ເພື່ອຜັນຂະຫຍາຍບັນດາມະຕິກອງປະຊຸມຄົບຄະນະ ຄັ້ງທີ 07 ຂອງ ຄະນະບໍລິຫານສູນກາງພັກ ສະໄໝທີ XI ໃນຕອນເຊົ້າວັນທີ 05 ທັນວາ 2023 ທີ່ຫ້ອງປະຊຸມສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ ເຂົ້າຮ່ວມມີ ຮອງປະທານຄະນະປະຈໍາສະພາປະຊາຊົນແຂວງ, ມີບັນດາທ່ານປະທານໃນຄະນະປະຈໍາສະພາປະຊາຊົນແຂວງ; ນອກນີ້ຍັງມີບັນດາທ່ານ ຮອງປະທານ ຄະນະກໍາມະການ, ຄະນະເລຂາທິການ, ຫົວໜ້າ ແລະ ຮອງຫົວໜ້າຂະແໝງ ພ້ອມດ້ວບພະນັກງານວິຊາການທັງໝົດພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ໃຫ້ກຽດເຜີຍແຜ່ເອກະສານໂດຍທ່ານ ກົງແກ້ວ ມີວໍລະຈັກ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ, ທ່ານໄດ້ຍົກໃຫ້ເຫັນເນື້ອໃນຈິດໃຈທິດຊີ້ນໍາ ຕໍ່ບັນຫາສຳຄັນ ຂອງພັກ, ຂອງປະເທດຊາດ ເປັນຕົ້ນ: ການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຕິພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ, ເຊິ່ງເຫັນໄດ້ກ່ຽວກັບຕົວເລກມະຫາພາກຕ່າງໆ ສາມາດບັນລຸໄດ້ຄາດໝາຍເປັນສ່ວນຫຼາຍ, ຄາດຄະເນໝົດປີ 2023 GDP ຈະຂະຕົວໃນລະດັບ 4,2%; ການຈັດເກັບລາຍຮັບງົບປະມານ ບັນລຸຕາມແຜນທີ່ສະພາແຫ່ງຊາດຮັບຮອງ, ອັດຕາແລກປ່ຽນເງິນເຟີ້ຍັງສູງແຕ່ກໍ່ມີທ່າອ່ຽງຫຼຸດລົງ ຈາກ 41,26% ໃນເດືອນກຸມພາ ຫຼຸດລົງມາຢູ່ທີ່ 25,69% ໃນເດືອນກັນຍາ 2023, ການຊໍາລະໝີ້ສິນຕ່າງປະເທດ ປະຕິບັດໄດ້ຕາມແຜນ, ເຖິງຢ່າງໃດກໍ່ຕາມ ເຫັນວ່າຜົນໄດ້ຮັບນັ້ນຫຼາຍດ້ານຍັງບໍ່ທັນໝັກແໜ້ນ ແລະ ໝັ້ນຄົງ, ບັນຫາເຄັ່ງຮ້ອນຕ່າງໆ ຍັງບໍ່ທັນໄດ້ຮັບການແກ້ໄຂຢ່າງຕັ້ງໜ້າ ແລະ ບໍ່ບັນລຸຕາມແຜນການວາງໄວ້ ເປັນຕົ້ນອັດຕາເງິນເຟີ້, ການບໍລິຫານຈັດການປະລິມານເງິນ, ອັດຕາແລກປ່ຽນເງິນຕາຕ່າງປະເທດ, ລາຄາສິນຄ້າ, ການຂາດດຸ່ນຊຳລະ, ຂາດດຸ່ນງົບປະມານ ແລະ ອື່ນໆ, ກອງປະຊຸມຍັງໄດ້ຊີ້ໃຫ້ເຫັນສາເຫດຕົ້ນຕໍ ທັງປັດໄຈໃນຕົວ ແລະ ນອກຕົວ ຂອງການແກ້ໄຂສະພາບຄວາມຫຍຸ່ງຍາກຜ່ານມາ, ແຕ່ອັນທີ່ເປັນພື້ນຖານຍັງແມ່ນການນໍາພາຊີ້ນໍາແກ້ໄຂບັນຫາ ຍັງບໍ່ທັນເດັດຊາດ, ເຂັ້ມງວດ ແລະ ແທດກັບສະພາບບັນຫາຕົວຈິງ, ບັນຫາຄວາມເປັນເຈົ້າການ ແລະ ຄວາມຮັບຜິດຊອບຂອງບາງຂະແໝງການ ແລະ ທ້ອງຖິ່ນບໍ່ທັນສູງ, ລະບຽບແບບແຜນການຄຸ້ມຄອງ-ບໍລິຫານລັດຕາມກົດໝາຍບໍ່ທັນເຂັ້ມງວດ, ຂາດກົນໄກປະສານງານທີ່ກົມກຽວ ແລະ ການເຮັດແທ້ທໍາຈິງ.
