(ສພຊ) ວັນທີ 5 ມີນາຜ່ານມາ, ສະພາແຫ່ງຊາດ ໄດ້ຈັດກອງປະຊຸມເຜີຍແຜ່ເຊື່ອມຊຶມບັນດາມະຕິ, ຄໍາສັ່ງ ຂອງກົມການເມືອງສູນກາງພັກ ແລະ ເຜີຍແຜ່ບັນດາເອກະສານວຽກງານກວດກາຂອງສະພາແຫ່ງຊາດ ຢູ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງສະຫາຍ ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ, ເຂົ້າຮ່ວມມີຄະນະພັກ, ຄະນະປະຈໍາສະພາແຫ່ງຊາດ, ປະທານ-ຮອງປະທານກໍາມາທິການ, ເລຂາ-ຮອງເລຂາທິການສະພາແຫ່ງຊາດ, ຄະນະສະມາຊິກສະພາແຫ່ງຊາດເພດຍິງ, ຄະນະກົມ, ຄະນະສູນ ແລະ ສະມາຊິກພັກເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມຄັ້ງນີ້ ເພື່ອເປັນການເຜີຍແຜ່ໃຫ້ສະມາຊິກພັກ-ພະນັກງານພາຍໃນສະພາແຫ່ງຊາດ ມີຄວາມຮັບຮູ້ ແລະ ເຂົ້າໃຈເນື້ອໃນບັນດາມະຕິ, ຄໍາສັ່ງກ່ຽວກັບການກໍານົດເນື້ອໃນມາດຖານລວມ, ມາດຖານສະເພາະຂອງຕໍາແໜ່ງ ແລະ ກຸ່ມຕໍາແໜ່ງຂອງພະນັກງານນໍາພາ-ຄຸ້ມຄອງ ໃນທົ່ວລະບົບການເມືອງ ແຫ່ງ ສປປລາວ ເປັນພື້ນຖານການເລືອກເຟັ້ນສ້າງແຜນກໍານົດ, ກໍ່ສ້າງ, ບໍາລຸງ, ຕີລາຄາ, ສັບຊ້ອນ, ຈັດວາງ, ແຕ່ງຕັ້ງພະນັກງານເຂົ້າໃນຕໍາແໜ່ງນໍາພາ-ຄຸ້ມຄອງແຕ່ລະຂັ້ນ, ເປັນບ່ອນອີງໃຫ້ແກ່ສະມາຊິກພັກໄດ້ເຝິກຝົນຫລໍ່ຫລອມຕົນເອງ; ເພື່ອຮັບປະກັນໃຫ້ບັນດາຮາກຖານພັກ, ເປົ້າໝາຍທີ່ເຂົ້າຮ່ວມກໍາໄດ້ເຖິງຄວາມຮັບຜິດຊອບ, ຂອບເຂດສິດ ແລະ ໜ້າທີ່ຂອງຕົນຕໍ່ການຜັນຂະຫຍາຍຈັດຕັ້ງປະຕິບັດວຽກງານຕ່າງໆ ຕາມທີ່ມະຕິ, ຄໍາສັ່ງ ແລະ ເອກະສານສໍາຄັນຕ່າງໆຂອງຂັ້ນເທິງໄດ້ກໍານົດ.

