ໃນຄັ້ງວັນທີ 4-6 ກັນຍາ 2024 ທີ່ຜ່ານມາ ຄະນະຂອງ ທ່ານ​ ອຳໄພ ຈິດມານົນ ຮອງປະທານກຳມາທິການກົດໝາຍ ສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15 ແຂວງຈໍາປາສັກ, ທ່ານ ໄພສານ ອ່ອນໄຊວຽງ ຫົວຫນ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງໂພນທອງ, ທ່ານ​ ບຸນຄົງ ພັນວົງສາ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງໂພນ, ທ່ານ ບຸນຫນາ ໂຜມະນາມ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ ແລະ ທ່ານ ສຳນຽງ ພົມໂສພາ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ ພ້ອມດ້ວຍຄະນະ​ ໄດ້ລົງພົບປະຢ້ຽມຢາມ ຜູ້ມີສິດເລືອກຕັ້ງ ຢູ່ຫຼາຍຈຸດຄື: ຢູ່ບ້ານໃໝ່, ບ້ານໜອງດົງ, ບ້ານໂນນຫີນ, ບ້ານດອນຊາດ, ບ້ານໂນນສະຫວັນ, ແລະ ສໍານັກງານປົກຄອງເມືອງໂພນທອງ ໂດຍການໄດ້ຮັບການຕ້ອນຮັບຈາກຄະນະນໍາອົງການປົກຄອງເມືອງ, ບ້ານ ພ້ອມດ້ວຍພໍ່ແມ່ປະຊາຊົນໃນແຕ່ລະຈຸດເຄື່ອນໄຫວຢ່າງອົບອຸ່ນ.

ການເຄື່ອນໄຫວຂອງ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຢູ່ເຂດເລືອກຕັ້ງເມືອງໂພນທອງ ໃນແຕ່ລະຈຸດ ໄດ້ຮັບຟັງການລາຍງານ ຫຍໍ່ກ່ຽວກັບສະພາບລວມ ແລະ ການຈັດຕັ້ງປະຕິບັດວຽກງານໃນໄລຍະຜ່ານມາ ຈາກຕາງໜ້າອົງການປົກຄອງຂອງບັນດາບ້ານ ແລະ ພາກສ່ວນທີ່ກ່ຽວຂ້ອງ. ໃນໂອກາດດັ່ງກ່າວ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ພົບປະໂອ້ລົມໂດຍນໍາເອົາເນື້ອໃນສຳຄັນຕ່າງໆ ທີ່ຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II, ຕິດພັນກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງໄດ້ເຊື່ອມຊຶມ ຮັບຮູ້ເຂົ້າໃຈ. ພ້ອມດຽວກັນ, ອົງການປົກຄອງ ແລະ ພໍ່ແມ່ປະຊາຊົນທີ່ເຂົ່າຮ່ວມໃນການພົບປະຍັງໄດ້ໃຊ້ສິດປະຊາທິປະໄຕຂອງຕົນໃນການປະກອບຄໍາຄິດເຫັນ, ຄໍາສະເໜີ ໂດຍຍົກໃຫ້ເຫັນຫຼາຍບັນຫາສໍາຄັນ ທີ່ເປັນບັນຫາຕິດພັນກັບຊີວິດການເປັນຢູ່ ແລະ ການພັດທະນາເສດຖະກິດ-ສັງຄົມ ຂອງທ້ອງຖິ່ນຂອງຕົນ. ຕໍ່ກັບຄໍາສະເໜີຂອງປະຊາຊົນ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຊີ້ແຈງອະທິບາຍຕໍ່ບາງຄໍາສະເໜີໃຫ້ປະຊາຊົນໄດ້ເຂົ້າໃຈ ເຖິງສາເຫດ ແລະ ຄວາມຈໍາເປັນ ພ້ອມທັງໄດ້ຮັບເອົາຄໍາສະເໜີທີ່ເປັນບັນຫາໃຫຍ່ຕິດພັນກັບການຈັດຕັ້ງປະຕິບັດວຽກງານຂອງຂະແໜງການຕ່າງໆ ເຊິ່ງກອງເລຂາໄດ້ບັນທຶກຂໍ່ມູນຢ່າງລະອຽດ ເພື່ອນໍາໄປສັງລວມລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ພິຈາລະນາຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃນຂັ້ນຕອນຕໍ່ໄປ.