ຕໍ່ຈາກນັ້ນກອງປະຊຸມກໍ່ໄດ້ຮັບຟັງ ການປາຖະກະຖາ ວັນມະຫາປະຕິວັດເດືອນຕຸລາລັດເຊຍ ຄົບຮອບ 206 ປີ (7/11/1917-7/11/2023); ວັນເກີດທ່ານ ຟ.ອັງແກນຄົບຮອບ 203 ປີ (28/11/1820-28/11/2023); ສານອວຍພອນ ຂອງພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ 2023 ຈາກທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງ, ພາຍຫຼັງທີ່ໄດ້ຮັບຟັງການປາຖະກະຖາສໍາເລັດແລ້ວ ໂດຍປະຕິບັດຕາມວາລະກອງປະຊຸມ ເພື່ອກະກຽມກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II, ທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ກໍ່ໄດ້ຂຶ້ນ ຜ່ານບັນດາມະຕິ ຂອງຄະນະປະຈໍາສະພາປະຊາຊົນແຂວງ ວ່າດ້ວຍການແຕ່ງຄະນະຊີ້ນໍາ, ບັນດາອະນຸກຳມະການຮັບຜິດຊອບກະກຽມ ແລະ ດຳເນີນກອງປະຊຸມ, ຜ່ານແຜນກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II; ຜ່ານມະຕິ ຂອງຄະນະປະຈຳສະພາປະຊາຊົນແຂວງ ວ່າດ້ວຍການແຕ່ງຕັ້ງຮອງເລຂາທິການສະພາປະຊາຊົນແຂວງ ໂດຍແຕ່ງຕັ້ງ ທ່ານ ຄໍາໝື່ນ ຂັນທະວົງ ເປັນຮອງເລຂາທິການ, ພ້ອມທັງຜ່ານມະຕິ ຂອງຄະນະປະຈໍາສະພາປະຊາຊົນແຂວງ ວ່າດ້ວຍການປັບປຸງ ແລະ ການບັນຈຸສັບຊ້ອນບຸກຄະລາກອນ ຂັ້ນຂະແໜງພາຍໃນສະພາປະຊາຊົນແຂວງ.
ທ້າຍສຸດປະທານກອງປະຊຸມກໍ່ໄດ້ສະຫຼຸບ, ຕີລາຄາ, ພ້ອມທັງຍ້ອງຍໍຊົມເຊີຍຜົນສໍາເລັດ ທີ່ທຸກພາກສ່ວນພາຍໃນສະພາປະຊາຊົນແຂວງ ໄດ້ຮ່ວມແຮງຮ່ວມໃຈສາມັກຄີໃນການຈັດຕັ້ງປະຕິບັດວຽກງານ ສໍາເລັດຕາມແຜນທີ່ວາງໄວ້ ແລະ ມີທິດຊີ້ນໍາ ໃຫ້ແຕ່ລະຄະນະກໍາມະການກະກຽມບັນດາເນື້ອໃນເພື່ອປະກອບຄໍາຄິດເຫັນໃສ່ກອງປະຊຸມສະໄໝສາມັນເທື່ອທີ 06 ຂອງສະພາປະຊາຊົນແຂວງ ຊຸດທີ II ໃຫ້ທັນກັບວັນເວລາທີ່ໄດ້ກໍາໜົດໄວ້.