່ວມທັງໝົດ 707 ຄົນ ຍິງ 286 ຄົນ.

ໃນການລົງເຜີຍແຜ່ຄັ້ງນີ້ ໄດ້ນໍາເອົາເນື້ອໃນທີ່ສຳຄັນຕົ້ນຕໍທີ່ ກອງປະຊຸມໄດ້ພິຈາລະນາຮັບຮອງໄປແລ້ວນັ້ນເປັນຕົ້ນແມ່ນ ແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ສອງວາລະແຫ່ງຊາດກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ນຳໄປເຜີຍແຜ່ ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ

               ໃນການລົງເຄື່ອນໄຫວຄັ້ງນີ້ໄດ້ຮັບຟັງການລາຍງານສະພາບໂດຍຫຍໍ້ ຂອງເມືອງ ແລະ ຂອງບ້ານ. ນອກນັ້ນກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມສະເໜີຂໍ້ຂັດຂ້ອງໝອງໃຈ ແລະ ບັນຫາຕ່າງໆທີ່ຕິດພັນກັບການດຳລົງຊີວິດທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາແຫ່ງຊາດ ໄປຄົ້ນຄວ້າ ແລະ ປະສານສົບທົບນຳຂະແໜງການທີ່ກ່ຽວຂ້ອງແກ້ໄຂ

ຈາກນັ້ນ ທ່ານ ສສຊ ແລະ ການນຳເມືອງ ກໍໄດ້ພັດປ່ຽນກັນ ອະທິບາຍພ້ອມທັງຊີ້ແຈງ ບາງຄຳສະເໜີ ຂອງພໍ່ແມ່ປະຊາຊົນ ແລະ ໄດ້ເນັ້ນໜັກໃຫ້ພໍ່ແມ່ປະຊາຊົນ ພ້ອມກັນສູ້ຊົນ ເອົາໃຈໃສ່ ຈັດຕັ້ງປະຕິບັດ ສອງວາລະແຫ່ງຊາດນັ້ນໃຫ້ປະກົດຜົນເປັນຈິງ ພ້ອມກັນຮັກສາມູນເຊື້ອຄວາມສາມັກຄີຊ່ວຍເຫຼືອເຊິ່ງກັນ, ອະນຸລັກຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າ, ມີຄວາມດຸໝັ່ນຂະຫຍັນພຽນໃນການທໍາການຜະລິດ ເປັນຕົ້ນດ້ານການປູກ-ການລ້ຽງ, ຕ່ຳຫູກທໍໄໝອັນເປັນມູນເຊື້ອ ໃຫ້ກາຍເປັນສິນຄ້າ ເພື່ອສ້າງເສດຖະກິດຄອບຄົວໃຫ້ດີຂຶ້ນ ພ້ອມກັນຕີຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນພາຍໃນບ້ານໃຫ້ນັບມື້ນັບຫຼຸດໜ້ອຍຖອຍລົງເທື່ອລະກ້າວ. ໃນໂອກາດການມາພົບປະຄັ້ງນີ້ທັງທີມງານຍັງນຳເອົາເຄື່ອງນຸ່ງຫົ່ມ, ອຸປະກອນ ການຮຽນ ແລະ ອຸປະກອນກິລາມອບໃຫ້ບ້ານ, ໂຮງຮຽນ ແລະ ຄອບຄົວທຸກຍາກຕື່ມອີກ.

ພາບແລະ ຂ່າວ: ນັກຂ່າວ ສພຂ