ຕອນເຊົ້າວັນທີ 6 ມິຖຸນາ 2023 ທີ່ສະພາປະຊາຊົນແຂວງຄໍາມ່ວນ ຈັດພິທີປາຖະກະຖາວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 64 ປີ (18/5/1959-18/5/2023) ແລະ ວັນວິລະກໍາໂຕນຄຸກຢ່າງມະຫັດສະຈັນຂອງຜູ້ນໍາພັກ ແລະ ຜ່ານເອກະສານຂໍ້ຕົກລົງຂອງເຈົ້າແຂວງຄໍາມ່ວນ ວ່າດ້ວຍການຄຸ້ມຄອງ ແລະ ຈັດສັນຄວາມເປັນລະບຽບຮຽບຮ້ອຍຂອງເມືອງທ່າແຂກ ໂດຍການເປັນປະທານຮ່ວມຂອງ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ແລະ ທ່ານ ນາງ ສາທິດ ຈັນສີ ຄະນະປະຈໍາສະພາປະຊາຊົນແຂວງ ເປັນກຽດເຂົ້າຮ່ວມມີ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ຄະນະກຳມະການ, ຄະນະເລຂາທິການ, ຫົວໜ້າຂະແໜງ-ຮອງຫົວໜ້າຂະແໜງ ແລະ ພະນັກງານພາຍໃນສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ນາງ ສາທິດ ຈັນສີ ກໍໄດ້ໃຫ້ກຽດຫວນຄືນມູນເຊື້ອນ້ຳໃຈພິລະອາດຫານ ອົງອາດກ້າແກ່ນ ເດັດດ່ຽວໜຽວແໜ້ນ ແລະ ມີພິກໄຫວອັນສະຫລາດສ່ອງໃສຂອງພະນັກງານ-ນັກຮົບກອງພັນທີ 2 ພາຍໃຕ້ການນຳພາຂອງພັກປະຊາຊົນ ປະຕິວັດລາວ ທີ່ບໍ່ຍອມຈຳນົນຕໍ່ພວກຈັກກະພັດອາເມລິກາຜູ້ມາຮຸກຮານ ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງ ຂອງກຳລັງປະກອບອາວຸດ ທີ່ຢູ່ພາຍໃຕ້ການນຳພາຂອງພັກ ເຊິ່ງເປັນເຫດການປະຫວັດສາດອັນສຳຄັນຂອງຊາດ ທີ່ສາມາດທັບມ້າງກົນອຸບາຍຂອງພວກຈັກກະພັດ ແລະ ລູກແລ່ງຕີນມືຂອງພວກເຂົາ ທີ່ຫວັງດັບມ້າງກຳລັງປະຕິວັດ ໂດຍສະເພາະແມ່ນກອງພັນທີ 2 ນີ້ແມ່ນບົດຮຽນອັນລ້ຳຄ່າໃຫ້ແກ່ຂະບວນການຕໍ່ສູ້ຂອງກອງທັບ. ໃນໂອກາດດຽວກັນນີ້ ທ່ານ ຍັງໄດ້ຍົກໃຫ້ເຫັນເຖິງມູນເຊື້ອວິລະກຳໂຕນຄຸກ ຢ່າງມະຫັດສະຈັນຂອງບັນດາທ່ານຜູ້ນຳພັກ ແລະ ແນວລາວຮັກຊາດ ຍ້ອນການນຳພາອັນສະຫຼາດສ່ອງໃສ ແລະ ນ້ຳໃຈຮັກຊາດອັນແຮງກ້າຂອງບັນດາທ່ານຜູ້ນຳເຮົາ ທີ່ມີຄວາມກ້າຫານ, ຕັດສິນໃຈຕໍ່ສູ້ຢ່າງມີຄວາມປີຊາສາມາດ ແລະ ສາມາດຂົນຂວາຍ ສຶກສາອົບຮົມສາລະວັດທະຫານ ໃຫ້ມີນ້ຳໃຈຮັກຊາດອັນດູດດື່ມ ມີຄວາມຕື່ນຕົວ ເຮັດໃຫ້ສັດຕູກາຍເປັນມິດສະຫາຍ ຮ່ວມຕາຍນຳກັນ ຈົນສາມາດໂຕນຄຸກໄດ້ຢ່າງມະຫັດສະຈັນ. ນີ້ແມ່ນເຫດການສຳຄັນ ທັງເປັນການສຶກສາອົບຮົມໃຫ້ພະນັກງານ-ສະມາຊິກພັກ ແລະ ນັກຮົບ ເຊື່ອມຊຶມກຳແໜ້ນມູນເຊື້ອດັ່ງກ່າວ ເປັນບົດຮຽນ ແລະ ເປັນພື້ນຖານໃຫ້ແກ່ການຝຶກຝົນຫຼໍ່ຫຼອມຕົນເອງ ໃຫ້ມີຄຸນທາດການເມືອງ ມີຄຸນສົມບັດ ສິນທຳປະຕິວັດ ແລະ ໃຫ້ກາຍເປັນພະນັກງານ-ນັກຮົບຮຸ່ນສືບທອດທີ່ດີໃນອະນາຄົດ.

ໂດຍ: ເອື້ອ ມະໂນສິງ .