ໃນລະຫວ່າງວັນທີ 27-29 ມີນາ 2023 ນີ້ ສະພາປະຊາຊົນແຂວງ ຫລວງນ້ຳທາ ນຳໂດຍທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການຍຸຕິທຳ ປກຊ-ປກສ ຂອງສະພາປະຊາຊົນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ໂຄງການລົງທຶນຂອງລັດ ແລະ ຕິດພັນກັບ 2 ວາລະແຫ່ງຊາດ ຢູ່ທີ່ຫ້ອງປະຊຸມຂອງຫ້ອງວ່າການເມືອງນາແລ ແຂວງຫລວງນ້ຳທາ ໂດຍໃຫ້ກຽດເຂົ້າຮ່ວມຂອງ ທ່ານ ບຸນປີ ໄລປະເສີດ ກຳມະການພັກແຂວງ ເລຂາພັກເມືອງ, ເຈົ້າເມືອງໆນາແລ , ມີສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ, ຫົວໜ້າ, ຮອງຫົວໜ້າຫ້ອງການ ອ້ອມຂ້າງເມືອງທີ່ກ່ຽວຂ້ອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ຫົວໜ້າ, ຮອງຫົວໜ້າຂະແໜງເຂົ້າຮ່ວມ 23 ຄົນ.

ຈຸດປະສົງໃນການລົງຕິດຕາມກວດກາຄັ້ງນີ້ ເພື່ອຕິດຕາມກວດກາ ກ່ຽວກັບການປະຕິບັດລັດຖະທຳມະນູນ ແລະ ກົດໝາຍ ຂອງອົງການກ່ຽວຂ້ອງຂັ້ນເມືອງໃນຂົງເຂດເສດຖະກິດ, ແຜນການການ ແລະ ການເງິນ, ຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ, ການຈັດຕັ້ງປະຕິບັດໂຄງການ ທີ່ມີຄວາມລ້າຊ້າ, ການປະຕິບັດສັນຍາຢູ່ບັນດາເມືອງ ໃຫ້ມີຄວາມສອດຄ່ອງໂປ່ງໃສ, ສ້າງຜົນປະໂຫຍດໃຫ້ແກ່ປະຊາຊົນບັນດາເຜົ່າ, ຕິດຕາມການຈັດຕັ້ງປະຕິບັເດ 2 ວາລະແຫ່ງຊາດດ້ານເສດຖະກິດ-ການເງິນ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດໂຄງການລົງທືນຂອງລັດ ພ້ອມດຽວກັນ ບັນດາຫ້ອງການທີ່ກ່ຽວຂ້ອງຂອງເມືອງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ຕາມຄຳຖາມເຈາະຈິ້ມຂອງສະພາປະຊາຊົນແຂວງ ເປັນຕົ້ນ: ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2022 ແລະ ທິດທາງແຜນການປີ 2023 ແລະ ໂຄງການລົງທຶນຂອງລັດຢູ່ບັນດາເມືອງ; ໂຄງການລົງທືນຂອງລັດ ຕາມຮ່ວງເງິນຕ່າງໆ ທີ່ໄດ້ຮັບຮອງໂດຍສະພາປະຊາຊົນແຂວງ; ຮັບຟັງການສະເໜີຫາງສຽງຂອງປະຊາຊົນທີ່ປະຊາຊົນສະເໜີກ່ຽວກັບຄຸນນະພາບຂອງໂຄງການ, ຜົນໄດ້ຮັບຂອງໂຄງການຂອງປະຊາຊົນ ແລະ ຮັບຟັງການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂຢາເສບຕິດ ແລະ ການແກ້ໄຂເສດຖະກິດ-ການເງິນຢູ່ບັນດາເມືອງ, ນອກນັ້ນ ຍັງໄດ້ລົງຕິດຕາມກວດກາພື້ນທີ່ຕົວຈິງຂອງໂຄງການລົງທືນຂອງລັດຢູ່ເມືອງ.