ສະພາປະຊາຊົນແຂວງຫົວພັນ ເປີດກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດໃນລະຫວ່າງວັນທີ 31 ກໍລະກົດ – ວັັນທີ 1 ສິງຫາ2023 ຢູ່ທີ່ຫ້ອງປະຊຸມ ຂອງພະແນກແຜນການ ແລະ ການລົງທຶນແຂວງ ໂດຍການເປັນປະທານຮ່ວມ ຂອງ ທ່ານ ຄຳແພງ ວິລະ ພັນກຳມະການຄະນະປະຈຳ, ປະທານກຳມາທິການຍຸຕິທຳ, ສະມາຊິກສະພາແຫ່ງຊາດປະຈຳເຂດເລືອຕັ້ງທີ 8 ແຂວງຫົວພັນ ແລະ ທ່ານ ນາງ ອໍາໄພວອນ ລ້ອມບຸນແພງ ປະທານ ຄະນະສະມາຊິກ ສະພາແຫ່ງຊາດ ປະຈໍາເຂດ 8 ແຂວງຫົວພັນ, ປະທານ ສະພາປະຊາຊົນແຂວງ ມີບັນດາທ່ານການນໍາ, ອະດີດ ການນຳ ພັກ-ລັດ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ອາດີດສະມາຊິກສະພາແຫ່ງຊາດ, ສະມາຊິກພາປະຊາຊົນແຂວງປະຈຳເຂດເລືອກຕັ້ງ, ຫົວໜ້າພະແນກການ, ອົງການທຽບເທົ່າຂັ້ນແຂວງ, ສອງກອງບັນຊາ, ເຈົ້າເມືອງ 10 ເມືອງ ແລະ ວິຊາການ ສະພາແຫ່ງຊາດ ແລະ ສະພາປະຊາຊົນແຂວງ ຈາກສູນກາງ ແລະ ທ້ອງຖິ່ນ ທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງບົດປະເມີນການຈັດຕັ້ງປະຕິບັດກົດໝາຍ 4 ສະບັບຄື:ບົດປະເມີນການຈັດຕັ້ງປະຕິບັດກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ, ບົດປະເມີນກົດໝາຍ ວ່າດ້ວຍ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ແລະ ຮັບຟັງບົດປະເມີນການຈັດຕັ້ງປະຕິບັດກົດໝາຍ ວ່າດ້ວຍການຕິດຕາມກວດກາ ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ;

ຈາກນັ້ນຜູ້ເຂົ້້າຮ່ວມກອງປະຊຸມໄດ້ພ້ອມກັນສຸ່ມໃສ່ປະກອບຄໍາຄິດເຫັນຕໍ່ກັບ ຈຳນວນ ກົດໝາຍ 4 ສະບັບ ໃນຂົງເຂດສະພາແຫ່ງຊາດ ແຕ່ລະໝວດແຕ່ລະມາດຕາ ຕາມຄໍາຖາມເຈາະຈິ້ມຂອງທ່ານປະທານ ຢ່າງມີຈຸດສຸມ ເພື່ອຮັບປະກັນໃຫ້ແກ່ການເຄື່ອນໄຫວ ຕາມພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງໃນໄລຍະ   ໃໝ່ສາມາດຈັດຕັ້ງປະຕິບັດວຽກງານໃຫ້ມີປະສິດທິຜົນສູງກວ່າເກົ່າ ເເນໃສ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃຫ້ສູງຂຶ້ນ.

ພາບຂ່າວ: ເວີນ ແກ້ວບຸນມີ