(ສພຊ) ລະຫວ່າງວັນທີ 2-4 ພະຈິກ 2021 ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໂດຍການເປັນປະທານກອງປະຊຸມຂອງຄະນະປະທານຄະນະປະຈຳສະພາແຫ່ງຊາດ (ດ້ວຍຮູບແບບກອງປະຊຸມທາງໄກ) ໃນວາລະກອງປະຊຸມວັນທີ 2 ແລະ ຕອນເຊົ້າຂອງວັນທີ 3 ພະຈິກ ບັນດາທ່ານສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳເຫັນຕໍ່ບົດລາຍງານຂອງລັດຖະບານ ກ່ຽວກັບແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ດ້ວຍຄວາມຮັບຜິດຊອບສູງ ຕາມການເຈາະຈີ້ມ ແລະ ໃຫ້ທິດຊີ້ນຳຂອງປະທານກອງປະຊຸມ ເປັນຕົ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2021, ທິດທາງແຜນການປີ 2022.

ໃນຕອນບ່າຍຂອງວັນທີ 3 ແລະທີ 4 ພະຈິກ ກອງປະຊຸມໄດ້ຮັບຟັງການຊີ້ແຈງຕໍ່ຄຳຊັກຖາມຂອງສະພາແຫ່ງຊາດຈາກທ່ານຮອງນາຍົກລັດຖະລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ແລະ ບັນດາທ່ານລັດຖະມົນຕີທີ່ກ່ຽວຂ້ອງ ເປັນຕົ້ນ: ລັດຖະມົນຕີກະຊວງການເງິນ, ຜູ້ວ່າການທະນາຄານ ແຫ່ງ ສປປລາວ, ລັດຖະມົນຕີກະຊວງສຶກສາທິການ ແລະ ກິລາ, ລັດຖະມົນຕີກະຊວງອຸດສາຫະກຳ ແລະ ການຄ້າ, ລັດຖະມົນຕີກະຊວງກະສິກຳ ແລະ ປ່າໄມ້, ລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ, ລັດຖະມົນຕີກະຊວງສາທາລະນະສຸກ.

ຈາກນັ້ນ, ກອງປະຊຸມໄດ້ຮັບຟັງບົດລາຍງານຂອງລັດຖະບານ ກ່ຽວກັບແຜນພັດທະນາພະລັງງານໄຟຟ້າຂອງ ສປປລາວ (2021-2030) ແລະ ແຜນພັດທະນາພະລັງງານໄຟຟ້າ ແລະ ບໍ່ແຮ່ 5 ປີ (2021-2025) ຈາກທ່ານລັດຖະມົນຕີກະຊວງພະລັງງານ ແລະ ບໍ່ແຮ່; ບົດປະກອບຄຳເຫັນຂອງຄະນະປະຈຳສະພາແຫ່ງຊາດ ຕໍ່ບົດລາຍງານຂອງລັດຖະບານກ່ຽວກັບແຜນພັດທະນາພະລັງງານໄຟຟ້າຂອງ ສປປລາວ (2021-2030) ແລະ ແຜນພັດທະນາພະລັງງານໄຟຟ້າ ແລະ ບໍ່ແຮ່ 5 ປີ (2021-2025) ຈາກທ່ານ ປະທານກຳມາທິການເສດຖະກິດ, ເຕັນໂນໂລຊີ ແລະ ສິ່ງແວດລ້ອມ; ຮັບຟັງການຜ່ານຮ່າງມະຕິ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບແຜນພັດທະນາພະລັງງານໄຟຟ້າຂອງ ສປປລາວ (2021-2030) ແລະ ແຜນພັດທະນາພະລັງງານໄຟຟ້າ ແລະ ບໍ່ແຮ່ 5 ປີ (2021-2025), ພ້ອມນັ້ນ, ບັນດາທ່ານ ສສຊ ກໍໄດ້ປະກອບຄຳເຫັນຕໍ່ເນື້ອໃນຮ່າງມະຕິດັ່ງກ່າວ.

(ກົງທະນູຄຳ ພິພັດເສລີ)