(ສ​ພ​ຊ) ພີທີມອບ-ຮັບຊຸດຄອມພິວເຕີ ແລະ ລະບົບໂທລະໂຄ່ງ ໃຫ້ເມືອງວຽງຄໍາ ໄດ້ຈັດຂຶ້ນໃນວັນທີ 10 ກັນຍາ 2021 ຢູ່ສະໂມສອນຫ້ອງວ່າການເມືອງວຽງຄຳ ແຂວງວຽງຈັນ ໂດຍເປັນກຽດມອບຂອງທ່ານ ພັອ. ປອ. ພູທອນ ວໍລະເພັດ ຮອງປະທານກຳມາທິການກົດໝາຍ, ສະມາຊິກສະພາແຫ່ງຊາດ (ສ​ສ​ຊ) ປະຈຳເຂດເລືອກຕັ້ງທີ 10 ແຂວງວຽງຈັນ ແລະ ຕາງໜ້າຂຶ້ນຮັບໂດຍທ່ານ ແກ້ວໃຈ ພົມມີ ຮອງເຈົ້າເມືອງ ເມືອງວຽງຄຳ, ຜູ້ຊີ້ນຳວຽກງານວັດທະນະທຳ-ສັງຄົມຂອງເມືອງ; ເຂົ້າຮ່ວມມີທ່ານ ລຳໄມ ກູດລາວົງ ຮອງປະທານສະພາປະຊາຊົນແຂວງວຽງຈັນ, ທ່ານ ແສງແກ້ວ ສູນທະວົງສາ ຮອງຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງວຽງຈັນ, ມີບັນດາຫົວໜ້າຫ້ອງການ, ນາຍບ້ານ 17 ບ້ານພາຍໃນເມືອງວຽງຄຳ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພີທີ, ຮອງປະທານກຳມະທິການກົດໝາຍ ໄດ້ມີຄຳເຫັນໂອ້ລົມ, ພ້ອມທັງກ່າວວ່າ: ໂອກາດທີ່ໄດ້ນຳເອົາເຄື່ອງມາມອບໃນຄັ້ງນີ້ ແມ່ນເພື່ອເປັນການຊຸກຍູ້, ສົ່ງເສີມກ່ຽວກັບວຽກງານຖະແຫ​ລງຂ່າວ ຢູ່ເມືອງວຽງຄຳ ໃຫ້ມີການຂະຫຍາຍຕົວ ຢ່າງເຂັ້ມແຂງ ແລະ ເພື່ອໃຫ້ອົງການປົກຄອງບ້ານ 17 ບ້ານພາຍໃນເມືອງວຽງຄຳ ມີລະບົບໂທລະໂຄ່ງ ປະຈຳບ້ານ ເພື່ອຈະໄດ້ໂຄສະນາເຜີຍແຜ່ຂໍ້ມູນຂ່າວສານຕ່າງໆ ໃຫ້ແກ່ພໍ່ແມ່ປະຊາຊົນໄດ້ຮັບຂໍ້ມູນຂ່າວສານຢ່າງທົ່ວເຖິງ.

ເຄື່ອງທີ່ນຳມາມອບຄັ້ງນີ້ ປະກອບມີໂທລະໂຄ່ງຈຳນວນ 46 ໜ່ວຍ, ສາຍໂທລະໂຄ່ງ 30 ໂຄ້ງ ເທົ່າກັບ 6.000 ແມັດ, ເຄື່ອງຂະຫຍາຍສຽງໂທລະໂຄ່ງ ຈຳນວນ 4 ໜ່ວຍ ແລະ ຄອມພິວເຕີ ຈຳນວນ 1 ຊຸດ (ຊຸດຄອມພິວເຕີ ແລະ ເຄື່ອງພິມ) ລວມມູນຄ່າ 50 ລ້ານກີບ.

ທ່ານ ແກ້ວໃຈ ພົມມີ ກໍໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍທ່ານ ພັອ. ປອ. ພູທອນ ວໍລະເພັດ ທີ່ໄດ້ມີຄວາມເປັນຫ່ວງເປັນໃຍຊ່ວຍເຫລືອເມືອງວຽງຄຳຄັ້ງ​ນີ້ ເພື່ອໃຫ້ຫ້ອງການປົກຄອງບ້ານໄດ້ມີລະບົບໂທລະໂຄ່ງ ແລະ ເພື່ອຈະໄດ້ໂຄສະນາເຜີຍແຜ່ຂໍ້ມູນຂ່າວສານຕ່າງໆ ໃຫ້ພໍ່ແມ່ປະຊາຊົນໄດ້ຮັບຢ່າງທົ່ວເຖິງ ໂດຍຜ່ານລະບົບໂທລະໂຄ່ງ.

(ນັກ​ຂ່າວ ສ​ພ​ຂ ວຽງ​ຈັນ)