ຕອນບ່າຍວັນທີ 9 ທັນວາ 2022 ນີ້, ສະພາປະຊາຊົນ ແຂວງຫົວພັນ ໄດ້ນໍາເອົາຊີມັງຈຳນວນ 1ໂຕນລວມມູນຄ່າ1.340.000 ກີບ ( ໜຶ່ງລ້ານສາມແສນສີ່ສິບພັນກີບ) ມອບໃຫ້ອຳນາດການປົກຄອງ ບ້ານນາອ່າງ ເມືອງຊຳເໜືອ ແຂວງຫົວພັນເພື່ອເປັນການປະກອບສ່ວນເຂົ້າໃນການກໍ່ສ້າງຂົວອູ່ຂ້າມນ້ຳຊຳ, ເຊິ່ງຂົວດັ່ງກ່າວ ມີລວງກວ້າງ 1,5 ແມັດ ແລະ ລວງຍາວປະມານ 38 ແມັດ, ຕາງໜ້າກ່າວມອບໂດຍ ທ່ານ ຄຳຟອງ ກົ້ວມີໄຊ ກຳມະການຄະນະປະຈຳ, ເລຂາທິການສະພາປະຊາຊົນ ແຂວງຫົວພັນ ພ້ອມຄະນະ

ແລະ ກ່າວຮັບໂດຍ ແມ່ນ ທ່ານ ບຸນນົງ ພິມມະໂນໄນ ຮອງນາຍບ້ານພ້ອມດ້ວຍຄະນະພັກ, ອົງການຈັດຕັ້ງບ້ານ, ໂອກາດນີ້ທ່ານ ຮອງນາຍບ້ານ ໄດ້ຕາງໜ້າໃຫ້ຄະນະພັກ, ອົງການຈັດຕັ້ງບ້ານ ແລະ ປະຊາຊົນ ບ້ານ ນາອ່າງສະແດງຄວາມຮູ້ບຸນຄຸນ, ຂອບໃຈຢ່າງສູງມາຍັງ ສະພາປະຊາຊົນ ແຂວງຫົວພັນ ທີ່ນຳເອົາຊີມັງມາຊ່ວຍເຫຼືອໃນການກໍ່ສ້າງຂົວໃນຄັ້ງນີ້ ແລະ ຈະນຳໃຊ້ວັດສະດຸດັ່ງກ່າວເຂົ້າໃນການກໍ່ສ້າງຂົວໃຫ້ເກີດຜົນປະໂຫຍດສູງສຸດ,ຖ້າຂົວອູ່ດັ່ງກ່າວຫາກກໍ່ສ້າງສຳເລັດຈະເຮັດໃຫ້ປະຊົນໃນຂົງເຂດນັ້ນເວົ້າລວມ, ເວົ້າສະເພາະປະຊາຊົນພາຍໃນບ້ານມີຄວາມສະດວກຫຼາຍຂຶ້ນ ໄປສູ່ເຂດທຳການຜະລິດຂອງປະຊາຊົນເພື່ອແກ້ໄຂຊີວິດການເປັນຢູ່ໃຫ້ນັບມື້ດີຂຶ້ນ ແລະ ຫວັງຢ່າງຍິ່ງວ່າຕໍ່ໜ້າຍັງຈະໄດ້ຮັບການຊ່ວຍເຫຼືອຈາກພວກທ່ານ ແລະ ຫຼາຍໆ ພາກສ່ວນຕື່ມອີກ.

ພາບ ແລະ ຂ່າວ: ສພຂ ຫົວພັນ