ເພື່ອຍົກສູງສິດ, ພາລະບົດບາດ ຂອງສະພາແຫ່ງຊາດ, ສະພາປະຊາຊົນແຂວງ ກໍຄືສະມາຊິກສະພາແຫ່ງຊາດປະຈຳເຂດເລືອກຕັ້ງທີ 18 ແລະ ສະມາຊິກສະພາປະຊາຊົນແຂວງ ໃຫ້ບັນດາອົງການຈັດຕັ້ງລັດ ແລະ ເອກະຊົນຕະຫຼອດຮອດພໍ່ແມ່ປະຊາຊົນ ຜູ້ມີສິດເລືອກຕັ້ງພາຍໃນແຂວງ ໄຊສົມບູນ ໄດ້ຮັບຮູ້ ແລະ ເຂົ້າໃຈເຖິງແນວທາງແຜນພັດທະນາເສດຖະກິດ-ສັງຄົມຂອງຊາດ ແລະ ຂອງແຂວງກໍຄືມະຕິກອງປະຊຸມຂອງສະພາແຫ່ງຊາດ ແລະ ມະຕິກອງປະຊຸມສະພາປະຊາຊົນແຂວງ ຢ່າງທົ່ວເຖິງ . ດັ່ງນັ້ນ ໃນລະຫວ່າງວັນທີ 12-14 /8/ 2024 ຄະນະສະມາຊິກສະພາແຫ່ງຊາດ ແລະ ຄະນະສະມາຊິກສະພາປະຊາຊົນແຂວງ ຈຶ່ງໄດ້ລົງເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດ IX ແລະ ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຢູ່ທີ່ ບ້ານໂພນພະ ,ບ້ານມ່ວງສຸ່ມ, ບ້ານຫີນຫົົວເສືອ, ບ້ານຫຼັກ18 , ບ້ານຫຼັກ24, ບ້ານ ໄຊຈະເລີນ ເມືອງອະນຸວົງ ໂດຍນໍາໜ້າພາທາງຂອງທ່ານ ພອັ. ວິໄຊທໍ່ ເພຍຫຼວງຈົ່ງເສີ ສະມາຊິກສະພາແຫ່ງຊາດ , ຮອງປະທານ ສະພາປະຊາຊົນແຂວງ; ທ່ານ ຄຳພູທອນ ວົງພະຈັນ ສະມາຊິກສະພາປະຈຳເມືອງອະນຸວົງ, ຮອງປະທານ ສະະພາປະຊາຊົນແຂວງ; ທ່ານ ສັງຄົມ ສູນດາລາ ສສຂ ປະຈຳເມືອງອະນຸວົງ ພ້ອມດ້ວຍພະນັກງານຂອງສະພາປະຊາຊົນລົງຕິດຕາມໃນເທື່ອນີ້.

