(ສພຊ) ວັນທີ 1 ທັນວາ 2021 ໄດ້ມີພິທີມອບ-ຮັບ ເຄື່ອງຊ່ວຍເຫລືອຈາກສະພາແຫ່ງຊາດ ເຊິ່ງນໍາໂດຍທ່ານ ບຸນລ້ອມ ແກ້ວບົວໂຮມ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງໄຊຍະບູລີ ທັງເປັນຮອງປະທານກຳມາທິການວັດທະນະທຳ-ສັງຄົມ ແລະ ທ່ານ ສິງ ຄຳ ວົງພະຈັນ ຮອງເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ມອບເຄື່ອງເພື່ອປະກອບສ່ວນຊ່ວຍເຫລືອໃຫ້ 2 ພາກສ່ວນຄື: ໂຮງໝໍມິດຕະພາບ ແລະ ສູນພັດທະນາຜູ້ເສຍອົງຄະ 489 ບ້ານຂຸດສາມບາດ ເມືອງໄຊທານີ ນະຄອນຫລວງວຽງຈັນ ເນື່ອງໃນໂອກາດວັນຊາດທີ 2 ທັນວາ ຄົບຮອບ 46 ປີ ແລະເພື່ອປະກອບສ່ວນເຂົ້າໃນວຽກງານປ້ອງກັນ ແລະ ປິ່ນປົວພະຍາດໂຄວິດ-19.

                    ເຄື່ອງທີ່ນໍາໄປຊ່ວຍເຫລືອຄັ້ງນີ້ປະກອບມີ: ຜ້າອັດປາກ-ດັງ, ເຄື່ອງອຸປະໂພກ, ບໍລິໂພກ ແລະ ເງິນສົດພາກສ່ວນລະ 6 ລ້ານກີບ ລວມມູນຄ່າຂອງການຊ່ວຍເຫລືອຄັ້ງນີແມ່ນ23ລ້ານກວ່າກີບ; ຕາງໜ້າສະພາແຫ່ງຊາດ ກ່າວມອບໂດຍທ່ານ ບຸນລ້ອມ ແກ້ວບົວໂຮມ ແລະ ຕາງໜ້າໃຫ້ໂຮງໝໍມິດຕະພາບກ່າວຮັບໂດຍແມ່ນທ່ານ ດຣ. ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ ພ້ອມດ້ວຍຄະນະ ແລະ ກ່າວຮັບໂດຍຄະນະສູນພັດທະນາຜູ້ເສຍອົງຄະ 489; ຈາກນັ້ນ,ທັງສອງພາກສ່ວນໄດ້ສະແດງຄວາມຂອບໃຈຕໍ່ການຊ່ວຍເຫລືອຄັ້ງນີ້ ພ້ອມທັງຈະນໍາເອົາເຄື່ອງຊ່ວຍເຫລືອດັ່ງກ່າວ ໄປນໍາໃຊ້ໃຫ້ເກີດປະໂຫຍດຫລາຍທີ່ສຸດ.