ໃນວັນທີ 8 ກຸມພາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງຫຼວງພະບາງ ໄດ້ຈັດກອງປະຊຸມທາບທາມການປັບປຸງກົດຫມາຍວ່າດ້ວຍ ການແກ້ໄຂຄຳຮ້ອງທຸກ ສະບັບປີ 2016 ໂດຍການເປັນປະທານຂອງທ່ານ ສົມພອນ ສີອຸດົມພັນ ກຳມະການພັກແຂວງ, ຮອງປະທານຄະນະສະມາຊິກແຫ່ງຊາດ ປະຈໍາເຂດເຂດເລືອກຕັ້ງທີ 6 ແຂວງຫລວງພະບາງ, ຮອງປະທານສະພປະຊາຊົນແຂວງ, ເຂົ້າຮ່ວມ ມີ ຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 6 ແຂວງຫຼວງພະບາງ, ສະມາຊິກສະພາປະຊາຊົນແຂວງ, ປະທານ, ຮອງປະທານຄະນະກຳມະການ, ບັນດາທ່ານຕາງຫນ້າບັນດາພະແນກການກ່ຽວຂ້ອງອ້ອມຂ້າງແຂວງ, ຫ້ອງການ, ອົງການ ກ່ຽວຂ້ອງ ຈາກນະຄອນຫລວງພະບາງ, ພ້ອມດ້ວຍພະນັກງານພາຍໃນສະພາປະຊາຊົນແຂວງເຂົ້າຮ່ວມທັງຫມົດ 57 ທ່ານ, ຍິງ 16 ທ່ານ.
ໃນກອງປະຊຸມທ່ານ ສົມພອນ ສີອຸດົມພັນ ໄດ້ກ່າວຄຳເຫັນເປີດກອງປະຊຸມ ເຊິ່ງບາງຕອນ ທ່ານໄດ້ກ່າວວ່າ ຈຸດປະສົງການປັບປຸງກົດໝາຍວ່າດ້ວຍ ການແກ້ໄຂຄໍາຮ້ອງທຸກ ໃນຄັ້ງນີ້ ແມ່ນເພື່ອຜັນຂະຫຍາຍມະຕິ ຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ວ່າດ້ວຍການຄຸ້ມຄອງລັດ ຄຸ້ມຄອງສັງຄົມດ້ວຍກົດຫມາຍ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ແລະ ມະຕິຂອງກົມການເມືອງສູນກາງພັກ ວ່າດ້ວຍການຍົກສູງຄຸນນະພາບ ການດຳເນີນຄະດີຕາມຂະບວນການຍຸຕິທຳ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ໃຫ້ສອດຄ່ອງກັບສະພາບຄວາມເປັນຈິງ ແລະ ຖືກຕ້ອງຕາມທິດຊີ້ນໍາທີ່ໄດ້ກຳນົດໄວ້ໃນສອງມະຕິດັ່ງກ່າວ. ຈາກນັ້ນ ທ່ານ ພອນເລີດ ໄຊຍະນາ ຄະນະປະຈໍາ, ປະທານຄະນະກຳມະການ ຍຸຕິທໍາ ແລະ ປກຊ-ປກສ ສະພາປະຊາຊົນແຂວງ ຂື້ນຜ່ານສະພາບລວມກ່ຽວກັບການຈັດຕັ້ງປະຕິບັດກົດຫມາຍວ່າດ້ວຍການແກ້ໄຂຄໍາຮ້ອງທຸກໃນໄລຍະຜ່ານມາ, ເຫດຜົນ ແລະ ຄວາມຈໍາເປັນຂອງກນປັບປຸງ, ຂະບວນການຄົ້ນຄວ້າປັບປຸງ ແລະ ເນື້ອໃນການປັບປຸງ; ກົດມາຍວ່າດ້ວຍການແກ້ໄຂຄໍາຮ້ອງທຸກສະບັບປັບປຸງໃຫມ່ ປະກອບມີ VIII ພາກ, 04 ຫມວດ ແລະ 53 ມາດຕາ, ໃນນັ້ນປັບປຸງ 27 ມາດຕາ ແລະ ເພີ່ມເຂົ້າໃຫມ່ 02 ມາດຕາ ລວມທັງຫມົດເປັນ 29 ມາດຕາ.

ຈາກນັ້ນ ທ່ານ ສົມພອນ ສີອຸດົມພັນ ໄດ້ມີຄໍາເຫັນເຈາະຈີ້ມ ໃຫ້ຜູ້ເຂົ້າຮ່ວມປະກອບຄໍາຄິດ, ຄໍາເຫັນ ເພື່ອຮັບປະກັນໃຫ້ຂັ້ນຕອນ, ວິທີການ, ກົນໄກ ການຮັບ ແລະ ພິຈາລະນາແກ້ໄຂຄໍາຮ້ອງທຸກໃຫ້ເປັນລະບົບ,ວ່ອງໄວ, ຮັບປະກັນຄວາມຖືກຕ້ອງ ແລະ ເປັນທີ່ສິ້ນສຸດ ຕາມລັດຖະທໍາມະນູນ ແລະ ກົດຫມາຍ ແນໃສ່ປົກປ້ອງສິດ ແລະ ຜົນປະໂຫຍດອັນຊອບທຳ ຂອງພົນລະເມືອງ, ນິຕິບຸກຄົນ ແລະ ການຈັດຕັ້ງ.
ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຄົ້ນຄ້ວາ ແລະ ປະກອບຄໍາຄິດ ຄໍາເຫັນ ຢ່າງກົງໄປກົງມາ ກອງປະຊຸມໄດ້ດຳເນີນເປັນເວລາ 1 ວັນ.