ໃນລະຫວ່າງວັນທີ 3-4 ຕຸລາ 2024 ນີ້, ສະມາຊິກສະພາປະຊາຊົນແຂວງຫົວພັນ ປະຈຳເຂດເລືອກຕັ້ງ ເມືອງຊຽງຄໍ້ ນໍາໂດຍ ທ່ານ ເຄນທອງ ພອນພະແກ້ວ ແລະ ທ່ານ ແທງ ວິໄລພອນ ພ້ອມດ້ວຍທີມງານ ໄດ້ລົງເຄື່ອນໄຫວ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 7ຂອງ ສະພາປະຊາຊົນ ແຂວງຫົງພັນ ຊຸດທີ II ຢູ່ເມືອງຊຽງຄໍ້ ກວມເອົາ 4 ບ້ານຄື: ບ້ານ ສົບຊາຍ, ບ້ານ ຕາອອນໃຕ້, ບ້ານ ຮັບ ແລະ ບ້ານສົບສານ ມີບັນດາທ່ານຄະນະພັກ, ອໍານາດການປົກຄອງ ພ້ອມດ້ວຍປະຊາຊົນພາຍໃນ 4 ບ້ານເຂົ້າຮ່ວມທັງຫມົດ 285 ທ່ານ, ຍິງ 156 ທ່ານ.

           ການເຄື່ອນໄຫວເຮັດວຽກຄັ້ງນີ້, ທ່ານ ສສຂ ປະຈຳເຂດເລືອກຕັ້ງເມືອງຊຽງຄໍ້ ໄດ້ພັດປ່ຽນກັນນຳເອົາ ເນື້ອໃນເອກະສານຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງຫົວພັນ ຊຸດທີ II ແລະ ຄຳສັ່ງ ເລກທີ 11/ນຍ, ວ່າດວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ປົກປັກຮັກສາ ພັດທະນາ ແລະ ນຳໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທຳລາຍປ່າໄມ້ ແລະ ໄຟໄໝ້ລາມປ່າ ເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຕໍ່ເນື້ອໃນຜົນສຳເລັດຂອງກອງປະຊຸມ ສະພາປະຊາຊົນ ແຂວງຫົວພັນ ໄດ້ພິຈາລະນາ ແລະ ຮັບຮອງເອົາໃນກອງປະຊຸມ; ພ້ອມນີ້, ຍັງໄດ້ຮັບຟັງຄຳຄິດຄຳເຫັນ, ຄຳສະເໜີຂອງພໍ່ແມ່ປະຊາຊົນບັນດາເຜົ່າ ບາງຄຳສະເໜີ ບັນດາທ່ານກໍ່ໄດ້ອະທິບາຍ,ຊີ້ແຈງກັບທີ່ ເພື່ອໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈກ່ຽວກັບບັນຫາດັ່ງກ່າວ, ບາງຄຳສະເໜີກໍ່ໄດ້ນຳໄປໃຫ້ພາກສ່ວນທີ່ກ່ຽວຂ້ອງ ຄົ້ນຄວ້າ ແລະ ແກ້ໄຂ ຕາມຄວາມເໝາະສົມ.

                                                ໂອກາດດຽວກັນນີ້, ຄະນະທີມງານ ຍັງໄດ້ມອບໂທລະໂຄ່ງ ໃຫ້ບ້ານ ຕາອອນໃຕ້ ຈຳນວນ 1 ຊຸດ ແລະ ມອບເຄື່ອງນຸ່ງຫົ່ມໃຫ້ປະຊາຊົນຜູ້ທຸກຍາກ ຢູ່ບ້ານ ຮັບ ແລະ ບ້ານສົບຊາຍ ອີກດ້ວຍ.

                                                                                                ສພຂ ຫົວພັນ.