2-5 ກັນຍາ 2024 ນີ້, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ປະທານສະພາປະຊາຊົນແຂວງສາລະວັນ ແລະ ທ່ານ ສຸບັນ ສະວະບຸດ ຄະນະປະຈໍາສະພາແຫ່ງຊາດ ປະທານກໍາມາທິການວຽກງານສະມາຊິກສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ສົມທົບກັບ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ປະຈໍາເມືອງ ໄດ້ເຄື່ອນໄຫວພົບປະຜູ້ມີສິດເລືອກຕັ້ງຂອງຕົນ ຕິດພັນກັບໂຄສະນາເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສາລະວັນ ຊຸດທີ II, ໃນນີ້ສາມາດເຄື່ອນໄຫວໄດ້ 3 ຕົວເມືອງ, ລວມ 7 ຈຸດ, ເມືອງວາປີ ເຄື່ອນໄຫວໄດ້ 4 ຈຸດ ຄື: ບ້ານນາຮ່ອງຂາມ, ບ້ານນາຫົວແຮດ, ບ້ານນາກົກຕານ ແລະ ບ້ານກອງລືນ້ອຍ; ເມືອງຄົງເຊໂດນ ເຄື່ອນໄຫວໄດ້ 2 ຈຸດ ຄື: ບ້ານໂອກາດໃຫຍ່ ແລະ ບ້ານແກ້ງຫວດ; ເມືອງລະຄອນເພັງ ເຄື່ອນໄຫວຢູ່ທີ່ບ້ານພູດາວແຈ້ງນ້ອຍ;

ໃນແຕ່ລະຈຸດ ສະມາຊິກສະພາແຫ່ງຊາດ ໄດ້ຍົກໃຫ້ເຫັນຫຼາຍບັນຫາສຳຄັນຂອງປະເທດຊາດທີ່ກອງປະຊຸມໄດ້ພິຈາລະນາ ແລະ ຮັບຮອງເອົາ ເຊັ່ນ: ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024; ບົດລາຍງານຂອງອົງການກວດສອບແຫ່ງລັດກ່ຽວກັບການແກ້ໄຂຜົນການກວດສອບປະຈຳປີ 2022; ບົດລາຍງານການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 6 ຫາເທື່ອທີ 7 ແລະ ແຜນການຮອດກອງປະຊຸມສະ ໄໝສາມັນເທື່ອທີ 8 ຂອງ ສະພາແຫ່ງຊາດ ຊຸດທີ IX; ການພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ 13 ສະບັບ (ສ້າງໃໝ່ 2 ສະບັບ, ປັບປຸງ 11 ສະບັບ). ຜົນສຳເລັດຂອງກອງປະຊຸມເທື່ອນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ເຂົ້າສູ່ຊີວິດຕົວຈິງ; ແມ່ນໝາກຜົນແຫ່ງການລວມສູນສະຕິປັນຍາ, ສິດປະຊາທິປະໄຕ ກໍຄືການຍົກສູງຄວາມຮັບຜິດຊອບທາງການເມືອງຂອງບັນດາທ່ານສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ ແລະ ອົງການທີ່ກ່ຽວຂ້ອງ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ຕົກໄປເທື່ອລະກ້າວ ເພື່ອພັດທະນາປະເທດຊາດໃຫ້ມີຄວາມໜັກແໜ້ນຂຶ້ນໄປເລື້ອຍໆ ແລະ ໄດ້ເຜີຍແຜ່ມະຕິສໍາຄັນຂອງກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງສາລະວັນ ໃຫ້ຜູ້ມີສິດເລືອກຕັ້ງ ໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ. ພ້ອມນັ້ນ, ຍັງໄດ້ຮັບຟັງບັນຫາ, ຂໍ້ສະເໜີ, ຄວາມຂັດຂ້ອງໝອງໃຈຈາກພໍ່ແມ່ປະຊາຊົນຜູ້ມີສິດເລືອກຕັ້ງ ເຊິ່ງບາງບັນຫາກໍໄດ້ຕອບກັບທີ່, ສ່ວນບັນຫາທີ່ກ່ຽວຂ້ອງກັບຫຼາຍພາກສ່ວນ ກໍຈະນຳໄປສະເໜີຕໍ່ພາກສ່ວນທີ່ກ່ຽວຂ້ອງແກ້ໄຂໃນໂອກາດຕໍ່ໄປ. ໂອກາດດຽວກັນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ມອບອຸປະກອນການຮຽນ ແລະ ອຸປະກອນກິລາ ຈໍານວນໜຶ່ງ ລວມມູນຄ່າ 13 ລ້ານກວ່າກີບ ມອບໃຫ້ແກ່ບ້ານເປົ້າໝາຍຂອງເມືອງຄົງເຊໂດນ ແລະ ເມືອງລະຄອນເພັງ;

ພ້ອມນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຍັງໄດ້ລົງເຄື່ອນໄຫວຕິດຕາມຄອບຄົວຕົວແບບການລ້ຽງປາໃນນາເຂົ້າ ຂອງຄອບຄົວທ່ານ ນາງ ໄລ ບ້ານວັງກ້ານຮຸ່ງ ເມືອງຄົງເຊໂດນ ແລະ ຢ້ຽມຢາມຖາມຂ່າວ ໃຫ້ກໍາລັງໃຈ ແລະ ມອບເງິນ 1 ລ້ານກີບ ແກ່ຄອບຄົວປະຊາຊົນຜູ້ໄດ້ຮັບປະສົບເຄາະຮ້າຍໄພທໍາມະຊາດຈາກຟ້າພ່າເສຍຊີວິດ; ທັງນີ້, ເພື່ອເປັນການແບ່ງເບົາຄວາມທຸກໂສກຕໍ່ຄອບຄົວ ແລະ ຜູ້ເສຍຊີວິດ ໃຫ້ມີກໍາລັງໃຈ ກັບສູ່ສະພາບປົກກະຕິ.

ພາບ-ຂ່າວ: ດີລໍາພົນ ພົມມະຈັນ