ເນື້ອໃນເອກະສານທີ່ນໍາມາເຜີຍແຜ່ຄັ້ງນີ້ ປະກອບມີ: ມະຕິຂອງກົມການເມືອງສູນກາງພັກ ວ່າດ້ວຍມາດຖານຂອງພະນັກງານນໍາພາ-ຄຸ້ມຄອງ; ມະຕິຂອງກົມການເມືອງສູນກາງພັກ ວ່າດ້ວຍວຽກງານຄຸ້ມຄອງພະນັກງານ; ມະຕິຂອງກົມການເມືອງສູນກາງພັກ ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ; ຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ຜ່ານບົດແນະນໍາຂອງອົງການກວດກາລັດຖະບານ ກ່ຽວກັບການດໍາເນີນຄະດີການສໍ້ລາດບັງຫລວງ; ຜ່ານແຜນການຂອງຄະນະບໍລິຫານງານພັກສະພາແຫ່ງຊາດ ກ່ຽວກັບການກໍ່ສ້າງຮາກຖານພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ; ຜ່ານຂໍ້ຕົກລົງຂອງຄະນະປະຈໍາພັກສະພາແຫ່ງຊາດ ວ່າດ້ວຍການແຕ່ງຕັ້ງຄະນະຮັບຜິດຊອບການກໍ່ສ້າງຮາກຖານພັກປອດໃສ, ເຂັ້ມແຂງ ແລະ ໜັກແໜ້ນ; ແລະ ຜ່ານບົດແນະນໍາຂອງຄະນະບໍລິຫານງານພັກສະພາແຫ່ງຊາດ ວ່າດ້ວຍການຈັດຕັ້ງປະຕິບັດພັກປອດໃສ, ເຂັ້ມແຂງ ແລະ ໜັກແໜ້ນ.

ທ່ານ ແສງນວນ ໄຊຍະລາດ ໄດ້ເນັ້ນບາງບັນຫາສໍາຄັນຕໍ່ກອງປະຊຸມວ່າ: ໃຫ້ນໍາເອົາເນື້ອໃນຈິດໃຈຂອງການເຜີຍແຜ່ຄັ້ງນີ້ ໄປເຜີຍແຜ່ໃຫ້ສະມາຊິກພັກໃນໜ່ວຍຂອງຕົນໃຫ້ທົ່ວເຖິງ; ສະເໜີໃຫ້ຄະນະພັກແຕ່ລະໜ່ວຍ ຕ້ອງຫັນບັນດາເອກະສານທີ່ໄດ້ເຊື່ອມຊຶມນັ້ນ ຄົ້ນຄວ້າເປັນແຜນການ, ຈຸດປະສົງ, ລະດັບຄາດໝາຍຂອງຕົນ ເພາະທິດທາງແຜນການທີ່ສະເໜີມາຍັງເປັນອັນລວມ ເຮັດແນວໃດເພື່ອຮັບປະກັນໃຫ້ສໍາເລັດໜ້າທີ່; ເພີ່ມທະວີວຽກງານສຶກສາອົບຮົມການເມືອງນໍາພາແນວຄິດ, ເຮັດວຽກງານປຸກລະດົມໃຫ້ສະມາຊິກພັກຂອງຕົນຕັ້ງໜ້າກໍ່ສ້າງພັກ ເນື້ອແທ້ກໍແມ່ນຕັ້ງໜ້າກໍ່ສ້າງຕົນເອງ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຢາກສ້າງໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໄດ້ ກໍຕໍ່ເມືອວ່າຕ້ອງສ້າງສະມາຊິກພັກທຸກສະຫາຍ ໃຫ້ກາຍເປັນສະມາຊິກພັກປອດໃສ, ເຂັ້ມແຂງ, ໜັກແໜ້ນ; ເປີດບັ້ນຂະບວນການແຂ່ງຂັນທົ່ວສະພາ ເພື່ອພ້ອມກັນບຸກບືນສ້າງຜົນງານຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ຕິດພັນກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ; ຈະໄດ້ພ້ອມກັນກວດກາ, ສະຫລຸບ, ຖອດຖອນບົດຮຽນ, ປະເມີນຜົນໄດ້ຮັບຕົວຈິງຮ່ວມກັນ ໂດຍອີງໃສ່ວຽກງານຕົວຈິງ ເປັນຕົ້ນວຽກງານວິຊາສະເພາະ, ການປະຕິບັດບັນດາຂໍ້ກໍານົດ, ກົດລະບຽບແບບແຜນຕ່າງໆ ເວົ້າລວມແມ່ນການປະຕິບັດໜ້າທີ່ການເມືອງ ແລະ ປະຕິບັດຄຸນສົມບັດ ແມ່ນໃຫ້ໄປຄຽງຄູ່ກັນ.

(ນາງ ສຸມົນທາ ງາໄຊ)