ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ (ສສຊ) ແລະ ສະມາຊິກສະພາປະຊາຊົນ ນວ (ສສນວ) ໄດ້ລົງພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງ ຊຸດທີ II ຢູ່ທີ່ ບ້ານ ພະຂາວ, ເມືອງໄຊທານີ ນວ ໃນວັນທີ 21 ສິງຫາ 2023 ໂດຍການນຳພາຂອງ ທ່ານ ນາງ ສົມປະເສີດ ສີຫາລາດ ສະມາຊິກສະພາແຫ່ງຊາດຊຸດທີ IX ປະຈໍາເຂດເລືອກຕັ້ງທີ 1 ນວ, ຮອງປະທານ ອົງການແນວລາວສ້າງຊາດ ນວ, ມີ ທ່ານ ຄໍາພູວັນ ລາດຊະຈັກ ສະມາຊິກສະພາປະຊາຊົນ ນວ ຊຸດທີ II, ຮອງຫົວໜ້າ ຄະນະສະມາຊິກສະພາປະຊາຊົນ ນວ ປະຈຳເຂດເລືອກຕັ້ງ ເມືອງໄຊທານີ, ຫົວໜ້າ ຫ້ອງການອຸດສາຫະກໍາ ແລະ ການຄ້າ ເມືອງໄຊທານີ, ທ່ານ ນາງ ອໍລະໄທ ສັນຕິຄົງຄາ ສະມາຊິກສະພາປະຊາຊົນ ນວ ຊຸດທີ II, ຜູ້ ອຳນວຍການໃຫຍ່ ບໍລິສັດກຣິດຕະພົງກຣຸບ, ຮອງປະທານສະພາບໍລິຫານ ວຽງຈັນເຊັນເຕີ້ລາວມະຫາຊົນ, ຜູ້ຈັດການທົ່ວໄປ ໂຮງແຮມແລນມາກແມ່ຂອງລີເວິໄຊ, ມີບັນດາອົງການຈັດຕັ້ງບ້ານ ພ້ອມດ້ວຍຜູ້ມີສິດເລືອກຕັ້ງພາຍໃນບ້ານເຂົ້າຮ່ວມຢ່າງພ້ອມພຽງ.

ໃນການລົງພົບປະຄັ້ງນີ້, ຈຸດປະສົງ ເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II, ເພື່ອຮັບຟັງຄໍາຄິດຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງ ກ່ຽວຂ້ອງກັບບັນຫາທີ່ຂັດຂ້ອງໝອງໃຈຕ່າງໆ ເພື່ອຈະນໍາສະເໜີຕໍ່ອົງການປົກຄອງ ແລະ ພາກສ່ວນທີ່ກ່ຽວຂ້ອງ. ເຊິ່ງໃນພິທີດັ່ງກ່າວ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ຮັບຟັງການລາຍງານສະພາບການຈັດຕັ້ງປະຕິບັດຂອງບ້ານ ແລະ ກໍໄດ້ຮັບຟັງຄຳຄິດຄຳເຫັນ, ຄໍາສະເໜີຈໍານວນໜຶ່ງ ຂອງປະຊາຊົນ ເພື່ອນຳໄປຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂ ເຊິ່ງບັນຫາສ່ວນໃຫຍ່ ແມ່ນຕິດພັນກັບສະພາບເສດຖະກິດຊີວິດການເປັນຢູ່ຂອງປະຊາຊົນໃນປັດຈຸບັນ ເປັນຕົ້ນ: ລາຄາສິນຄ້າບໍລິໂພກ-ອຸປະໂພກແພງ, ອັດຕາເງິນເຟີ້, ບັນຫາການສຶກສາທີ່ຈົບມາແລ້ວບໍ່ມີວຽກເຮັດງານທຳ, ຂາດຄູສອນ, ບັນດາໄຟເຍືອງທາງ, ບັນຫານ້ຳຖ້ວມອັ່ງຂັງຢູ່ເຂດບ້ານດັ່ງກ່າວ ແລະ ສະເໜີໃຫ້ມີການຈຳກັດການນຳເຂົ້າສິນຄ້າທີ່ບໍ່ຈຳເປັນ ເພື່ອຊຸກຍູ້ສົ່ງເສີມໃຫ້ປະຊາຊົນຜະລິດນຳໃຊ້ເອງແລະສ້າງລາຍຮັບໃຫ້ປະ ຊາຊົນ ເຫຼົ່ານີ້ເປັນຕົ້ນ. ໃນຕອນທ້າຍຂອງການລົງພົບປະຜູ້ມີສິດເລືອກຕັ້ງ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ກໍໄດ້ມີຄຳເຫັນແລກປ່ຽນ ແລະ ໄດ້ຮັບເອົາຄຳຄິດຄຳເຫັນ, ຄຳສະເໜີຂອງພໍ່ແມ່ປະຊາຊົນ ເພື່ອນຳໄປສະເໜີໃຫ້ພາກສ່ວນກ່ຽວຂ້ອງ ຄົ້ນຄວ້າພິຈາລະນາ ແລະ ຫາທິດທາງແກ້ໄຂໃນຕໍ່ໜ້າ.