(ສພຊ) – ວັນທີ 12 ທັນວານີ້, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ IX ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ເພັດ ພົມພິພັກ ລັດຖະ ມົນຕີກະຊວງແຜນການ ແລະ ການລົງທຶນ ໄດ້ສະເໜີໂດຍຫຍໍ້ກ່ຽວກັບການສະເໜີປັບປຸງມາດຕາ 18 ຂອງກົດໝາຍວ່າດ້ວຍການລົງທຶນຂອງລັດ ສະບັບເລກທີ 72/ສພຊ, ລົງວັນທີ 15 ທັນວາ 2015 ເຊິ່ງເປັນການຜັນຂະຫຍາຍເນື້ອໃນຈິດໃຈຂອງກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ໃນຄັ້ງວັນທີ 28 ພະຈິກຜ່ານມາ ແລະ ການປຶກ ສາຫາລື ແລະ ປະກອບຄຳເຫັນຂອງສະມາຊິກສະພາແຫ່ງຊາດ ໂດຍອີງໃສ່ສະພາບການເໜັງຕີງຂອງອັດຕາແລກປ່ຽນເງິນຕາ, ລາຄາສິນຄ້າ-ອຸປະກອນການກໍ່ສ້າງຕ່າງໆ; ລັດຖະບານ ຈຶ່ງໄດ້ມີໜັງສືສະເໜີສະບັບເລກທີ 120/ລບ, ລົງວັນທີ 6 ທັນວາ 2024 ຫາ ສະພາແຫ່ງຊາດ ພິຈາລະນາອະນຸມັດໃຫ້ສະພາປະຊາຊົນຂັ້ນແຂວງ (ສພຂ) ເປັນຜູ້ພິຈາລະນາອະ ນຸມັດໂຄງການລົງທຶນຂອງລັດ ຈາກມູນຄ່າຊາວຕື້ກີບລົງມາ ຂຶ້ນເປັນຫ້າສິບຕື້ກີບລົງມາ ໂດຍຕິດພັນກັບມາດຕາ 18 ໂຄງ ການລົງທຶນຂອງລັດລົງທຶນປົກກະຕິ ໄດ້ກຳນົດເປັນ 5 ປະເພດການລົງທຶນຄື:

1. ໂຄງການລົງທຶນຂອງລັດປະເພດ I ແມ່ນໂຄງການທີ່ມີມູນຄ່າຫຼາຍກວ່າສີ່ຮ້ອຍຕື້ກີບຂຶ້ນໄປ, ໄລຍະປະຕິບັດໂຄງການບໍ່ເກີນເຈັດປີ;

2. ໂຄງການລົງທຶນຂອງລັດປະເພດ II ແມ່ນໂຄງການທີ່ມີມູນຄ່າຫຼາຍກວ່າສອງຮ້ອຍຕື້ຫາສີ່ຮ້ອຍຕື້ກີບ, ໄລ ຍະປະຕິບັດໂຄງການບໍ່ເກີນຫົກປີ;

3. ໂຄງການລົງທຶນຂອງລັດປະເພດ III ແມ່ນໂຄງການທີ່ມີມູນຄ່າຫຼາຍກວ່າໜຶ່ງຮ້ອຍຕື້ຫາສອງຮ້ອຍຕື້ກີບ, ໄລ ຍະປະຕິບັດໂຄງການບໍ່ເກີນຫ້າປີ;

4. ໂຄງການລົງທຶນຂອງລັດປະເພດ IV ແມ່ນໂຄງການທີ່ມີມູນຄ່າຫຼາຍກວ່າຊາວຕື້ຫາໜຶ່ງຮ້ອຍຕື້ກີບ, ໄລຍະປະຕິບັດໂຄງການບໍ່ເກີນສີ່ປີ;

5. ໂຄງການລົງທຶນຂອງລັດປະເພດ V ແມ່ນໂຄງການທີ່ມີມູນຄ່າແຕ່ຊາວຕື້ກີບລົງມາ, ໄລຍະປະຕິບັດໂຄງ ການບໍ່ເກີນສາມປີ.

ແຕ່ອີງໃສ່ສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ຂີດຄວາມສາມາດທາງດ້ານງົບປະມານໃນປັດຈຸບັນ, ລັດຖະບານ ກໍຄືຄະນະປະຈຳສະພາແຫ່ງຊາດ ເອກະພາບກັນເພື່ອສະເໜີຕໍ່ກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ພິຈາລະນາຍົກມູນຄ່າການລົງທຶນປະເພດທີ V ຈາກຊາວຕື້ກີບ ເປັນຫ້າສິບຕື້ກີບ; ສະນັ້ນ, ຈຶ່ງມີຄວາມຈໍາເປັນທີ່ຕ້ອງໄດ້ພິຈາລະນາດັດແກ້ບາງມາດຕາເປັນອັນສະເພາະ ເຊິ່ງໃນກໍລະນີມາດຕາດັ່ງກ່າວຖືກຮັບຮອງ ແມ່ນຈະຖືກຈັດຕັ້ງປະຕິບັດໃນປີ 2025 ເປັນຕົ້ນໄປ. ສ່ວນການປັບປຸງມາດຕາອື່ນໆ ຫຼື ການປັບປຸງກົດໝາຍດັ່ງກ່າວ, ກະຊວງແຜນການ ແລະ ການລົງທຶນ ຍັງຈະສືບຕໍ່ຄົ້ນຄວ້າ ແລະ ນໍາສະເໜີຕໍ່ສະພາແຫ່ງຊາດໃນຄັ້ງຕໍ່ໄປ.