ເພື່ອເປັນການໂຄສະນາ, ເຜີຍແຜ່ ໃຫ້ຜູ້ມີສິດເລືອກຕັ້ງ ກໍ່ຄືພະນັກງານ-ລັດຖະກອນ,ນາຍແລະພົນທະຫານ,ນາຍແລະພົນຕໍາຫລວດ,ປະຊາຊົນລາວບັນດາເຜົ່າ ຊາວແຂວງອັດຕະປືເຊື່ອມຊືມ ແລະ ເຂົ້າຮ່ວມໃນການປະຕິບັດ ແນວທາງນະໂຍບາຍ, ລັດຖະທໍາມະນູນ, ກົດໝາຍ, ມະຕິກອງປະຊຸມ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ແຜນພັດທະນາເສດຖະກິດ-ສັງຄົມແລະ ແຜນງົບປະມານແຫ່ງລັດ, ເຂົ້າຮ່ວມໃນການຄຸ້ມຄອງລັດ ຄຸ້ມຄອງເສດຖະກິດ-ສັງຄົມ, ໃຫ້ຮູ້ ແລະ ເຂົ້າໃຈພາລະບົດບາດ, ສິດ ແລະໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ເພື່ອເປັນການເກັບກຳ, ນຳເອົາຄວາມຄິດເຫັນ ແລະ ຄຳສະເໜີຂອງຜູ້ມີສິດເລືອກຕັ້ງ ໃນລະຫວ່າງວັນທີ 1-10 ມີນາ 2023 ນີ້. ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ17 (ສສຊ ເຂດ17) ແລະ ສະມາຊິກສະພາປະຊາຊົນແຂວງ (ສສຂ) ນໍາໂດຍ: ທ່ານ ນາງ ມີນາພອນ ໄຊສົມພູ ປະທານຄະນະ ສສຊ ເຂດ17, ປະທານ ສພຂ, ມີທ່ານ ມະນີໂສ ຊາມົນຕີ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະສິ່ງແວດລ້ອມ ສະພາແຫ່ງຊາດ ທັງເປັນ ສສຊ ເຂດ17 ພ້ອມດ້ວຍຄະນະ ສສຊເຂດ17 ແລະ ສສຂ ເຂດເລືອກຕັ້ງເມືອງສະໜາມໄຊ ແລະ ວີຊາການຕິດຕາມໄດ້ນໍາເອົາເນື້ອໃນຈິດໃຈຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ລົງເຜີຍແຜ່ເຊື່ອມຊຶມໃຫ້ຜູ້ມີສິດເລືອກຕັ້ງ, ຢູ່ຫ້ອງວ່າການປົກຄອງເມືອງສະໜາມໄຊ, ບ້ານໄຊດອນໂຂງ,ບ້ານຈັນຕໍ, ບ້ານໜອງຫີນ, ບ້ານພອນມະນີ,ບ້ານຄັນໝາກນາວ, ບ້ານນໍ້າກົງ ແລະ ບ້ານຫາດຊາດຄໍາ ເມືອງສະໜາມໄຊ ເຂົ້າຮ່ວມມີທ່ານ ສຸລິວົງ ອະໄພວົງ ກໍາມະການພັກແຂວງ ເລຂາພັກເມືອງ ເຈົ້າເມືອງສະໜາມໄຊ ມີບັນດາທ່ານ ສສຂ ເຂດເລືອກຕັ້ງເມືອງສະໜາມໄຊ, ຄະນະປະຈໍາພັກເມືອງ, ຫົວໜ້າ-ຮອງຫົວໜ້າຫ້ອງການ,ພະນັກງານ-ລັດຖະກອນ ແລະ ນາຍແລະພົນທະຫານ,ນາຍແລະພົນຕໍາຫລວດ,ອຳນາດການປົກຄອງບ້ານ ຕະຫລອດຮອດປະຊາຊົນ.
ໃນການເຄື່ອນໄຫວ ໄດ້ຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ພົ້ນເດັ່ນຂອງເມືອງ,ບ້ານໂດຍສັງເຂບ; ຈາກນັ້ນ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ໄດ້ຜັດປ່ຽນກັນເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໂດຍໄດ້ຍົກໃຫ້ເຫັນບາງເນື້ອໃນມະຕິກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ ເປັນຕົ້ນ:ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາ ບົດລາຍງານຂອງລັດຖະບານ ກ່ຽວກັບບົດສະຫລຸບຂາດຕົວການຈັດຕັ້ງປະຕິບັດງົບປະມານແຫ່ງລັດປີ 2021; ການຈັດຕັ້ງປະຕິບັດແຜນງົບປະມານປີ2022 ແລະ ທິດທາງການສ້າງແຜນງົບປະມານແຫ່ງລັດ ປີ 2023; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2022 ແລະ ແຜນການ ປະຈໍາປີ 2023; ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ແຜນການເຄື່ອນໄຫວວຽກງານປະຈໍາປີ 2023 ຂອງອົງການກວດສອບແຫ່ງລັດ; ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2021;ມະຕິວ່າດ້ວຍການຮັບຮອງເອົາບົດລາຍງານ ຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປີ 2023; ມະຕິວ່າດ້ວຍການຮັບຮອງເອົາການສະເໜີຂໍພັກການ-ຮັບອຸດໜູນບໍານານ ຂອງທ່ານ ນາຍົກລັດຖະມົນຕີ ແຫ່ງ ສປປລາວ; ມະຕິວ່າດ້ວຍການຮັບຮອງເອົາການເລືອກຕັ້ງ ນາຍົກລັດຖະມົນຕີ ແຫ່ງ ສປປລາວ ຜູ້ໃໝ່;ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາກົດໝາຍ ຈໍານວນ 12 ສະບັບ; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປະຈໍາປີ 2022 ແລະ ແຜນການປະຈໍາປີ 2023 ຂອງແຂວງ.ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022 ແລະ ແຜນການປະຈໍາປີ 2023 ຂອງແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານ ກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ທິດທາງແຜນການ ປີ 2023 ຂອງອົງການກວດສອບປະຈໍາພາກໃຕ້; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021 ແລະ ບົດລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປີ 2023 ຂອງອົງການກວດກາລັດແຂວງ;ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາການແຕ່ງຕັ້ງກົງຈັກບຸກຄະລາກອນຂອງແຂວງ ຕາມການສະເໜີ ຂອງທ່ານເຈົ້າແຂວງຄື: ແຕ່ງຕັ້ງ ທ່ານ ສະພາສິດ ລໍວັນໄຊ ເປັນຫົວໜ້າອົງການໄອຍະການປະຊາຊົນແຂວງ ອັດຕະປື; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງສານປະຊາຊົນແຂວງ ແລະ ອົງການໄອຍະການປະຊາຊົນແຂວງ; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ບົດລາຍງານຂອງສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດການເຕື່ອນໄຫວວຽກງານປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງພາປະຊາຊົນແຂວງ ຊຸດທີ II; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ຂໍ້ຕົກລົງຂອງທ່ານ ເຈົ້າແຂວງ ວ່າດ້ວຍສັນຍາແຮງງານ; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ຂໍ້ຕົກລົງຂອງທ່ານ ເຈົ້າແຂວງ ວ່າດ້ວຍການສ້າງ ແລະ ການຄຸ້ມຄອງຟາມລ້ຽງສັດ; ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະ ການນໍາໃຊ້ຢາປາບສັດຕູພືດ.
(ວິນັດ)