(ສພຊ) ຕອນເຊົ້າຂອງວັນທີ 15 ກຸມພາ 2022 ນີ້; ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 14 ແຂວງສາລະວັນ ແລະ ສະມາຊິກສະພາປະຊາຊົນແຂວງ (ສສຂ) ສາລະວັນ ໄດ້ຈັດພິທີເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ຂອງສະພາປະຊາຊົນແຂວງ (ສພຂ) ສາລະວັນ ຊຸດທີ II ຢູ່ທີ່ສະໂມສອນໃຫຍ່ຂອງແຂວງສາລະວັນ; ໃຫ້ກຽດເຜີຍແຜ່ໃນຄັ້ງນີ້ໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະ ສສຊ ປະຈໍາເຂດເລືອກຕັ້ງທີ 14; ທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ ຮອງປະທານ ຄະນະ ສສຊ ປະຈໍາເຂດເລືອກຕັ້ງທີ 14; ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ທັງເປັນ ສສຊ ປະຈໍາເຂດເລືອກຕັ້ງທີ 14 (ປະຈໍາຢູ່ສູນກາງ) ແລະ ທ່ານ ນາງ ພອນເພັດ ອຸ່ນແກ້ວ ສສຊ ປະຈໍາເຂດເລືອກຕັ້ງທີ 14 (ປະຈໍາຢູ່ສູນກາງ) ພ້ອມດ້ວຍ ສສຊ (ປະຈໍາຢູ່ທ້ອງຖິ່ນ); ເຂົ້າຮ່ວມຮັບຟັງມີພະນັກງານ-ລັດຖະກອນ ຕາງໜ້າຈາກກົມກອງ, ພະແນກການການຂ້ອມຂ້າງແຂວງ ແລະ ອົງການຈັດຕັ້ງມະຫາຊົນ ເຂົ້າຮ່ວມຮັບຟັງເກືອບ  100 ທ່ານ.

ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ມະຕິກອງປະຊຸມຂອງ ສພຊ ແລະ ສພຂ ໂດຍຕິດພັນກັບການຜັນຂະຫຍາຍ 2 ວາລະແຫ່ງຊາດ ແລະ ແນວທາງນະໂຍບາຍຂອງພັກ-ລັດ ໃຫ້ຖັນແຖວພະນັກງານ-ລັດຖະກອນ, ທະຫານ,ຕຳຫຼວດ ແລະ ປະຊາຊົນຜູ້ມີສິດເລືອກຕັ້ງ  ໄດ້ເຊື່ອມຊຶມ, ຮັບຮູ້ເຂົ້າໃຈຢ່າງກວ້າງຂວາງ ແລະ ທົ່ວເຖິງ, ທັງເປັນການພົບປະຜູ້ມີສິດເລືອກຕັ້ງ ນໍາເອົາຄໍາສະເໜີ ຄວາມຂັດຂ້ອງໝອງໃຈ ທີ່ສະເໜີຜ່ານມາຍັງຜູ້ແທນປະຊາຊົນ ເພື່ອຊ່ວຍຄົ້ນຄວ້າຫາແກ້ໄຂ ຮ່ວມກັບພາກສ່ວນທີ່ກ່ຽວຂ້ອງໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງມີຊີວິດການເປັນຢູ່ທີ່ດີຂຶ້ນເທື່ອລະກ້າວ.

ໃນວາລະຂອງກອງປະຊຸມ ບັນດາທ່ານ ສສຊ, ສສຂ ໄດ້ພັດປ່ຽນກັນນຳສະເໜີບັນດາມະຕິສຳຄັນຕ່າງໆທີ່ຮັບຮອງເອົາໃນກອງປະຊຸມ ສພຊ, ສພຂ ຢ່າງເປັນເຈົ້າການຕາມພາລະບົດບາດ, ສິດ ແລະ ໜ້າທີ່ທີ່ໄດ້ກຳນົດໄວ້ໃນກົດໝາຍ ຂອງ ສພຊ, ສພຂ; ໂອກາດດຽວກັນທ່ານປະທານກອງປະຊຸມຍັງໄດ້ເປີດໂອກາດໃຫ້ຜູ້ເຂົ້າຮ່ວມຮັບຟັງ ມີການແລກປ່ຽນ, ສົນທະນາ, ຖາມ-ຕອບກັບທີ່ຕໍ່ກັບບັນຫາຕ່າງທີ່ທີ່ເກີດຂຶ້ນຕົວຈິງໃນວຽກງານ ແລະ ຊີວິດການເປັນຢູ່ທີ່ຍັງບໍ່ທັນໄດ້ຮັບການແກ້ໄຂ.

ພາບແລະຂ່າວ: ດີລຳພົນ ພົມມະຈັນ