ໃນຕອນເຊົ້າ ວັນທີ 27 ເມສາ 2023 ສະພາປະຊາຊົນ ນະຄອນຫຼວງວຽງຈັນ (ສປ ນວ) ໄດ້ດຳເນີນກອງປະຊຸມຕິດຕາມກວດກາຜົນການປະເມີນການຈັດຕັ້ງປະຕິບັດກົດໝາຍ ຂົງເຂດຍຸຕິທໍາ 4 ສະບັບ, ທີ່ຫ້ອງວ່າການ ນວ ເປັນປະທານກອງປະຊຸມໂດຍ ທ່ານ ບຸນທາມ ພຸດທະວົງສາ ຮອງປະທານສະພາປະຊາຊົນ ນວ, ມີ ທ່ານ ພູວົງ ວົງຄໍາຊາວ ຮອງເຈົ້າຄອງ ນວ ພ້ອມດ້ວຍສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນວ ສະມາຊິກສະພາປະຊາຊົນ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ມີຈຸດປະສົງ ເພື່ອກວດກາຜົນການປະເມີນການຈັດຕັ້ງປະຕິບັດກົດໝາຍ ໃນຂົງເຂດຍຸຕິທໍາ 4 ສະບັບຄື: (1) ກົດໝາຍວ່າດ້ວຍ ສານປະຊາຊົນ; (2) ກົດໝາຍວ່າດ້ວຍ ອົງການໄອຍະການປະຊາຊົນ; (3) ກົດໝາຍວ່າດ້ວຍ ການດໍາເນີນຄະດີແພ່ງ ແລະ (4) ກົດໝາຍວ່າດ້ວຍ ການດໍາເນີນຄະດີອາຍາ. ເຊິ່ງກອງປະຊຸມຍັງໄດ້ຮັບຟັງການລາຍງານຂອງ ອົງການໄອຍະການປະຊາຊົນ ພາກກາງ, ສານປະຊາຊົນ ພາກກາງ, ອົງການໄອຍະການປະຊາຊົນ ນວ, ສານປະຊາຊົນ ນວ ແລະ ກອງບັນຊາການ ປກສ ນວ ກ່ຽວກັບຜົນຂອງການປະເມີນການຈັດຕັ້ງປະຕິບັດກົດໝາຍດັ່ງກ່າວ; ພ້ອມນັ້ນ ຍັງໄດ້ປະກອບຄໍາເຫັນໃສ່ບັນດາກົດໝາຍດັ່ງກ່າວ ເພື່ອເປັນຂໍ້ມູນກ້າວໄປສູ່ການປັບປຸງໃນຂັ້ນຕອນຕໍ່ໄປໃຫ້ມີເນື້ອໃນຄົບຖ້ວນ, ສົມບູນສອດຄ່ອງກັບສະພາບການພັດທະນາທາງດ້ານເສດຖະກິດ ແລະ ການເຊື່ອມໂຍງກັບພາກພື້ນ ແລະ ສາກົນ ໃນໄລຍະໃໝ່, ຮັບປະກັນຫຼັກວິຊາການລັກສະນະວິທະຍາສາດ, ລັກສະນະຊາດ ເປັນລະບົບຄົບຊຸດຮັດກຸມກົມກຽວ ແລະ ສາມາດຈັດຕັ້ງປະຕິບັດໄດ້.
ໃນໂອກາດດັ່ງກ່າວ, ທ່ານ ບຸນທາມ ພຸດທະວົງສາ ໄດ້ກ່າວວ່າ: ບັນດາເນື້ອໃນທີ່ນຳມາຄົ້ນຄວ້າຕິດຕາມກວດກາໃນກອງປະຊຸມຄັ້ງນີ້ ລ້ວນແຕ່ມີຄວາມໝາຍສຳຄັນ ແລະ ມີຜົນໂດຍກົງຕໍ່ການຈັດຕັ້ງຜັນຂະຫຍາຍ ມະຕິ ຂອງຄະນະບໍລິຫານງານສູນກາງພັກ ປະຊາຊົນປະຕິວັດລາວ ສະບັບເລກທີ 037/ຄບສພ ວ່າດ້ວຍການຍົກສູງຄຸນນະພາບໃນການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ແລະ ມະຕິຂອງກົມການເມືອງສູນກາງພັກ ສະບັບເລກທີ 112/ກມສພ ວ່າດ້ວຍການຍົກສູງຄຸນນະພາບ ການດໍາເນີນຄະດີຕາມຂະບວນການຍຸຕິທໍາ. ສະນັ້ນ, ຮຽກຮ້ອງມາຍັງສະມາຊິກສະພາແຫ່ງຊາດ, ສະມາຊິກສະພາປະຊາຊົນ ນວ, ພາກສ່ວນກ່ຽວຂ້ອງທີ່ເຂົ້າຮ່ວມກອງປະຊຸມຄັ້ງນີ້ ຈົ່ງໄດ້ເພີ່ມທະວີຄວາມເອົາໃຈໃສ່ເຂົ້າໃນການຄົ້ນຄວ້າປະກອບຄຳຄິດເຫັນຕໍ່ບັນດາເນື້ອໃນຕ່າງໆ ທີ່ນຳມາສະເໜີໃນກອງປະຊຸມຄັ້ງນີ້ ໃຫ້ເລິກ ເຊິ່ງ ແລະ ມີຈຸດສຸມ, ຫຼັງຈາກນັ້ນ ຈະໄດ້ສະຫຼຸບສັງລວມລາຍງານໃຫ້ສະພາແຫ່ງຊາດ ເພື່ອນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX.
