ໃນລະຫວ່າງວັນທີ 06-07 ພຶດສະພາ 2024 ສະພາປະຊາຊົນແຂວງ ໄດ້ຈັດກອງປະຊຸມທາບທາມຄໍາຄິດເຫັນໃສ່ຮ່າງປັບປຸງກົດໝາຍ 05 ສະບັບ ເພື່ອນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 07 ຂອງສະພາແຫ່ງຊາດ ຊຸດທີ IX ພິທີດັ່ງກ່າວໄດ້ຈັດຂຶ້ນທີ່ຫ້ອງປະຊຸມ ສະພາປະຊາຊົນແຂວງ ສະຫວັນນະເຂດ ໂດຍການເປັນປະທານຂອງ ທ່ານ ກົງແກ້ວ ມີວໍລະຈັກ ຮອງເລຂາບໍລິຫານພັັກແຂວງ, ປະທານສະພາປະຊາຊົນແຂວງ; ມີບັນດາທ່ານ ສສຊ ປະຈໍາເຂດເລືອກຕັ້ງທີ 13, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ-ນະຄອນ, ອົງການຈັດຕັ້ງມະຫາຊົນ, ຜູ້ຕາງໜ້າຈາກພະແນກການທີ່ກ່ຽວຂ້ອງກັບຮ່າງກົດໝາຍ, ພ້ອມດ້ວຍພະນັກງານ-ລັດຖະກອນ ສພຂ ມີຜູ້ເຂົ້າຮ່ວມທັງໝົດ 40 ທ່ານ ຍິງ 12 ທ່ານ.
ພາຍຫຼັງທີ່ທ່ານປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການແລ້ວ ໄດ້ມອບໃຫ້ຄະນະຮັບຜິດຊອບ ຂຶ້ນສະເໜີຮ່າງກົດໝາຍ 5 ສະບັບຄື: ຮ່າງກົດໝາຍວ່າດ້ວຍສະຫະກອນ( ສະບັບສ້າງໃໝ່);ຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ (ສະບັບປັບປຸງ);ຮ່າງກົດໝາຍວ່າດ້ວຍການປົກປັກຮັກສາສິ່ງແວດລ້ອມ (ສະບັບປັບປຸງ);ຮ່າງກົດໝາຍວ່າດ້ວຍການກັນ ແລະ ຄວບຄຸມເຊື້ອເຮສໄອວີ/ພະຍາດເອດ ( ສະບັບປັບປຸງ);ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາ ( ສະບັບສ້າງໃໝ່); ກົດໝາຍທີ່ນຳມາທາບທາມໃນຄັ້ງນີ້ ມີຄວາມສຳຄັນ ແລະ ມີຄວາມໝາຍຫຼາຍ ຕໍ່ກັບການຂະຫຍາຍຕົວຂອງເສດຖະກິດ-ສັງຄົມໃນປະຈຸບັນ; ເພື່ອກົດໝາຍດັ່ງກ່າວມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ ເເນໃສ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ.
ພ້ອມດຽວກັນນີ້ກໍ່ໄດ້ສະເໜີໃຫ້ຜູ້ແທນກອງປະຊຸມຄົ້ນຄວ້າ ແລກປ່ຽນຄໍາຄິດຄໍາເຫັນ, ຢ່າງມີຈຸດສຸມສອດຄ່ອງກັບສະພາບຕົວຈິງ, ເຊິ່ງໃນໄລຍະກອງປະຊຸມມີຜູ້ແທນປະກອບຄໍາເຫັນທັງໝົດ 30 ເທື່ອທ່ານ, ຍິງ 12 ເທື່ອທ່ານ, ກອງປະຊຸມຄັ້ງນີ້ເຫັນໄດ້ເຖິງຄວາມເອົາໃຈໃສ່ ແລະ ເປັນເຈົ້າການຂອງບັນທ່ານ ສສຊ ແລະ ສສຂ, ບັນດາທ່ານຜູ້ແທນກອງປະຊຸມ ໃນການຄົ້ນຄວ້າປະກອບຄຳເຫັນຕໍ່ບັນດາເນື້ອໃນຮ່າງກົດໝາຍ ດ້ວຍລັກສະນະສ້າງສັນ, ຢ່າງຖີ່ຖ້ວນ ແລະ ເລິກເຊິ່ງ ດ້ວຍຄວາມຮັບຜິດຊອບສູງ ຈຶ່ງເຮັດໃຫ້ກອງປະຊຸມ ໄດ້ສິ້ນສຸດລົງດ້ວຍຜົນສໍາເລັດຢ່າງຈົບງາມ.