ໃນວັນທີ 22 ສິງຫາ 2024 ນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແລະ ສະມາຊິກສະພາປະຊາຊົນແຂວງຈໍາປາສັກ ເຄື່ອນໄຫວພົບປະຢ້ຽມຢາມພະນັກງານ-ລັດຖະກອນ ເມືອງສຸຂຸມາ ຢູ່ສະໂມສອນຂອງເມືອງ ນໍາໂດຍ ທ່ານ ປອ. ສົມສັກ ແສງສັກດາ ຄະນະປະຈໍາສະພາປະຊາຊົນແຂວງແຂວງ, ປະທານຄະນະກໍາມະການສດຖະກິດ ແຜນການ ແລະການເງິນ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ສົມທົບກັບ
ທ່ານ ນາງ ບຸນສຸວັນ ໂພໄຊຊະນະສັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ແລະ ທ່ານ ປອ. ຄໍາໄຕ ແກ້ວປະເສີດ ຮອງເລຂາພັກເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງສຸຂຸມາ ພ້ອມດ້ວຍບັນດາທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອສຸຂຸມາ ແລະ ການໃຫ້ກຽດຕ້ອນຮັບຄະນະຂອງ ທ່ານ ສົມເພັດ ບຸດສະດີ ກໍາມະການພັກແຂວງ, ເລຂາພັກເມືອງ, ເຈົ້າເມືອງສຸຂຸມາ ພ້ອມດ້ວຍບັນດາທ່ານການນໍາຂັ້ນສູງຂອງເມືອງສຸຂຸມາໃຫ້ການຕ້ອນຮັບຢ່າງອົບອຸ່ນ.
ການລົງພົບປະຢ້ຽມຢາມພະນັກງານ-ລັດຖະກອນ ຂອງເມືອງສຸຂຸມາໃນຄັ້ງນີ້ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຮັບຟັງການລາຍງາຍໂດຍສັງເຂບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດສັງຄົມ ແລະ ການຈັດຕັ້ງປະຕິບັດວຽກງານຮອບດ້ານຂອງເມືອງ ຈາກທ່ານສົມເພັດ ບຸດສະດີ ເຈົ້າສຸຂຸມາ. ຈາກນັ້ນ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາສະເໜີບາງເນື້ອໃນທີ່ສໍາຄັນ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 07 ຂອງສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງຈໍາປາສັກ ລວມທັງແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ອໍານາດການປົກຄອງ ແລະ ພໍ່ແມ່ປະຊາຊົນມີຄວາມຮັບຮູ້, ເຊື່ອມຊຶມຢ່າງເລິກເຊິ່ງ ຕິດພັນກັບການເກັບກໍາຄໍາຄິດເຫັນ, ຄໍາສະເໜີຂອງຜູ້ມີສິດເລືອກຕັ້ງໃນເຂດດັ່ງກ່າວ ເພື່ອນໍາໄປຊຸກຍູ້ອົງການປົກຄອງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆແກ້ໄຂ.
(ຂ່າວ-ພາບ: ສົມວິຈິດ ໄຊມົນຕີ)