ທີ່ຫ້ອງປະຊຸມສະພາປະຊາຊົນແຂວງ ຫລວງນ້ຳທາ ໄດ້ຈັດພິທີມອບ-ຮັບ ແລະ ຝຶກອົບຮົມກ່ຽວກັບການຄຸ້ມຄອງ, ນຳໃຊ້ເວັບໄຊ໌ທາງການ ແລະ ໂປຣແກຣມລົງຄະແນນສຽງໃນກອງປະຊຸມສະພາປະຊາຊົນແຂວງ ຂຶ້ນຢ່າງເປັນທາງການໃນຕອນເຊົ້າວັນທີ 15 ກໍລະກົດ 2022 ພາຍໃຕ້ການເປັນປະທານຂອງທ່ານ ມີໄຊ ມີວິໄລ ກຳມະການຄະນະປະຈຳ ເລຂາທິການສະພາປະຊາຊົນແຂວງ  ແລະ ການເປັນປະທານຮ່ວມຂອງທ່ານ ພູນແກ້ວ ເຫລົ່າອີນ ກຳມະການພັກແຂວງ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານ-ວິຊາການທັງສອງພາກສ່ວນທີ່ກ່ຽວຂ້ອງ ພາຍໃນສະພາປະຊາຊົນແຂວງແລະ ພະແນກເຕັກໂນໂລຊີ ແລະ ການສື່ສານແຂວງ ເຂົ້າຮ່ວມ 20 ກວ່າທ່ານ.

ໃນພິທີໄດ້ຮັບຟັງຂໍ້ຕົກລົງຂອງຄະນະເລຂາທິການ ສະພາປະຊາຊົນແຂວງຫລວງນ້ຳທາເລກທີ 427/ຄລຂ.ສພຂ, ລົງວັນທີື13 ກໍລະກົດ 2022 ວ່າດ້ວຍການອານຸມັດຈັດພິທີມອບ-ຮັບ ແລະ ຝຶກອົບຮົມກ່ຽວກັບການຄຸ້ມຄອງ, ນຳໃຊ້ເວັບໄຊ໌ທາງການ ແລະ ໂປຣແກຣມລົງຄະແນນສຽງໃນກອງປະຊຸມສະພາປະຊາຊົນແຂວງ;

ທ່ານ ມີໄຊ ມີວິໄລ ກຳມະການຄະນະປະຈຳ ເລຂາທິການສະພາປະຊາຊົນແຂວງ ໄດ້ກ່າວເປີດກອງປະຊຸມຢ່າງເປັນທາງການ ກ່ອນອື່ນທ່ານໃຫ້ຮູ້ເຖີງຄວາມໝາຍຄວາມສຳຄັນຂອງວຽກງານໄອທີ ຕໍ່ກັບການໜູນໃຊ້ເຂົ້າໃນຈັດຕັ້ງປະຕິບັດວຽກງານ ແລະ ຮຽກຮ້ອງໃຫ້ນັກສຳມະນາກອນທຸກທ່ານຈົ່ງຕັ້ງໃຈຮັບຟັງ, ຮ່ຳຮຽນເອົາຄວາມຮູ້ກ່ຽວກັບວຽກງານໄອທີຈາກນັກສຳມະນາກອນ, ເຮັດໃຫ້ພິທີຝຶກອົບຮົມໄດ້ຮັບຜົນສຳເລັດຕາມຄາດໝາຍ ເພື່ອນຳເອົາໂປຣແກຣມລົງຄະແນນສຽງໃນກອງປະຊຸມ ໜູນໃຊ້ເຂົ້າໃນກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງ ທີ່ຈະໄຂຂຶ້ນໃນຕໍ່ໜ້າ; ໂອກາດດຽວກັນ ທ່ານ ພູນແກ້ວ ເຫລົ່າອີນ ກຳມະການພັກແຂວງ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ໄດ້ມີຄຳເຫັນກ່າວມອບໂປແກຣມລົງຄະແນນສຽງໃນກອງປະຊຸມ ແລະ ກ່າວຮັບຂອງທ່ານ ມີໄຊ ມີວິໄລ ກຳມະການຄະນະປະຈຳ ເລຂາທິການສະພາປະຊາຊົນແຂວງ ແລະ ໄດ້ເຊັນບົດບັນທຶກຮ່ວມມອບ-ຮັບໂປຣແກຣມການລົງຄະແນນສຽງ ເພື່ອນຳໃຊ້ໂປຣແກຣມຢ່າງເປັນທາງການ.

ວາລະດຽວກັນ ນັກວິທະນາກອນ ແລະ ນັກສຳມະນາກອນ ໄດ້ຮ່ວມຝຶກອົບຮົມໃນຫົວຂໍ້ກ່ຽວກັບ ການຄຸ້ມຄອງ ແລະ ນຳໃຊ້ເວບໄຊ໌ ທາງການຂອງສະພາປະຊາຊົນແຂວງ ແລະ  ໃນຫົວຂໍ້ການຕິດຕັ້ງ ແລະ ນຳໃຊ້ໂປຣແກຣມລົງຄະແນນສຽງ, ການລົງທະບຽນແບບອອນລາຍ ໃນກອງປະຊຸມສະພາປະຊາຊົນແຂວງ ນັ້ນ ນັກສຳມະນາກອນ ຍັງໄດ້ປະຕິບັດຕົວຈິງ ແລະ ແລກປ່ຽນສົນທະນາເຊິ່ງກັນ ແລະ ກັນຢ່າງເປັນຂະບວນຟົດຟື້ນ ເພື່ອນຳເອົາຄວາມຮູ້ທີ່ໄດ້ຮຽນມາໜູນໃຊ້ເຂົ້າໃນການຈັດຕັ້ງປະຕິບັດວຽກງານໃຫ້ໄດ້ຮັບຜົນປະໂຫຍດສູງສຸດ ແລະ ພິທີຝຶກອົບຮົມໄດ້ປິດລົງໃນວັນດຽວກັນດ້ວຍຜົນສຳເລັດຕາມຄາດໝາຍ.

ໂດຍ: ວັນນີ ແຝງບົວວັນ