ກອງປະຊຸມທາບທາມຄຳຄິດເຫັນໃສ່ຮ່າງກົດໝາຍ 03 ສະບັບ ໄດ້ຈັດຂຶ້ນລະຫວ່າງວັນທີ 28-29 ມີນາ 2024 ຜ່ານມານີ້ ທີ່ສະພາປະຊາຊົນແຂວງເຊກອງ ໂດຍການເປັນປະທານຮ່ວມຂອງ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ ແລະ ທ່ານ ປອ ແພງສີ ສີລາວີ ຮອງປະທານຄະນະສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 16, ຮອງປະທານສະພາປະຊາຊົນແຂວງ, ມີບັນດາ ສສຂ ປະຈຳເຂດເລືອກຕັ້ງໃນ 4 ຕົວເມືອງ,ຫົວໜ້າ-ຮອງຫົວໜ້າພະແນກອ້ອມຂ້າງແຂວງເຂົ້າຮ່ວມ.

         ກອງປະຊຸມໄດ້ຮັບຟັງການສະເໜີ ແລະ ຄົນຄວ້າປະກອບຄຳເຫັນຕໍ່ການທາບທາມຮ່າງກົດໝາຍ 03 ສະບັບ ກໍຄືກົດໝາຍວ່າດ້ວຍສະພາແຫ່ງຊາດ,ກົດໝາຍວ່າດ້ວຍສະພາປະຊາຊົນແຂວງ,ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ໂດຍບັນດາຜູ້ແທນກອງປະຊຸມ ໄດ້ເຫັນດີຕໍ່ການປັບປຸງແຕ່ລະກົດໝາຍ ແລະ ສະເໝີໃຫ້ປັບປຸງຄືນເນື້ອໃນບາງມາດຕາທີ່ເຫັນວ່າຍັງບໍ່ທັນຄົບຖ້ວນ,ຕັດອອກ ແລະ ເພີ່ມເຂົ້າເນື້ອໃນບາງມາດຕາ ເພື່ອໃຫ້ມີຄວາມຈະແຈ້ງຊັດເຈນ,ຮັດກຸມ,ສອດຄ່ອງກັບສະພາບຄວາມເປັນຈິງໃນການຈັດຕັ້ງປະຕິບັດ ແລະ ນຳໃຊ້ສູ່ສັງຄົມ.

       ບັນດາຜູ້ແທນ,ສສຊ ແລະ ສສຂ ໄດ້ຕັ້ງໜ້າສຸມໃສ່ປະກອບຄຳຄິດເຫັນຢ່າງຟົດຟື້ນຕໍ່ເນື້ອໃນມາດຕາຕ່າງໆຂອງກົດໝາຍ 03 ສະບັບ ຕາມຄຳຖາມເຈາະຈີ້ມຂອງປະທານກອງປະຊຸມຢ່າງມີຈຸດສຸມ ແລະ ກົງໄປກົງມາ ເພື່ອຮັບປະກັນໃຫ້ແກ່ການເຄື່ອນໄຫວຕາມພາລະບົດບາດ,ສິດ ແລະ ໜ້າທີ່ຂອງສະມາຊິກສະພາໃນໄລຍະໃໝ່.