ເພື່ອເປັນການຍົກສູງດ້ານຄວາມຮູ້ຄວາມສາມາດ, ສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ຊຸດທີ II, ພະນັກງານເສນາທິການ ໃນການຈັດຕັ້ງປະຕິບັດພາລະບົດບາດ,ສິດ ແລະ ໜ້າທີ່ຂອງຕົນໃຫ້ສຳເລັດຕາມລະດັບຄາດໝາຍ.
ໃນວັນທີ 26-27 ກັນຍາ 2022 ນີ້ ສະພາປະຊາຊົນແຂວງ ໄດ້ສຳເລັດການຝຶກອົບຮົມການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານເລຂານຸການ ແລະ ການລົງຄະແນນສຽງອອນລາຍໃຫ້ແກ່ສະມາຊິກສະພາປະຊາຊົນແຂວງ, ພະນັກງານຊ່ວຍວຽກ ແລະ ພະນັກງານວິຊາການສະພາປະຊາຊົນແຂວງຫລວງນໍ້າທາ ຂຶ້ນທີ່ສະໂມສອນເມືອງວຽງພູຄາ ແຂວງຫລວງນໍ້າທາ ໂດຍໄດ້ຮັບການສະໜັບສະໜູນແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ-CEGGA)
ພາຍໃຕ້ການເປັນປະທານຂອງ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍ ທ່ານ ປອ ສາຍທອງ ພົມມະວົງ ຫົວໜ໊າກົມແຜນການ ແລະ ການລົງທືນກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ, ທ່ານ ຕຽງສະໝອນ ພອນປະເສີດ ກຳມະການພັກແຂວງ ເລຂາພັກເມືອງ, ເຈົ້າເມືອງໆວຽງພູຄາ, ມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງປະຈຳເຂດເລືອກຕັ້ງ 5 ເມືອງ, ພະນັກງານຊ່ວຍວຽກ, ພະນັກງານວິຊາການພາຍໃນສະພາປະຊາຊົນແຂວງ ເຂົ້າຮ່ວມທັງໝົດ 60 ທ່ານ, ຍິງ 20 ທ່ານ.
ກອງປະຊຸມຄັ້ງນີ້ຈະໄດ້ຝຶກອົບຮົມກ່ຽວກັບການຈັດຕັ້ງປະຕິບັດແຜນງົບປະມານ ແລະ ແຜນພັດທະນາເສດຖະກິດ-ສັງຄົມ; ການສ້າງຮ່າງມະຕິກອງປະຊຸມສະພາປະຊາຊົນແຂວງ, ການຮ່າງແຈ້ງການ, ໜັງສືສະເໜີ, ການສ້າງຮ່າງບົດສະຫລຸບ ແລະ ແຜນການເຄື່ອນໄຫວ, ສ້າງຮ່າງບົດລາຍງານ; ບົດຮຽນກ່ຽວກັບວຽກງານເລຂານຸການ; ການນຳໃຊ້ໂປຼແກຼມລົງຄະແນນສຽງແບບອອນລາຍໃນກອງປະຊຸມສະພາປະຊາຊົນແຂວງ ( E- mail, G-Mail sign up )ແລະ ການສະໝັກຊື່ເຂົ້າໃຊ້ບັນຊີ Google ( google account ), ການລົງຄະແນນສຽງແບບອອນລາຍ, ແນະນໍາກ່ຽວກັບການນຳໃຊ້ລະບົບຈັດເກັບ ແລະ ຄົ້ນຫາເອກະສານຂອງສະພາປະຊາຊົນແຂວງ ( Electronic document ) ພ້ອມນັ້ນບັນດາທ່ານນັກສຳມະນາກອນໄດ້ສົນທະນາແລກປ່ຽນ, ປະກອບຄຳຄິດເຫັນ ແລະ ຖອດຖອນບົດຮຽນ ເພື່ອສ້າງຄວາມເຂົ້າໃຈຕໍ່ກັບບັນດາຫົວຂໍ້ຕ່າງໆ ແລະ ນັກວິທະຍາກອນໄດ້ອະທິບາຍຊີ້ແຈງໃຫ້ຄວາມກະຈ່າງແຈ້ງຕໍ່ກັບຄຳຄິດເຫັນຕ່າງໆ ແລະ ກອງປະຊຸມຝຶກອົບຮົມໄດ້ດຳເນີນມາເປັນເວລາ 2 ວັນເຕັມດ້ວຍຜົນສຳເລັດອັນຈົບງາມ.
