ຕອນເຊົ້າ ວັນທີ 4 ເມສາ 2024 ທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານສະພາປະຊາຊົນແຂວງ ພ້ອມດ້ວຍຄະນະກໍາມະການ ແລະ ວິຊາການທີ່ກ່ຽວຂ້ອງ ເຂົ້າຮ່ວມກອງປະຊຸມ ການເຜີຍແຜ່ຄໍາແນະນໍາ ກ່ຽວກັບການຈັດກອງປະຊຸມທາບທາມຮ່າງກົດໝາຍ ຈໍານວນ 10 ສະບັບ ເຊິ່ງໄດ້ຈັດຂື້ນໃນຮູບແບບອອນໄລ (video conference) ໂດຍພາຍໃຕ້ການເປັນປະທານຂອງ ທ່ານ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ ມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ພ້ອມດ້ວຍຄະນະກໍາມະການກ່ຽວຂ້ອງ ໃນ 18 ເຂດເລືອກຕັ້ງ ເຂົ້າຮ່ວມ
ໃນກອງປະຊຸມ ໄດ້ຮັບຟັງທ່ານ ບຸນຍົງ ພົນເສນາ ຫົວໜ້າກົມກົດໝາຍ ເຜີຍແຜ່ຄໍາແນະນໍາ ກ່ຽວກັບການຈັດກອງປະຊຸມທາບທາມຮ່າງກົດໝາຍ ຈໍານວນ 10 ສະບັບ ທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX, ໃນນີ້ກົດໝາຍ ຈໍານວນ 5 ສະບັບ ທີ່ກໍາມາທິການກົດໝາຍໄດ້ຮຽບຮຽງສໍາເລັດເພື່ອດໍາເນີນການທາບທາມຢູ່ບັນດາເຂດເລືອກຕັ້ງ ໃຫ້ສໍາເລັດກ່ອນເດືອນ ເມສາ 2024 ປະກອບມີ: ຮ່າງກົດໝາຍວ່າດ້ວຍສະຫະກອນ(ສະບັບສ້າງໃໝ່); ຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ(ສະບັບປັບປຸງ); ຮ່າງກົດໝາຍວ່າດ້ວຍການປົກປັກຮັກສາສີ່ງແວດລ້ອມ(ສະບັບປັບປຸງ); ຮ່າງກົດໝາຍວ່າດ້ວຍການກັນ ແລະ ຄວບຄຸມເຊື້ອເຮສໄອວີ/ພະຍາດເອດ(ສະບັບປັບປຸງ); ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາ(ສະບັບສ້າງໃໝ່). ສໍາລັບຮ່າງກົດໝາຍ, ບົດສະເໜີ, ຄໍາຖາມເຈາະຈີ້ມ ແລະ ເອກະສານທີ່ກ່ຽວຂ້ອງກັບຮ່າງກົດໝາຍອີກ 5 ສະບັບຄື: ຮ່າງກົດ ໝາຍວ່າດ້ວຍການຕ້ານ ແລະ ສະກັດກັ້ນອັກຄີໄພ(ສະບັບປັບປຸງ); ຮ່າງກົດໝາຍວ່າດ້ວຍການທ່ອງທ່ຽວ(ສະບັບປັບປຸງ); ຮ່າງກົດໝາຍວ່າດ້ວຍການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ(ສະບັບປັບປຸງ); ຮ່າງກົດໝາຍວ່າດ້ວຍການສົ່ງເສີມການລົງທຶນ(ສະບັບປັບປຸງ); ແລະ ຮ່າງກົດໝາຍວ່າດ້ວຍອາກອນມູນຄ່າເພີ່ມ(ສະບັບປັບປຸງ). ພາຍຫຼັງສໍາເລັດກອງປະຊຸມກວດກາເນື້ອໃນຮອບດ້ານຂອງຮ່າງກົດໝາຍດັ່ງກ່າວແລ້ວ ກໍາມາທິການກົດໝາຍຈະນໍາສົ່ງໃຫ້ໃນພາຍຫຼັງ
ພາຍຫຼັງໄດ້ຮັບຟັງການເຜີຍແຜ່ຄໍາແນະນໍາ ກ່ຽວກັບການຈັດກອງປະຊຸມທາບທາມຮ່າງກົດໝາຍ ຈໍານວນ 10 ສະບັບ, ທ່ານປະທານກອງປະຊຸມກໍ່ໄດ້ເຈາະຈີ້ມຕໍ່ກອງປະຊຸມ ແລະ ບັນດາທ່ານຜູ້ເຂົ້າໃນແຕ່ລະເຂດເລືອກຕັ້ງ ກໍ່ໄດ້ແລກປ່ຽນປະກອບຄໍາຄິດຄໍາເຫັນຕໍ່ກັບການຈັດຕັ້ງປະຕິບັດການທາບທາມ ຮ່າງກົດໝາຍ 10 ສະບັບ ໂດຍສະເພາະ ການກໍານົດແຜນການ, ໄລຍະເວລາໃນການທາບທາມ, ງົບປະມານ ແລະ ການຈັດສົ່ງບັນດາຮ່າງກົດໝາຍ, ໃຫ້ບັນດາເປົ້າໝາຍທີ່ທາບທາມ.
ຕອນທ້າຍ ກອງປະຊຸມ ປະທານກອງປະຊຸມໄດ້ມີທິດຊີ້ນໍາໃຫ້ບັນດາເຂດເລືອກຕັ້ງໃນທົ່ວປະເທດ ຊີ້ນໍາຄະນະເລຂາທິການ ແລະ ຄະນະກຳມະການ ກະກຽມອອກແຈ້ງການແນະນໍາຂອງຄະນະປະຈໍາສະພາປະຊາຊົນແຂວງ ໂດຍພື້ນຖານແມ່ນອີງໃສ່ຄໍາແນະນໍາຂອງສະພາແຫ່ງຊາດ ເພື່ອຈັດກອງປະຊຸມທາບທາມ ປະກອບຄໍາເຫັນໃສ່ບັນດາຮ່າງກົດໝາຍ ດັ່ງກ່າວ ໃຫ້ສໍາເລັດຕາມແຜນການທີ່ວາງໄວ້
ຂ່າວ ໂດຍ: ສູນທອງ