ລະຫວ່າງວັນທີ 28 – 30 ກັນຍາ 2023 ຜ່ານມາ ທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າ ສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ພ້ອມດ້ວຍທີມງານ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ຢູ່ 3 ຈຸດຄື: ຈຸດເທດສະບານເມືອງຊຽງຄໍ້, ບ້ານຕະລ່າງ ແລະ ບ້ານ ປ່າຮ່າງ ( ເມືອງສົບເບົາ ) ມີຜູ້ເຂົ້້າຮ່ວມທັງໝົດ 185 ຄົນ, ຍິງ 69 ຄົນ.

         ການລົງເຜີຍແຜ່ ແລະ ພົບປະຢ້ຽມຢາມ ຄັ້ງນີ້, ທ່ານ ແກ້ວຈະເລີນ ເຊ່ຍຢີ້ງຢ່າງ ຕາງໜ້າຄະນະທີມງານ ໄດ້ນຳເອົາຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຕໍ່ເນື້ອໃນຜົນສຳເລັດດັ່ງກ່າວ ພ້ອມທັງໂອ້ລົມ ແລະ ຊຸກຍູ້ໃຫ້ ພໍ່ແມ່ປະຊາຊົນ ປັບປຸງແບບແຜນ ການດຳລົງຊີວິດຕາມແບບໃໝ່ ແລະ ເອົາໃຈໃສ່ ສ້າງເສດຖະກິດຄອບຄົວ ດ້ວຍການປູກຝັງ, ລ້ຽງສັດ, ຕ່ຳຫູກທໍໄໝທີ່ເປັນມູນເຊື້ອ ແລະ ບໍລິການອື່ນ ທີ່ຖືກຕ້ອງຕາມລະບຽບກົດໝາຍ ເພື່ອສ້າງລາຍຮັບເຂົ້າສູ່ຄອບຄົວ, ເຮັດໃຫ້ໃຫ້ຄອບຄົວ ກໍຄືພາຍໃນບ້ານ ຫຼຸດພົ້ນອອກຈາກຄວາມທຸກຍາກ, ພ້ອມກັນຕ້ານ, ສະກັ້ນ ແລະ ແກ້ໄຂບັນຫາປາກົດການຫຍໍ້ທໍ້ຕ່າງໆ ພາຍໃນບ້ານໃຫ້ໝົດໄປເທື່ອລະກ້າວ.

ໂອກາດດຽວກັນນີ້ ທີມງານຍັງໄດ້ລົງຢ້ຽມຢາມກຸ່ມຫັດຖະກຳ ແຕ້ມທຽນໄຂ 3 ເອື້ອຍນ້ອງ ຢູ່ບ້ານ ວຽງຮັງ ( ເມືອງສົບເບົາ ) ແລະ ນຳເອົາ ອຸປະກອນການຮຽນ ມອບໃຫ້ຄອບຄົວນ້ອງນັກຮຽນ ທີ່ທຸກຍາກ ລວມມູນຄ່າທັງໝົດ 3.000.000 ກີບ.