ໃນຕອນເຊົ້າວັນທີ 21 ມິຖຸນາ 23 ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ, ມີ ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງຢ້ຽມຢາມສູນສອບເສັງ ປະຈຳສົກຮຽນ 2022-2023 ຢູ່ສູນສອບເສັງ ມ.ສ ທົ່ງມັ່ງ ເມືອງໄຊທານີ ນວ, ໂດຍການຕ້ອນຮັບຂອງ ທ່ານ ບຸນທັນ ແສງມະນີ, ຮອງຫົວໜ້າພະແນກສຶກສາທິການ ແລະ ກິລາ ນວ ພ້ອມດ້ວຍ ຫົວໜ້າຫ້ອງການສຶກສາເມືອງ, ຜູ້ອຳນວຍການໂຮງຮຽນ ມສ ທົ່ງມັ່ງ, ມສ ຫາດກ້ຽງ, ມສ ພວງໄຊ ແລະ ຄູອາຈານ ຈຳນວນໜຶ່ງ.

          ໃນການລົງຢ້ຽມຢາມດັ່ງກ່າວ ທ່ານ ບຸນທັນ ແສງມະນີ ໄດ້ລາຍງານການຈັດຕັ້ງປະຕິບັດກະກຽມໃນໄລຍະການສອບເສັງຈົບຊັ້ນ ມ.7 ໃນພາຍເມືອງໄຊທານີ ແລະ ບັນດາຜູ້ອຳນວຍການໂຮງຮຽນໄດ້ລາຍງານສະພາບຂໍ້ດີ ແລະ ຂໍ້ຄົງ ຄ້າງໃນການກະກຽມວຽກງານດັ່ງກ່າວຂອງໂຮງຮຽນຕົນ; ໃນນັ້ນ ສູນສອບເສັງ ມສ ທົ່ງມັ່ງ ມີນັກສອບເສັງມາຈາກ 3 ໂຮງຮຽນ ຄື: ມສ ທົ່ງມັ່ງ, ມສ ຫາດກ້ຽງ ແລະ ມສ ມົນໄຊ, ມີນັກສອບເສັງທັງໝົດ 218 ຄົນ, ຍິງ 101 ຄົນ ປະກອບມີ 11 ຫ້ອງສອບເສັງ, ມີກຳມະການທັງໝົດ 24 ທ່ານ. ໃນການສອບເສັງຈົບຊັ້ນ ມ.7 ສົກປີ 2022-2023 ນີ້ ມີຈໍານວນທັງໝົດ 5 ວິຊາ ຄື: ພາສາລາວ-ວັນນະຄະດີ, ວິທະຍາສາດສັງຄົມ, ວິທະຍາສາດທຳມະຊາດ, ຄະນິດສາດ ແລະ ພາສາອັງກິດ. ໃນໂອ ກາດດັ່ງກ່າວ ຄະນະລົງຢ້ຽມຢາມ ໄດ້ຮັບຟັງການສະເໜີຂອງບັນດາອາຈານ ຜູ້ເຂົ້າຮ່ວມ ໃນການປະຕິບັດວຽກງານການສອບ ເສັງ ເປັນຕົ້ນ: ງົບປະມານການບໍລິຫານໃນວຽກງານດັ່ງກ່າວ, ຂໍໂກຕ້າລັດຖະກອນໃຫ້ຄູອາສາສະໝັກ ຊີວະສາດ, ໃຫ້ຄົ້ນ ຄວ້າສ້ອມແປງຫຼັງຄາໂຮງຮຽນ, ຕໍາລາຮຽນ ແລະ ໃນຕອນທ້າຍຂອງກອງປະຊຸມ ທ່ານ ນາງ ລຳພອຍ ສີອັກຄະຈັນ ກໍໄດ້ມີຄຳເຫັນແລກປ່ຽນ ແລະ ມີທິດຊີ້ນຳຕໍ່ບັນດາຂໍ້ຄົງຄ້າງ ພ້ອມທັງຮັບເອົາຄຳສະເໜີຂອງບັນດາຄູອາຈານ ເພື່ອນຳໄປສະເໜີຕໍ່ພາກ ສ່ວນກ່ຽວຂ້ອງຄົ້ນຄວ້າພິຈາລະນາແກ້ໄຂ ແລະ ໃນຕອນບ່າຍຂອງມື້ດຽວກັນນັ້ນ, ຄະນະລົງເຮັດວຽກ ກໍໄດ້ລົງຢ້ຽມຢາມ ໂຄງການກໍ່ສ້າງໂຮງຮຽນ ມສ ຫາດກ້ຽງ ທີ່ຍັງບໍ່ທັນສຳເລັດ.