ຕອນແລງ ວັນທີ 10 ສິງຫາ 2022 ນີ້, ສະພາປະຊາຊົນແຂວງ ໄດ້ຈັດກອງປະຊຸມ ຖອດຖອນບົດຮຽນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ,ປະທານສະພາປະຊາຊົນແຂວງ ມີບັນດາທ່ານ ຄະນະປະຈຳ, ຄະນະເລຂາທິການ, ຫົວໜ້າ,ຮອງຫົວໜ້າຂະແໜງ ຕະຫຼອດຮອດພະນັກງານ-ລັດຖະກອນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

          ກອງປະຊຸມ ໄດ້ຮັບຟັງການຜ່ານບົດສະຫຼຸບຖອດຖອນບົດຮຽນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ຈາກ ທ່ານ ສຸກມີໄຊ ສິງບຸນເຮືອງ ຮອງເລຂາທິການສະພາປະຊາຊົນແຂວງ ເຊິ່ງຍົກໃຫ້ເຫັນ ດ້ານດີຜົນງານ, ດ້ານອ່ອນຄົງຄ້າງ ເປັນຕົ້ນ: ດ້ານກະກຽມເນື້ອໃນ, ບໍລິຫານ-ພິທີການ ແລະ ວຽກງານສື່ມວນຊົນຕ່າງໆ ໃນໄລຍະດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ທີ່ເປີດຂຶ້ນ ໃນລະຫວ່າງ ວັນທີ 27-29 ກໍລະກົດ 2022 ຜ່ານມາ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ມີຄໍາຄິດເຫັນ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເພື່ອນຳເອົາບັນດາເນື້ອໃນຈິດໃຈຕ່າງໆ ຖອດຖອນເປັນບົດຮຽນ ນຳໄປປັບປຸງຈັດຕັ້ງປະຕິບັດວຽກງານ ໃນກອງປະຊຸມສະໄໝສາມັນ ເທື່ອຕໍ່ໄປ.

          ຕອນທ້າຍ ປະທານກອງປະຊຸມ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ-ລັດຖະກອນ ພາຍໃນສະພາປະຊາຊົນແຂວງ ທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ແລະ ມີຜົນສຳເລັດຕາມການມອບໝາຍໃນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ມີຜົນສຳເລັດອັນຈົບງາມ; ພ້ອມນັ້ນ, ທ່ານຍັງໄດ້ທັງຮຽກຮ້ອງໃຫ້ພະນັກງານ-ລັດຖະກອນທັງໝົດ ຈົ່ງສືບຕໍ່ຈັດຕັ້ງເສີມຂະຫຍາຍດ້ານດີຜົນງານ,ປັບປຸງແກ້ໄຂບັນຫາ ທີ່ຍັງຄົງຄ້າງ ເປັນຕົ້ນ: ເພີ່ມທະວີຄວາມເປັນເຈົ້າການໃນການກະກຽມເນື້ອໃນກອງປະຊຸມໃຫ້ທັນກຳນົດເວລາ, ກົນໄກການປະສານງານຮ່ວມກັບອົງການປົກຄອງແຂວງ, ຂະແໜງການທີ່ກ່ຽວຂ້ອງໃຫ້ມີຄວາມຄ່ອງຕົວ ແລະ ອື່ນໆ ເພື່ອເປັນບົດຮຽນໃຫ້ແກ່ການດຳເນີນກອງປະຊຸມຄັ້ງຕໍ່ໄປ ໃຫ້ຮັບປະກັນທາງດ້ານເນື້ອໃນທີ່ມີຄຸນນະພາບດີຂື້ນກວ່າເກົ່າ.

                                                                                                                                                                              ຂຽນໂດຍ ນາງ ປຸ້ຍນິຕາ ເພັງມີໄຊ