(ສພຊ) ກອງປະຊຸມສະຫລຸບຕີລາຄາການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງໃນໄລຍະ 5 ປີ 2016-2020 ແລະ ທິດທາງແຜນການ 5 ປີ 2021-2025 ແລະ ເຜີຍແຜ່ຜົນສຳເລັດກອງປະຊຸມວຽກງານຈັດຕັ້ງທົ່ວປະເທດ ໄດ້ຈັດຂຶ້ນໃນວັນທີ 3 ມີນາ 2022 ທີ່ສະພາແຫ່ງຊາດ (ສພຊ) ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກ ສພຊ, ຮອງປະທານສະພາແຫ່ງຊາດ; ມີບັນດາສະຫາຍຄະນະບໍລິຫານງານພັກ ສພຊ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ ແລະ ສະມາຊິກພັກສຳບູນພາຍໃນ ສພຊເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການຜ່ານບົດສະຫລຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງ ພາຍໃນ ສພຊ ໃນໄລຍະ 5 ປີຜ່ານມາ 2016-2020 ແລະ ທິດທາງແຜນການ 5 ປີ 2021-2025; ແລະຮັບຟັງການເຜີຍແຜ່ເອກະສານສຳຄັນຕ່າງໆຄື: ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ IX; ມະຕິກອງປະຊຸມຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ ສະບັບເລກທີ 04/ຄບສພ, ລົງວັນທີ 30 ກັນຍາ 2021; ຜົນສຳເລັດກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ແລະ ເນື້ອໃນບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI. ພ້ອມກັນນັ້ນ, ກອງປະຊຸມຍັງໄດ້ຮັບຟັງແຈ້ງການຂອງຄະນະຈັດຕັ້ງສູນກາງພັກ ເລກທີ 33/ຄຈສພ, ລົງວັນທີ 18 ກຸມພາ 2012 ວ່າດ້ວຍການຍົກຍ້າຍພະນັກງານການນໍາຂັ້ນສູງຮັບໜ້າທີ່ໃໝ່; ມະຕິຂອງຄະນະປະຈໍາສະພາແຫ່ງຊາດວ່າດ້ວຍການຍົກຍ້າຍພະນັກງານການນໍາຂັ້ນສູງຮັບໜ້າທີ່ໃໝ່ຢູ່ພາຍໃນ ສພຊ; ຂໍ້ຕົກລົງຂອງຄະນະບໍລິຫານງານພັກ ສພຊ ວ່າດ້ວຍການຮັບຮອງອອກບັດສະມາຊິກພັກ ໃຫ້ບັນດາສະມາຊິກພັກສົມບູນ ທັງມອບ-ຮັບມະຕິຂອງຄະນະປະຈໍາ ສພຊ ວ່າດ້ວຍການຮັບຮອງເອົາການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່; ຈາກນັ້ນ, ໄດ້ມອບ-ຮັບບັດສະມາຊິກພັກ ໃຫ້ສະມາຊິກພັກສົມບູນ ຈຳນວນ 39 ສະຫາຍ.
ໂອກາດດຽວກັນນີ້, ສະຫາຍ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານການຈັດຕັ້ງຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ການປັບປຸງກົງຈັກການຈັດຕັ້ງ ພາຍໃນ ສພຊ ໃນໄລຍະ 5 ປີຜ່ານມາ, ສະແດງຄວາມຊົມເຊີຍທັງ 39 ສະຫາຍ ທີ່ໄດ້ຮັບບັດສະມາຊິກພັກສົມບູນ ແລະ ຮຽກຮ້ອງໃຫ້ທຸກພາກສ່ວນເອົາໃຈໃສ່ມີສ່ວນຮ່ວມໃນການແກ້ໄຂຂໍ້ຄົງຄ້າງທີ່ຍັງບໍ່ທັນປະຕິບັດໄດ້ ແລະ ສະຫາຍຍັງໄດ້ເນັ້ນໜັກໃຫ້ຄະນະພັກທຸກຂັ້ນ ຈົ່ງຫັນເອົາບັນດາມະຕິຂອງຂັ້ນເທິງເປັນແຜນງານລະອຽດຂອງຕົນ; ເອົາໃຈໃສ່ສ້າງພັກປອດໃສ, ເຂັ້ມແຂງ, ໜັກແໜ້ນ ໃຫ້ສາມາດສ້າງໄດ້ໜ່ວຍພັກພັກປອດໃສ, ເຂັ້ມແຂງ, ໜັກແໜ້ນ ໃຫ້ຫລາຍຍິ່ງຂຶ້ນກວ່າເກົ່າ ທັງເນັ້ນໜັກໃຫ້ສະມາຊິກພັກທຸກສະຫາຍ ເປັນແບບຢ່າງນຳໜ້າທາງການເມືອງ–ແນວຄິດ, ແບບແຜນການນຳພາ, ວິທີເຮັດວຽກ, ແບບແຜນການດຳລົງຊີວິດ ແລະ ອື່ນໆ.
(ພາບ ແລະ ຂ່າວ: ປາກາລັກ ພົມມີໄຊ)