ໃນການລົງເທື່ອນີ້ກໍ່ເພື່ອປະຕິບັດຕາມລັດຖະທຳມະນູນ ແລະ ກົດໝາຍ ທັງເປັນການຍົກສູງພາລະບົດບາດຂອງສະມາຊິກສະພາແຫ່ງຊາດ ໃນນາມຕາງໜ້າໃຫ້ຄະນະປະຈຳສະພາແຫ່ງຊາດ ທີ່ປະຕິບັດໜ້າທີ່ຢູ່ທ້ອງຖິ່ນ ແລະ ຍົກສູງພາລະບົດບາດຂອງສະພາປະຊາຊົນແຂວງ ກໍຄືສະມາຊິກສະພາປະຊາຊົນແຂວງ ປະຈຳບັນດາເມືອງ ໃຫ້ຜູ້ມີສິດເລືອກຕັ້ງ ກໍຄືພໍ່ແມ່ປະຊາຊົນໄດ້ເຂົ້າໃຈເລິກເຊິ່ງ, ເພື່ອໃຫ້ບັນດາອົງການຈັດຕັ້ງລັດ ແລະ ເອກະຊົນ ຕະຫຼອດຮອດ ພໍ່ແມ່ປະຊາຊົນ ຜູ້ມີສິດເລືອກຕັ້ງພາຍໃນແຂວງໄຊສົມບູນ ໄດ້ຮັບຟັງຜົນສຳເລັດ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ຂອງແຂວງໃນໄລຍະຜ່ານມາ ແລະ ໄດ້ຮັບຮູ້ແນວທາງແຜນການເຄື່ອນໄຫວໃນຕໍ່ໜ້າຂອງຊາດ ກໍຄືຂອງແຂວງ ແລະ ເປັນການລົງໄກ້ຊິດຕິດແທດກັບພໍ່ແມ່ປະຊາຊົນບັນດາເຜົ່າຜູ້ມີສິດເລືອກຕັ້ງ ເກັບກຳສະພາບຄວາມຕ້ອງການຂອງປະຊາຊົນຢູ່ບັນດາບ້ານ ເປັນຂໍ້ມູນໃນການວາງແຜນພັດທະນາເສດຖະກິດ-ສັງຄົມ ໃຫ້ສອດຄອງແຕ່ລະໄລຍະ ຫຼັງຈາກນັ້ນບັນດາຜູ້ແທນ  ຍັງໄດ້ໂອ້ລົມ, ແລກປ່ຽນຄວາມຄິດເຫັນ ຕໍ່ກັບຂໍ້ຂ້ອງໃຈ ຂອງພໍ່ແມ່ປະຊາຊົນ ໄດ້ມີຄຳສະເໜີຕໍ່ກັບຜູ້ແທນ ທີ່ເກີດຈາກປະກົດການຫຍໍ້ທໍ້ຂອງສັງຄົມ ເພື່ອໃຫ້ສະພານຳເອົາຄຳສະເໜີຈາກປະຊົນໄປໃຫ້ພາກສ່ວນກ່ຽວຂ້ອງພິຈາລະນາ ແກ້ໄຂ ຕາມລະບຽບກົດໝາຍ ພ້ອມດຽວກັນນັ້ນ ຄະນະ ສສຊ-ສສຂ ກໍ່ໄດ້ຊີ້ແຈງໃຫ້ພໍ່ແມ່ປະຊາຊົນໄດ້ຮັບຮູ້ ແລະ ຕໍ່ກັບບາງບັນຫາທີ່ເຫັນວ່າເປັນບັນຫາໃໝ່ກໍຈະນຳເອົາໄປສະເໜີຕໍ່ພາກສ່ວນທີ່ກ້ຽວຂ້ອງເພື່ອຫາວິທີ່ແກ້ໄຂໃນໄລຍະຕໍ່ໄປ.

ພາຍຫຼັງສຳເລັດການລົງໂຄສະນາເຜີຍແຜ່ແລ້ວ ແຕ່ລະເມືອງຕ້ອງໄດ້ສະສະຫຼຸບລາຍງານເປັນລາຍລັກອັກສອນສົ່ງໃຫ້ຄະນະປະຈຳສະພາປະຊາຊົນແຂວງ ໂດຍຍົກໃຫ້ເຫັນດ້ານດີ, ດ້ານຄົງຄ້າງ, ວິທີການແກ້ໄຂ ແລະ ຄຳສະເໜີຂອງປະຊາຊົນ ຕ້ອງໄຈ້ແຍກລະອຽດແຕ່ລະຄຳສະເໜີນອກໃນຄວາມຮັບຜິດຊອບຂອງພາກສ່ວນໃດ, ຄຳສະເໜີທີ່ ສສຊ, ສສຂ ຊີ້ແຈ້ງແລ້ວມີຫຍັງແດ່ຈັກຄຳສະເໜີ, ມອບໃຫ້ບ້ານ, ເມືອງແກ້ໄຂຄຳສະເໜີຕໍ່ພໍ່ແມ່ປະຊາຊົນພາຍໃນເມືອງຂອງຕົນ.

                                                                                  (ແສງຕາວັນ ລັດຕະນະວົງ)