ວັນທີ 21 ສິງຫາ ນີ້, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ I ນວ (ສສຊ) ແລະ ສະມາຊິກສະພາປະຊາຊົນ ນວ (ສສນວ) ໄດ້ລົງພົບປະຜູ້ມີສິດເລືອກຕັ້ງ ເມືອງນາຊາຍທອງ (ຈຸທີ 2) ນຳໂດຍ ທ່ານ ຄຳຜອງ ແສງສະຫວ່າງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ I ນວ, ຮອງປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນວ, ທ່ານ ແສງວິໄລ ສີລັດຕະນະ ສະມາຊິກສະພາປະຊາຊົນ ນວ ຮອງຫົວໜ້າ ຄະນະສະມາຊິກສະພາປະຊາຊົນ ນວ ປະຈຳເຂດເລືອກຕັ້ງ ເມືອງນາຊາຍທອງພ້ອມຄະນະ ຊຶ່ງພາກເຊົ້າໄດ້ລົງພົບປະຜູ້ມີສິດເລືອກຕັ້ງຢູ່ທີ່ວັດບ້ານບົວ, ປະກອບມີ (ພໍ່ແມ່ປະຊາຊົນບ້ານບົວ, ບ້ານນາງ່າ, ບ້ານໜອງສະ, ບ້ານນາດີ ແລະ ບ້ານພັດທະນາ) ແລະ ໃນຕອນບ່າຍ ແມ່ນຢູ່ວັດໂພສີ, ປະກອບມີບ້ານໂພສີ, ບ້ານໂພໄຊ, ບ້ານສີວິໄຊ, ບ້ານຖໍ້າ ແລະ ບ້ານໂພນທອງ.

ຈຸດປະສົງ ໃນການລົງເຄື່ອນໄຫວພົບປະຄັ້ງນີ້ ແມ່ນເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ແລະ ເພື່ອຮັບຟັງຄໍາຄິດຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງ ຊຶ່ງການເຜີຍແຜ່ຜົນສຳເລັດຂອງກອງປະຊຸມນັ້ນ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ຜັດປ່ຽນກັນເຜີຍແຜ່ໂດຍເນັ້ນໃສ່ການຈັດຕັ້ງປະຕິບັດວຽກງານແຕ່ລະດ້ານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງລັດຖະບານ, ອົງການປົກຄອງ ນວ, ຂົງເຂດຕຸລາການ, ຂອງສະພາແຫ່ງຊາດ ແລະ ສະພາປະຊາຊົນ ນວ, ໃນໂອກາດດັ່ງກ່າວ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ກໍໄດ້ຮັບຟັງການລາຍງານສະພາບການຈັດຕັ້ງປະຕິບັດຂອງແຕ່ລະບ້ານ, ແລກປ່ຽນຄຳຄິດຄຳເຫັນກັບພໍ່ແມ່ປະຊາຊົນ ກ່ຽວກັບຂໍ້ດີ, ຂໍ້ຫຍຸ້ງຍາກ, ບັນຫາທີ່ຂັດຂ້ອງໝອງໃຈຕ່າງໆ ໃນການດຳລົງຊີວິດຂອງພໍ່ແມ່ປະຊາຊົນ ພ້ອມທັງຮັບເອົາການສະເໜີບັນຫາຕ່າງໆ ເພື່ອນຳໄປສະເໜີຕໍ່ພາກສ່ວນກ່ຽວຂ້ອງຕິດຕາມກວດກາ ແລະ ພິຈາລະນາຫາທິດທາງແກ້ໄຂ ຊຶ່ງບັນຫາສ່ວນໃຫຍ່ແມ່ນຕິດພັນກັບຜົນກະທົບຈາກທາງດ່ວນ ແລະ ທາງລົດໄຟ ເປັນຕົ້ນຄ່າຊົດເຊີຍ ແລະ ການວາງທໍ່ນໍ້າເສຍລົງມາໃສ່ທົ່ງນາຂອງປະຊາຊົນ ເຮັດໃຫ້ທຳການຜະລິດບໍ່ໄດ້, ບັນຫາທາງຮ່ອມ-ທາງຊອຍ, ໄຟເຍືອງທາງ ແລະ ໄຟຟ້າບໍ່ພໍ, ບັນຫາການອອກໃບຕາດິນຊັກຊ້າ, ຜົນກະທົບຈາກການເຮັດຟາມໝູ ແລະ ຟາມໄກ່ ເຮັດໃຫ້ນໍ້າເປື້ອນຈາກຟາມໄຫຼລົງທົ່ງນາ, ບັນຫາຄູສອນຊັ້ນ ມ.ຕ, ມ.ປ ບໍ່ພຽງພໍ ແລະ ປະກົດການຫຍໍ້ທໍ້ ຂອງເດັກນ້ອຍທີ່ບໍ່ຮອດເກນອາຍຸປຸ້ນລັກຊັບໃນຂອບເຂດບ້ານ ບັນຫາເຫຼົ່ານີ້ເປັນຕົ້ນ.