ເພື່ອເປັນການລົງຊຸກຍູ້ ແລະ ຕິດຕາມກວດກາວຽກງານຂົງເຂດບັນດາເຜົ່າຂອງ ຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນ ນະຄອນຫຼວງວຽງຈັນ, ໃນວັນທີ 24 ຕຸລາ 2023 ທ່ານ ນາງ ເກດມະນີ ບັນດາສັກ ປະທານ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ກຸ່ມຜະລິດກະສິກຳສະອາດ ແລະ ຫັດຖະກຳແກະສະລັກ ຢູ່ເມືອງສີໂຄດຕະບອງ ນະຄອນຫຼວງວຽງຈັນ.

ໃນການລົງຊຸກຍູ້ຄັ້ງນີ້, ໄດ້ຮັບຟັງການລາຍງານ ກ່ຽວກັບ ດອນໝາກໂມ ເຊິ່ງເປັນເກາະດອນແຫ່ງໜຶ່ງທີ່ນອນຢູ່ໃນ ບ້ານ ໃໝ່ ມີສາຍແມ່ນໍ້າຂອງໄຫຼຜ່ານເປັນສອງຄອນ ແລະ ເປັນເຂດທີ່ຕິດກັບຊາຍແດນ ລະຫວ່າງ ລາວ-ໄທ ທາງດ້ານທິດໃຕ້, ມີເນື້ອທີ່ທັງໝົດ 73 ເຮັກຕາ, ຄວາມຍາວ 03 ກິໂລແມັດ, ຄວາມກວ້າງ 700 ແມັດ, ມີຈໍານວນຕອນດິນ 119 ຕອນ, ປະຊາຊົນທີ່ທຳການຜະລິດປູກພືດຕົວຈິງ 48 ຄອບຄົວ, ມີເນື້ອທີ່ທຳການຜະລິດ ປູກພືດຜັກຕ່າງໆ 42,5 ເຮັກຕາ. ເຊິ່ງໃນໄລຍະປີ 2012-2015 ເຂດດອນໝາກໂມ ໄດ້ທົດລອງເຮັດກະສິກຳສະອາດ (GAP) ດ້ວຍການຊີ້ນໍາ-ນຳພາຂອງພາກສ່ວນກ່ຽວຂ້ອງ ໄດ້ຈັດຕັ້ງກຸ່ມຊາວສວນຂຶ້ນ ຈຳນວນ 28 ຄອບຄົວ ພ້ອມກັນຜະລິດກະສິກຳສະອາດສົ່ງອອກຕ່າງປະເທດ ເຊິ່ງຜົນຜະລິດສົ່ງອອກໄດ້ເຖີງ 120-150 ໂຕນຕໍ່ປີ ແລະ ປີ 2022 ພາກສ່ວນກ່ຽວຂ້ອງໄດ້ສືບຕໍ່ລົງຊຸກຍູ້ ແລະ ສົ່ງເສີມຄອບຄົວຊາວສວນທີ່ຜະ ລິດກະສິກຳສະອາດໃຫ້ເຂັ້ມແຂງ ເຊິ່ງການຜະລິດໄດ້ແບ່ງອອກເປັນ 02 ປະເພດ ຄື: ພືດໃຫ້ໝາກຫຼັກ ໄດ້ແກ່ ໝາກເຂືອ, ໝາກຖົ່ວພູ ແລະ ໝາກເຜັດຊະນິດຕ່າງໆ; ປະເພດພືດຜັກສຳຮອງ ໄດ້ແກ່ ໝາກຖົ່ວກາແວ, ໝາກມະລະ, ໝາກໂງງ້ຽວ, ຖົ່ວຍາວ, ໝາກອຶ, ໝາກແຕງ, ໝາກບວບ, ຜັກກາດຊອມ. ນອກຈາກນັ້ນ, ຍັງໄດ້ປູກຕົ້ນໄມ້ກິນໝາກ ແລະ ໄມ້ຢືນຕົ້ນຈໍານວນໜຶ່ງ ເປັນ ຕົ້ນ ໝາກຮຸ່ງ, ໝາກກ້ວຍ, ໝາກກະທັນ, ໄຜ່ລ້ຽງນ້ອງ ແລະ ອື່ນໆ. ພາຍຫຼັງຮັບຟັງການລາຍງານທາງຄະນະລົງວຽກເຮັດ ຍັງໄດ້ມີຄຳເຫັນແລກປ່ຽນ ແລະ ຮັບຟັງການສະເໜີຂອງຊາວກະສິກອນ ໃນນັ້ນ ແມ່ນຕິດພັນກັບໄຟຟ້າ ເຊິ່ງຊາວສວນ ໄດ້ສະເໜີໃຫ້ຂັ້ນເທິງຄົ້ນຄວ້າວາງຕາຄ່າຍໄຟຟ້າໃຫ້ທົ່ວເຖີງພື້ນທີ່ທຳການຜະລິດ ແລະ ສະເໜີໃຫ້ສະຫງວນພື້ນທີ່ແຫ່ງນີ້ໄວ້ ເພື່ອໃຫ້ປະຊາຊົນໄດ້ທຳການຜະລິດປູກພືດຕໍ່ໄປ (ບໍ່ໃຫ້ມີການສຳປະທານ). ໃນຕອນບ່າຍຂອງວັນດຽວກັນນັ້ນ ຄະນະລົງເຮັດວຽກ ໄດ້ ສືບຕໍ່ລົງຢ້ຽມຢາມໂຮງຮຽນ ຫັດຖະກຳແກະສະລັກ ລາວດີຊາຍ ທີ່ບ້ານຫ້ວຍຫ້ອມ ເມືອງສີໂຄດຕະບອງ ນວ.