(ສປນວ) ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ (ສສຊ) ແລະ ສະມາຊິກສະພາປະຊາຊົນ ນວ (ສສນວ) ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ຢູ່ບ້ານຫາດວຽງຄໍາ, ເມືອງໄຊທານີ ນວ ໃນວັນທີ 01 ມີນາ 2023 ໂດຍການນຳພາຂອງ ທ່ານ ສາລະພິດ ສູນວໍລະວົງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ຫົວໜ້າພະແນກແຮງງານ ແລະ ສະຫວັດດີການສັງຄົມ ນວ, ມີ ທ່ານ ຄຳພູວັນ ລາດຊະຈັກ, ສະມາຊິກສະພາປະຊາຊົນ ນວ ຊຸດທີ II, ຮອງຫົວໜ້າ ຄະນະສະມາຊິກສະພາປະຊາຊົນ ນວ ປະຈຳເຂດເລືອກຕັ້ງເມືອງ, ຫົວໜ້າຫ້ອງການອຸດສາຫະ ກຳ ແລະ ການຄ້າ ເມືອງໄຊທານີ, ມີບັນດາອົງການຈັດຕັ້ງບ້ານ ພ້ອມດ້ວຍຜູ້ມີສິດເລືອກຕັ້ງພາຍໃນບ້ານກໍໄດ້ເຂົ້າຮ່ວມຢ່າງພ້ອມພຽງ.
ໃນການລົງພົບປະຄັ້ງນີ້, ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ພັດປ່ຽນກັນ ນໍາສະເໜີເນື້ອໃນທີ່ສຳຄັນຕ່າງໆທີ່ຖືກຄົ້ນຄວ້າ, ພິຈາລະນາ ແລະ ຮັບຮອງເອົາໃນກອງປະຊຸມສະພາແຫ່ງຊາດ ແລະ ສະພາປະຊາຊົນ ນວ ຕາມພາລະບົດບາດ, ສິດ ແລະ ໜ້າທີ່ ເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນ ນວ ໃຫ້ຖັນແຖວພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນຜູ້ມີສິດເລືອກຕັ້ງ ໄດ້ເຊື່ອມຊຶມ, ຮັບຮູ້ເຂົ້າໃຈຢ່າງກວ້າງຂວາງ ແລະ ທົ່ວເຖິງ, ທັງເປັນການພົບປະຜູ້ມີສິດເລືອກຕັ້ງ ເພື່ອນໍາເອົາຄໍາສະເໜີຄວາມຂັດຂ້ອງໝອງໃຈຂອງພໍ່ແມ່ປະຊາຊົນ ໄປຊຸກຍູ້ໃຫ້ພາກສ່ວນກ່ຽວຂ້ອງຄົ້ນຄວ້າຫາວິທີການແກ້ໄຂໃຫ້ຜູ້ມີສິດເລືອກຕັ້ງມີຄວາມກະຈ່າງແຈ້ງຕໍ່ບັນຫາຕ່າງໆ.
