ໃນຕອນເຊົ້າຂອງວັນທີ 23 ສິງຫາ 2023 ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ1 (ສສຊ) ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ໄດ້ລົງເຄື່ອນໄຫວພົບປະຢ້ຽມຢາມພໍ່ແມ່ປະຊາຊົນ ບ້ານ ດອນນົກຂຸ້ມ, ທົ່ງພານທອງ, ໂພນປ່າເປົ້າ ແລະ ບ້ານ ດອນກອຍ ພ້ອມເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ຢູ່ທີ່ວັດໂພນແກ້ວດອນກອຍ, ບ້ານ ດອນກອຍ ເມືອງ ສີສັດຕະນາກ ນະຄອນຫຼວງວຽງຈັນ. ພາຍໃຕ້ການເປັນປະທານຮ່ວມໂດຍ:

1. ທ່ານ ນາງ ລໍາພອຍ ສີອັກຄະຈັນ ຮອງປະທານສະພາປະຊາຊົນ ນະຄອນຫຼວງວຽງຈັນ.

2. ທ່ານ ຮສ ປອ ວຽງວິໄລ ທ່ຽງຈັນໄຊ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ1, ກຳມະການປະຈໍາພັກ ມະຫາວິທະຍາໄລແຫ່ງຊາດ, ປະທານກວດກາພັກ ຄະນະບໍດີຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ.

3. ທ່ານ ພອນສິນ ສາວະລີ ສະມາຊິກສະພາປະຊາຊົນນະຄອນຫຼວງວຽງຈັນ, ຫົວໜ້າຄະນະສະມາຊິກສະພາປະຊາຊົນນະຄອນຫຼວງວຽງຈັນ ປະຈໍາເຂດເລືອກຕັ້ງເມືອງສີສັດຕະນາກ, ຮອງເລຂາພັກເມືອງ, ປະທານກວດກາພັກ-ລັດ ເມືອງ ສີສັດຕະນາກ.

4. ທ່ານ ປະສາດໄຊ ພິລາພັນເດຊ ສະມາຊິກສະພາປະຊາຊົນນະຄອນຫຼວງວຽງຈັນ ປະຈໍາເຂດເລືອກຕັ້ງເມືອງສີສັດຕະນາກ, ຜູ້ອຳນວຍການບໍລິສັດ ລາວໂຕໂຢຕ້າ ບໍລິການ ຈໍາກັດ.

ການລົງເຄື່ອນໄຫວໃນຄັ້ງນີ້ ແມ່ນເພື່ອຈັດຕັ້ງຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ໃຫ້ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ເຊື່ອມຊຶມຢ່າງກ້ວາງຂວາງ ກ່ຽວກັບບັນດາເນື້ອໃນ, ວຽກງານທີ່ສຳຄັນ. ພ້ອມນີ້ຍັງເປີດໂອກາດໃຫ້ພໍ່ແມ່ປະຊາຊົນໄດ້ປະກອບຄຳຄິດຄຳເຫັນ ແລະ ຄຳສະເໜີບັນຫາຕ່າງໆ ເພື່ອສົນທະນາປຶກສາຫາລືຮ່ວມກັນ. ຈາກນັ້ນ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ1 ແລະ ສະມາຊິກສະພາປະຊາຊົນນະຄອນຫຼວງວຽງຈັນ ກໍ່ໄດ້ອະທິບາຍຊີ້ແຈງບັນດາຄໍາສະເໜີກ່ຽວກັບບັນຫາດັ່ງກ່າວ ພ້ອມທັງເກັບກຳ, ບັນທຶກເອົາຄຳສະເໜີຕ່າງໆຂອງປະຊາຊົນ ເພື່ອສັງລວມ ແລ້ວນຳສະເໜີຕໍ່ພາກສ່ວນກ່ຽວຂ້ອງນຳໄປພິຈາລະນາປັບປຸງແກ້ໄຂໃນຕໍ່ໜ້າ.