ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ໄດ້ໄຂຂຶ້ນຢ່າງເປັນທາງການ ເລີ່ມແຕ່ ວັນທີ 29 ຫາ 31 ສິງຫາ 2023 ຢູ່ທີ່ຫ້ອງປະຊຸມໃຫຍ່ຫ້ອງວ່າການແຂວງວຽງຈັນ ໂດຍການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນ, ກອງປະຊຸມໄດ້ເປັນກຽດຢ່າງສູງຂໍ້ານັບຮັບຕ້ອນການເຂົ້າຮ່ວມຂອງທ່ານ ຄໍາພັນ ສິດທິດໍາພາ ກໍາມະການສູນກາງພັກ ເລຂາພັກແຂວງ, ເຈົ້າແຂວງ ແຂວງວຽງຈັນ, ທ່ານ ສຈ. ປອ ຈະເລີນ ເຢຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ, ມີທ່ານຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ, ຄະນະປະຈໍາພັກແຂວງ, ກຳມະການພັກແຂວງ, ສະມາຊິກສະພາແຫ່ງຊາດ ຊຸດທີ VII ປະຈຳເຂດເລືອກຕັ້ງທີ 10, ສະມາຊິກສະພາປະຊາຊົນແຂວງວຽງຈັນ, ເຈົ້າເມືອງ-ຮອງເຈົ້າເມືອງ, ຫົວໜ້າພະແນກການ, ອົງການ, ກົມກອງ, ອາດີດຄະນະ ສສຊ-10, ອາດີດການນໍາຂອງແຂວງ ເຂົ້າຮ່ວມທັງໝົດ 84 ທ່ານ, ຍິງ 12 ທ່ານ.
ກອງປະຊຸມໄດ້ພິຈາລະນາ, ຮັບຮອງເອົາບັນຫາສໍາຄັນທີ່ເປັນພື້ນຖານຂອງແຂວງ ດັ່ງນີ້:
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ຂອງສະພາປະຊາຊົນແຂວງວຽງຈັນ ຊຸດທີ II;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງສະພາປະຊາຊົນແຂວງວຽງຈັນ ຊຸດທີ II;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023;
- ພິຈາລະນາ, ຮັບຮອງເອົາການສະເໜີແຕ່ງຕັ້ງ ຫົວໜ້າພະແນກການຂັ້ນແຂວງ ແລະ ເຈົ້າເມືອງ ຕາມການສະເໜີຂອງທ່ານເຈົ້າແຂວງ ແຂວງວຽງຈັນ;
- ພິຈາລະນາ, ຮັບຮອງເອົາບົດລາຍງານການຈັດຕັ້ງປະຕິບັດວຽກງານ ໄລຍະກາງສະໄໜຂອງແຜນການ 5 ປີ (2021-2025) ທິດທາງແຜນການທ້າຍສະໄໜ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງວຽງຈັນ.
- ການຈັດຕັ້ງປະຕິບັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງວຽງຈັນ.
ນອກຈາກໄດ້ຮັບຮອງເອົາບັນດາມະຕິທີ່ໄດ້ກ່າວມານີ້ ກອງປະຊຸມຍັງໄດ້ຮັບຟັງ ການອະທິບາຍຊີ້ແຈງບັນຫາ ທີ່ສະມາຊິກສະພາປະຊາຊົນແຂວງໄດ້ຕັ້ງຂຶ້ນ ຈາກຂະແໜງການທີ່ກ່ຽວຂ້ອງ ເຊິ່ງການອອກມະຕິກອງປະຊຸມຄັ້ງນີ້ ຈະເປັນນິຕິກໍາພື້ນຖານ ເພື່ອໃຫ້ອົງການປົກຄອງແຂວງ ສືບຕໍ່ນໍາພາ-ຊີ້ນໍາ ບັນດາຂະແໜງການ ພ້ອມທັງປຸກລະດົມປະຊາຊົນລາວບັນດາເຜົ່າຊາວແຂວງວຽງຈັນ ສູ້ຊົນຜ່ານຜ່າຂໍ້ຫຍຸ້ງຍາກທາງດ້ານເສດຖະກິດ-ການເງິນ, ສືບຕໍ່ຈັດຕັ້ງປະຕິບັດບັນດານະໂຍບາຍ, ມາດຕະການທາງດ້ານເສດຖະກິດ-ສັງຄົມ ໃຫ້ມີປະສິດທິຜົນ ເພື່ອແກ້ໄຂສິ່ງອຸດຕັນໃນການຄຸ້ມຄອງ ແລະ ບໍລິຫານລັດ ໃນຂະແໜງການຕ່າງໆ ໃຫ້ມີຄວາມໂລ່ງລ່ຽນ ຕາມກົດໝາຍກໍານົດໄວ້.
ນອກຈາກນີ້, ໃນໄລຍະດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ມີປະຊາຊົນບັນດາເຜົ່າສົ່ງຄໍາຄິດ ຄໍາເຫັນ, ຄໍາສະເໜີຜ່ານໂທລະສັບສາຍດ່ວນ (023 156) ຈໍານວນ 6 ເນື້ອໃນ.
ອີກເທື່ອໜຶ່ງ ຕາງໜ້າຄະນະປະຈໍາສະພາປະຊາຊົນແຂວງວຽງຈັນ, ຂ້າພະເຈົ້າຂໍສະແດງຄວາມຂອບໃຈມາຍັງບັນດາທ່ານພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ ແລະ ປະຊາຊົນລາວບັນດາເຜົ່າທົ່ວແຂວງວຽງຈັນ ທີ່ໄດ້ຕິດຕາມການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງວຽງຈັນ ຊຸດທີ II ຄັ້ງນີ້.
( ພາບ-ຂ່າວ : ບູລາຕີ ແສນທະວົງ ແລະ ຄໍາພັນ ໄຊຍະປະທຸມ )