ຕອນເຊົ້າວັນທີ 3 ເມສາ 2023 ທີ່ຫ້ອງປະຊຸມສະພາປະຊາຊົນແຂວງ ຫຼວງນ້ຳທາ ທ່ານ ສີວິໄລ ປັນແກ້ວ ກຳມະການຄະນະປະຈຳພັກແຂວງ ປະທານກວດກາພັກ-ລັດແຂວງ ແລະ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ຫົວໜ້າ, ຮອງຫົວໜ້າພະແນການ ແລະ ອົງການລັດທຽບເທົ່າແຂວງທີ່ກ່ຽວຂ້ອງແຂວງ ໄດ້ເຂົ້າຮ່ວມກອງປະຊຸມເຜີຍແຜ່ນິຕິກໍາ ກ່ຽວກັບການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທໍາ 04 ສະບັບ ແບບອອນລາຍ ພາຍໃຕ້ການເປັນປະທານຂອງທ່ານ ສຈ.ປອ ຈະເລີນ ເຍຍປາວເຮີ ກຳມະການສູນກາງພັກ ຮອງປະທານສະພາແຫ່ງຊາດ ຜູ້ຊີ້ນຳກຳມາທິການຍຸຕິທຳ.

             ກອງປະຊຸມໄດ້ຮັບຟັງການເຜີຍແຜ່ຄຳແນະນຳ ຂອງຄະນະປະຈຳສະພາແຫ່ງຊາດ ສະບັບເລກທີ 03/ຄປຈ, ລົງວັນທີ 14 ກຸມພາ 2023 ວ່າດ້ວຍ ການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທໍາ ຈໍານວນ 04 ຄຶ: ກົດໝາຍວ່າດ້ວຍສານປະຊາຊົນ ສະບັບປີ 2017, ກົດໝາຍວ່າດ້ວຍການດຳເນີນຄະດີແພ່ງ ສະບັບປີ 2012, ກົດໝາຍວ່າດ້ວຍ ການດຳເນີນຄະດີອາຍາ ສະບັບປີ 2017 ແລະ ກົດໝາຍວ່າດ້ວຍ ອົງການໄອຍະການປະຊາຊົນ ສະບັບປີ 2017 ພ້ອມດຽວກັນ ປະທານກອງປະຊຸມໄດ້ເຈາະຈີ້ມ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດຄໍາແນະນໍາຂອງຄະນະປະຈຳສະພາແຫ່ງຊາດ ວ່າດ້ວຍ ການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທໍາ ຈໍານວນ 04 ສະບັບ, ນອກນັ້ນ ບັນດາຜູ້ແທນກອງປະຊຸມຍັງໄດ້ແລກປ່ຽນປະກອບຄຳຄິດເຫັນຕໍ່ກັບການຈັດຕັ້ງປະຕິບັດກົດໝາຍໃນຂົງເຂດຍຸຕິທຳຢ່າງມີຈຸດສຸມ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດ ແລະ ຮັບປະກັນຄຸນນະພາບສຳເລັດຕາມລະດັບຄາດໝາຍ.