ຕອນບ່າຍວັນທີ 30 ພະຈິກ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດພິທີເລົ່າມູນເຊື້ອວັນຊາດທີ 2 ທັນວາ ຄົບຮອບ 47 ປີ, ວັນຄ້າຍວັນເກີດຂອງທ່ານປະທານໄກສອນ ພົມວິຫານ ຄົບຮອບ 102 ປີ, ຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງການຈັດງານປະເພນີພາຍໃນແຂວງຜົ້ງສາລີ ໂດຍການເປັນປະທານຂອງທ່ານ ຫຸມເພັງ ຈອມວິສານ ຮອງປະທານ ສພຂ; ເຂົ້າຮ່ວມມີ ບັນດາທ່ານປະທານ, ຮອງປະທານ ຄະນະກໍາມະການ ສພຂ, ຄະນະເລຂາທິການ ສພຂ, ຫົວໜ້າ-ຮອງຂະແໜງ ແລະ ພະນັກງານ-ລັດຖະກອນ ສພຂ ເຂົ້າຮ່ວມ.
ໃນພິທີ ໄດ້ຮັບຟັງທ່ານ ຫຸມເພັງ ຈອມວິສານ ເລົ່າຄືນມູນເຊື້ອ ວັນຊາດທີ 2 ທັນວາ ຄົບຮອບ 47 ປີ (2 ທັນວາ 1975-2 ທັນວາ 2022), ວັນຄ້າຍວັນເກີດຂອງປະທານໄກສອນ ພົມວິຫານ ຄົບຮອບ 102 ປີ (13 ທັນວາ 1920-13 ທັນວາ 2022). ເຊິ່ງທ່ານກໍໄດ້ຍົກໃຫ້ເຫັນເຖິງ ມູນເຊື້ອ, ຄວາມໝາຍສໍາຄັນຂອງວັນຊາດ 2 ທັນວາ; 47 ປີ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດໃນແຕ່ລະໄລຍະກໍຄືການປົກປັກຮັກສາ ແລະ ສ້າງສາພັດທະນາແຂວງຜົ້ງສາລີ; ເລົ່າຄື່ນຊີວິດການເຄື່ອນໄຫວປະຕິວັດ ຂອງປະທານ ໄກສອນ ພົມວິຫານ ແລະ ຜົນງານ, ຄຸນງາມຄວາມດີ ຂອງ ປະທານ ໄກສອນ ພົມວິຫານ; ພ້ອມກັນນັ້ນ, ທ່ານກໍໄດ້ຮຽງຮ້ອງໃຫ້ຄະນະນໍາ-ຄະນະພັກ ສືບຕໍ່ ຊີ້ນໍາ-ນໍາພາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງ ພັກເຂົ້າສູ່ຊີວິດຕົວຈິງ ໂດຍສະເພາະແມ່ນຕ້ອງກໍາແໜ້ນ 9 ໜ້າທີ່ວຽກງານຕົ້ນຕໍ່ ເຊັ່ນ: (1). ສືບຕໍ່ບູລະນະລະບອບ ປະຊາທິປະໄຕ ປະຊາຊົນ, (2). ຍົກລະດັບຄວາມຮູູ້ຄວາມສາມາດ ໃນການປົກປ້ອງອະທິປະໄຕ, (3). ເສີມຂະຫຍາຍທຸກຄວາມອາດສາມາດ ແລະ ທ່າແຮງບົ່ມຊ້ອນ, (4). ສ້າງຖານການຜະລິດ ແລະ ການບໍລິການໃຫ້ເຂັ້ມແຂງ, (5). ພັດທະນາຊັບພະຍາກອນມະນຸດຢ່າງແຂງແຮງ, (6) ປັບປຸງລະບົບການຈັດຕັ້ງ, ກົງຈັກ ແລະ ກົນໄກການເຄື່ອນໄຫວຂອງບັນດາອົງການອໍານາດລັດ ໃຫ້ເຂັ້ມແຂງ ແລະ ມີປະສິດທິຜົນ, (7). ເພີີ່ມທະວີຄວາມເປັນເຈົ້າການປະຕິບັດການພົວພັນຮ່ວມມືກັບ ຕ່າງປະເທດ (8) ເດັດດ່ຽວແກ້ໄຂຈຸດອອ່ນ-ຂໍ້ຄົງຄ້າງພາຍໃນພັກ, (9). ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ. ຄຽງຄູ່ກັນນັ້ນ, ກໍຕ້ອງໄດ້ສືກສາຮໍ່າຮຽນເອົາມູນເຊື້ອດັ່ງກ່າວ ໂດຍສະເພາະ ຮໍ່າຮຽນເອົາແບບຢ່າງຄຸນສົມບັດ, ທາດແທ້ການປະຕິວັດ, ຄວາມຈົ່ງຮັກພັກດີ, ຄວາມເດັດດ່ຽວໜຽວແໜ້ນ ຂອງປະທານ ໄກສອນ ພົມວິຫານ ແລະ ເດັດດ່ຽວຍຶດໝັ້ນຈຸດໝາຍຂອງການປະຕິວັດ ເປັນຕົ້ນ: ຈຸດໝາຍສັງຄົມນິຍົມ ໂດຍການເອົາໃຈໃສ່ ປະຕິບັດສອງໜ້າທະສາດຍຸດທະສາດ (ປົກປັກຮັກສາ ແລະ ສ້າງສາພັດທະນາປະເທດຊາດ); ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ ບົນພື້ນຖານການສ້າງພັນທະພາບ ກໍາມະກອນ, ກະສິກອນ, ນັກຮຽນຮູ້ປັນຍາຊົນ ໃຫ້ແໜ້ນແກ່ນພາຍໃຕ້ການນໍາພາຂອງພັກ; ໄດ້ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການ ສພຂ ຂຶ້ນເຜີຍແຜ່ ຂໍ້ຕົກລົງເຈົ້າແຂວງ ສະບັບເລກທີ 1048/ຂຜລ, ລົງວັນທີ 8 ພະຈິກ 2022 ວ່າດ້ວຍ ການຄຸ້ມຄອງການຈັດງານປະເພນີພາຍໃນແຂວງຜົ້ງສາລີ ເຊິ່ງປະກອບມີ 6 ໝວດ. 20 ມາດຕາ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