ໃນລະຫວ່າງວັນທີ 28 ກຸມພາ ຫາ 2 ມີນາ 2022 ທີ່ຜ່ານມານີ້ ທ່ານ ຈອມສີ ລັດຕະນະປັນ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5, ປະທານສະພາປະຊາຊົນແຂວງບໍ່ແກ້ວ ສົມທົບກັບ ທ່ານ ດຣ ວິລະພັນ ສີລິທໍາ ສະມາຊິກສະພາສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ ພ້ອມດ້ວຍຄະນະ ໄດ້ລົງພົບປະຜູ້ມີສິດເລືອກຕັ້ງ ເພື່ອເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງບໍ່ແກ້ວ ຊຸດທີ II.

ໃຫ້ແກ່ການນໍາຂອງເມືອງ, ທະຫານ, ຕໍາຫລວດ, ພະນັກງານ-ລັດຖະກອນອ້ອມຂ້າງເມືອງ, ພະນັກງານລົງກໍ່ສ້າງຮາກຖານ, ອຳນາດການປົກຄອງບ້ານ ແລະ ປະຊາຊົນບັນດາເຜົ່າ ຢູ່ 5 ຈຸດດ້ວຍກັນຄື: ສະໂມສອນເມືອງຕົ້ນເຜິ້ງ, ບ້ານຫລວງສິງໃຈ, ບ້ານສີດອນມີ, ບ້ານສີດອນແຍງ ແລະ ບ້ານນໍ້າເກິ່ງເກົ່າ; ເຊິ່ງມີຜູ້ເຂົ້າຮ່ວມຮັບຟັງທັງໝົດ ຈໍານວນ 349 ຄົນ, ຍິງ 167 ຄົນ.

ການລົງພົບປະໃນຄັ້ງນີ້ ໄດ້ຮັບຟັງການລາຍງານສະພາບການໂດຍຫຍໍ້ຈາກເມືອງ ແລະ ບັນດາບ້ານທີ່ລົງເຄື່ອນໄຫວ; ຈາກນັ້ນ, ທ່ານ ຈອມສີ ລັດຕະນະປັນ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5, ປະທານສະພາປະຊາຊົນແຂວງບໍ່ແກ້ວ ແລະ ທ່ານ ດຣ ວິລະພັນ ສີລິທໍາ ສະມາຊິກສະພາສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ ໄດ້ພັດປ່ຽນກັນໂອ້ລົມ ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງບໍ່ແກ້ວ ຊຸດທີ II.

ໃນໂອກາດທີ່ໄດ້ລົງພົບປະ ເຜີຍແຜ່ເນື້ອໃນຜົນສໍາເລັດກອງປະຊຸມຄັ້ງນີ້ ຍັງໄດ້ຮັບຟັງຄຳສະເໜີ ຄຳຄິດເຫັນ ຄວາມຮຽກຕ້ອງການຂອງປະຊາຊົນຫຼາຍບັນຫາ ເປັນຕົ້ນແມ່ນ ບັນຫາຕາຝັ່ງເຈື່ອນລ້ຽບແຄມແມ່ນໍ້າຂອງ, ບັນຫາໄຟເຢື່ອງທາງ ແລະ ບັນຫາອື່ນໆ.

ຕໍ່ກັບບັນຫາດັ່ງກ່າວນີ້ ສສຊ ໄດ້ອະທິບາຍ ແລະ ໃຫ້ຄວາມກະຈ່າງແຈ້ງ ຕໍ່ພໍ່ແມ່ປະຊາຊົນໄດ້ຮັບຊາບ ແລະ ນໍາເອົາທຸກຄໍາສະເໜີຂອງປະຊາຊົນໄປສົມທົບກັບຂະແໜງການ, ເມືອງ, ແຂວງ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາແກ້ໄຂ ຕາມຂັ້ນຕອນ ແລະ ລະບຽບການວາງອອກ.