ວັນທີ 09 ມິຖຸນາ 2023,

ເພື່ອເປັນການຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ແລະ ເປັນການປະສານສົມທົບໃຫ້ວຽກງານປ້ອງກັບຊາດ-ປ້ອງກັນຄວາມສະຫງົບ ປະສົບຜົນສຳເລັດຕາມແຜນປີທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນວ, ໃນວັນທີ 09 ມິຖຸນາ 2023 ທ່ານ ບຸນທາມ ພຸດທະວົງສາ, ຮອງປະທານ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ກອງບັນຊາການທະຫານ ນະຄອນຫຼວງ ໂດຍການຕ້ອນຮັບຂອງ ທ່ານ ພົວ ໄພວັນ ຈັນທະພົມມາ, ຫົວໜ້າການເມືອງກອງບັນຊາການປະທານ ນະຄອນຫຼວງ, ມີບັນດາທ່ານນາຍ ແລະ ພົນທະຫານ ເຂົ້າຮ່ວມໃນກອງປະຊຸມດັ່ງກ່າວ.

ໃນການລົງເຄື່ອນໄຫວຄັ້ງນີ້ ຈຸດປະສົງ ເພື່ອເປັນການຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ແລະ ເປັນການປະສານສົມທົບໃຫ້ວຽກງານປ້ອງກັບຊາດ-ປ້ອງກັນຄວາມສະຫງົບ ປະສົບຜົນສຳເລັດຕາມແຜນປີທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນວ; ເຊິ່ງກອງປະຊຸມ ໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນໄລຍະຕົ້ນປີຜ່ານມາ ໄດ້ມີການກວດກາການຍົກຍ້າຍເຂົ້າອອກຂອງພະນັກງານ ແລະ ຜູ້ສະໝັກເປັນທະຫານພັນທະ, ພິຈາລະນາອອກຄຳສັ່ງກັກຕົວພາງຕາມການສະເໜີຂອງພະແນກປ້ອງກັນພາຍໃນ ແລະ ໄດ້ຈັດຕັ້ງເຜີຍແຜ່ກົດໝາຍ ເປັນຕົ້ນ: ກົດໝາຍນາຍທະຫານ, ກົດໝາຍຢາເສບຕິດ ແລະ ກົດໝາຍຄອບຄົວ ໃຫ້ບັນດາກົມກອງໄດ້ທັງໝົດ 4 ກົມກອງ. ນອກນັ້ນ, ໄລຍະຕົ້ນປີຜ່ານມາ ວຽກງານອົງການຍຸຕິທຳໄດ້ຮັບຄຳຮ້ອງທັງໝົດ 17 ເລື່ອງ, ອອກຄຳສັ່ງເປີດການສືບສວນ 6 ເລື່ອງ ແລະ ໄດ້ສະຫຼຸບສົ່ງສຳນວນຄະດີໃຫ້ອົງການໄອຍະການທະຫານ ພາກກາງ ສັ່ງຟ້ອງສານທະຫານ ພາກກາງ ຕັດສີນ 3 ເລື່ອງ; ຄຽງຄູ່ກັບຜົນສຳເລັດນັ້ນ ເຫັນວ່າຍັງມີບາງບັນຫາທີ່ຍັງເປັນຂໍ້ຄົງຄ້າງທີ່ຈະຕ້ອງສືບຕໍ່ຈັດຕັ້ງປະຕິບັດໃຫ້ປະສົບຜົນສຳເລັດຕາມແຜນການປີທີ່ວາງໄວ້. ໃນໂອກາດດັ່ງກ່າວ, ທາງຄະນະລົງເຮັດວຽກກໍໄດ້ມີການແລກປ່ຽນຄຳຄິດເຫັນຕໍ່ການລາຍງານ ແລະ ໃນບາງວຽກງານທີ່ເປັນຫາງສຽງທາງສັງຄົມ ເພື່ອໃຫ້ທາງກອງບັນຊາການທະຫານ ນວ ໄດ້ມີຄຳເຫັນຊີ້ແຈງເພິ່ມຕື່ມ ເປັນຕົ້ນ: ຄຳສະເໜີໃນບັ້ນລົງພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນ ນວ.

ໃນຕອນທ້າຍກອງປະຊຸມ, ທ່ານ ບຸນທາມ ພຸດທະວົງສາ ກໍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານນາຍ ແລະ ພົນທະຫານ ທຸກກົມກອງທີ່ໄດ້ເອົາໃຈໃສ່ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນຈົນໄດ້ຮັບຜົນສຳເລັດຫຼາຍດ້ານໃນໄລຍະຜ່ານມາ ແລະ ຄຽງຄູ່ກັນນັ້ນ ກໍໄດ້ມີທິດຊີ້ນຳ ໃຫ້ສືບຕໍ່ສຶກສາອົບຮົມການເມືອງແນວຄິດ, ບຳລຸງສ້າງ, ປັບປຸງຂີດຄວາມສາມາດທາງດ້ານເຕັກນິກວິຊາສະເພາະ ດ້ານບຸກຄະລາກອນ ໃຫ້ທົ່ວກອງບັນຊາການ ແລະ ສອດຄ່ອງກັບສະພາບການ ໂດຍສະເພາະ ຮາກຖານປ້ອງການຄວາມສະຫງົບ ໃຫ້ເຕີບໃຫຍ່ຂະຫຍາຍຕົວ ແລະ ໃຫ້ປະສານສົມທົບກັບອົງການປົກຄອງ ນວ ແກ້ໄຂຄວາມຂັດຂ້ອງໝອງໃຈຂອງປະຊາຊົນ ສ້າງພູມຄຸ້ມກັນໃຫ້ຫຼາຍກວ່າການປາບປາມ ໂດຍການໂຄສະນາ, ເຊື່ອມຊຶມກົດໝາຍ, ນິຕິກົດໝາຍ, ລະບຽບການ ແລະ ໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍທີ່ກຳນົດໄວ້ໃນແຜນປີ ໃຫ້ສຳເລັດ ແລະ ໃຫ້ບັນລຸຕາມຄາດໝາຍທີ່ວາງໄວ້.