ວັນທີ 5 ມັງກອນ 2024 ນີ້ ທີ່ຫ້ອງປະຊຸມ ສະພາປະຊາຊົນ ແຂວງຫົວພັນ ໄດ້ເປີດກອງປະຊຸມປະຈຳປີ 2023 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 8 ແຂວງຫົວພັນຂຶ້ນ ໂດຍການເປັນປະທານ ຂອງທ່ານ ນ. ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 8 ແຂວງຫົວພັນ, ປະທານ ສະພາປະຊາຊົນແຂວງ; ເປັນກຽດເຂົ້າຮ່ວມ ຂອງທ່ານ ຄຳແພງ ໄຊສົມແພງ ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງຫົວພັນ; ມີຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ອາດີດສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ຄະນະປະຈຳສະພາປະຊາຊົນແຂວງ, ຄະນະປະຈຳພັກແຂວງ, ຫົວໜ້າ-ຮອງຫົວໜ້າພະແນກການ,ອົງການທຽບເທົ່າ, ແນວລາວສ້າງຊາດແຂວງ ແລະ ອົງການຈັດຕັ້ງມະຫາຊົນແຂວງເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ຮັບຟັງການລາຍງານການຈັດຕັ້ງປະຕິບັດວຽກງານການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປິ 2024 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ແລະ ຮັບຟັງການລາຍງານໂດຍຫຍໍ້ກ່ຽວກັບຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX. ຈາກນັ້ນ ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດຄຳເຫັນໃສ່ຮ່າງບົດລາຍງານ ຢ່າງມີຈຸດສຸມຕໍ່ກັບວຽກງານບາງດ້ານທີ່ຍັງບໍ່ສາມາດບັນລຸຕາມແຜນການທີ່ວາງໄວ້, ຕາມພາລະບົດບາດ, ສິດ ແລະ ໜ້າທີ່, ທີ່ໄດ້ກຳນົດໄວ້ໃນກົດໝາຍຍັງເຮັດບໍໄດ້ດີເທົ່າທີ່ຄວນເປັນຕົ້ນ ແມ່ນການຕິດຕາມກວດກາ, ຂອດການປະສານງານ ລະຫວ່າງຄະນະສະມາຊິກສະພາແຫ່ງຊາດ ກັບອົງການປົກຄອງແຂວງ ການລົງພົບປະຜູ້ມີສິດເລືອກຕັ້ງ ບໍ່ທັນທົ່ວເຖິງ ໂດຍສະເພາະແມ່ນເຂດຊົນນະບົດຫ່າງໄກສອກຫຼີກ ແລະ ຍັງມີຫຼາຍບ້ານ ບໍ່ໄປຮອດໄປເຖິງ ເນື່ອງຈາກວ່າ ມີຫຼາຍປັດໃຈ ພ້ອມດຽວກັນນີ້ ຜູ້ເຂົ້າຮ່ວມກອງປະຊຸມກໍໄດ້ພ້ອມກັນພິຈາລະນາ ແລະ ຮັບຮອງເອົາການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການປີ 2024 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ
ຕອນທ້າຍ, ທ່ານ ນ. ອຳໄພວອນ ລ້ອມບຸນແພງ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ່ສາມາດຈັດຕັ້ງປະຕິບັດຕາມພາລະບົດບາດຂອງຕົນເອງໃນໄລຍະຜ່ານມາເຫັນວ່າມີຫຼາຍດ້ານພົ້ນເດັ່ນ ແຕ່ກໍຍັງມີບາງດ້ານທີ່ບໍ່ສາມາດຈັດຕັ້ງປະຕິບັດໄດ້ດີເທົ່າທີ່ຄວນທ່ານຍັງໄດ້ຮຽກຮ້ອງໃຫ້ ສະມາຊິກສະພາແຫ່ງຊາດປະຈຳເຂດເລືອກຕັ້ງ ຈົ່ງພ້ອມກັນເອົາໃຈໃສ່ໃນການເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າໃນທົ່ວແຂວງໃຫ້ນັບມື້ນັບດີຂຶ້ນເປັນກ້າວໆ.
ພາບ ແລະ ຂ່າວ: ສພຂ ແຂວງ