ວັນທີ 22 ສິງຫາ ນີ້, ສະມາຊິກສະພາແຫ່ງຊາດ ປະຈຳເຂດເລືອກ ຕັ້ງທີ I ນວ (ສສຊ) ແລະ ສະມາຊິກສະພາປະຊາຊົນ ນວ (ສສ ນວ) ໄດ້ລົງພົບປະຜູ້ມີສິດເລືອກຕັ້ງ ຢູ່ທີ່ວັດບ້ານໂນນຂີ້ເຫຼັກ ນຳພາໂດຍ ທ່ານ ນາງ ວາລີ ເວດສະພົງ, ສະມາ ຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ມີ ທ່ານ ສົມບັດ ຈັນທະມາດ, ສະມາຊິກສະພາປະຊາຊົນ ນະຄອນຫຼວງ ຊຸດທີ II, ຄະນະປະຈຳ ສະພາປະຊາຊົນ, ປະທານ ຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນວ, ທ່ານ ແສງສຸລິຍັນ ສິລິໂພຄາ, ສະມາຊິກສະພາປະຊາຊົນ ນະຄອນຫຼວງ ຊຸດທີ II, ຮອງຫົວໜ້າ ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ, ຫົວໜ້າຫ້ອງວ່າການ ເມືອງສີໂຄດຕະບອງ ນວ. ມີຄະນະນຳບ້ານ ແລະ ປະຊາຊົນ ບ້ານໂນນຂີ້ເຫຼັກ ແລະ ບ້ານໂພນສົມບູນ ເຂົ້າຮ່ວມຢ່າງພ້ອມພຽງ.

ໃນການລົງເຄື່ອນໄຫວພົບປະຄັ້ງນີ້ ແມ່ນເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາ ມັນ ເທື່ອທີ 5 ສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ແລະ ເພື່ອຮັບຟັງຄໍາຄິດຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງ; ບັນດາທ່ານ ສສຊ ແລະ ສສນວ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມໂດຍເນັ້ນໃສ່ການຈັດຕັ້ງປະຕິບັດວຽກງານແຕ່ລະດ້ານ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງລັດຖະບານ, ອົງການປົກຄອງ ນວ, ຂົງເຂດຕຸລາການ, ຂອງສະພາແຫ່ງຊາດ ແລະ ສະພາປະຊາຊົນ ນວ.

ໃນໂອກາດດັ່ງກ່າວ, ສສຊ ແລະ ບັນດາທ່ານ ສສ ນວ ກໍໄດ້ຮັບຟັງການລາຍງານສະ ພາບການຈັດຕັ້ງປະຕິບັດຂອງແຕ່ລະບ້ານ, ແລກປ່ຽນຄຳຄິດຄຳເຫັນກັບພໍ່ແມ່ປະຊາຊົນ, ຮັບຟັງບັນຫາທີ່ຂັດຂ້ອງໝອງໃຈຕ່າງໆ ໃນການດຳລົງຊີວິດຂອງພໍ່ແມ່ປະຊາ ຊົນ ພ້ອມທັງຮັບເອົາແຕ່ລະບັນຫານັ້ນໆ ນຳໄປສະເໜີຕໍ່ພາກສ່ວນກ່ຽວຂ້ອງຕິດຕາມກວດກາ ແລະ ພິຈາລະນາຫາທິດທາງແກ້ໄຂ ໂດຍບັນຫາສ່ວນໃຫຍ່ແມ່ນຕິດພັນກັບ ລາຄາສິນຄ້າແພງ ຄ່າຄອງຊີບຕໍ່າ, ໃຫ້ມີການສະຫງວນອາຊີບໄວ້ໃຫ້ປະຊາຊົນລາວ ແລະ ໃຫ້ມີມາດຕະການເຂັ້ມງວດຕື່ມຕໍ່ກັບການແກ້ໄຂບັນຫາຢາເສບຕິດ ເຫຼົ່ານີ້ເປັນຕົ້ນ.