ພິທີມອບ-ຮັບປື້ມອ່ານ ໃຫ້ແກ່ສະພາປະຊາຊົນ ນະຄອນຫຼວງວຽງຈັນ ຈັດຂຶ້ນໃນວັນທີ 19 ກັນຍາ 2023​ ຢູ່ທີ່ ຫໍສະໝຸດແຫ່ງຊາດ ມອບໂດຍ ທ່ານ ສໍາລານ ຫຼວງອາໄພ, ຜູ້ອໍານວຍການ ຫໍສະໝຸດແຫ່ງຊາດ ແລະ ຮັບໂດຍ ທ່ານ ນາງ ລໍາພອຍ ສີອັກຄະຈັນ ຄະນະປະຈໍາພັກ ນະຄອນຫຼວງວຽງຈັນ, ຮອງປະທານສະພາປະຊາຊົນ ນະຄອນຫຼວງວຽງຈັນ ມີທ່ານ ນາງ ລີປາເອ້ຍ ບົວປາວ, ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຕາງໜ້າຈາກຫ້ອງການສຶກສາທິການ ແລະ ກິລາເມືອງ ທົ່ວນະຄອນຫຼວງວຽງຈັນ ແລະ ສໍານັກພິມ ເຂົ້າຮ່ວມ.

ທ່ານ ສໍາລານ ຫຼວງອາໄພ ກ່າວວ່າ: ຫໍສະໝຸດແຫ່ງຊາດ ມີຄວາມຮູ້ສຶກພາກພູມໃຈທີ່ໄດ້ເປັນສ່ວນໜຶ່ງ ໃນການປະກອບສ່ວນຊ່ວຍເຫຼືອ ແລະ ຊຸກຍູ້ສົ່ງເສີມວຽກງານຂົງເຂດການສຶກສາທິການ ຂອງນະຄອນຫຼວງວຽງຈັນ. ພາຍຫຼັງຫໍສະໝຸດແຫ່ງຊາດ ຮັບການສະເໜີຈາກສະພາປະຊາຊົນ ນະຄອນຫຼວງວຽງຈັນ ໃນການຊຸກຍູ້ຊ່ວຍເຫຼືອປຶ້ມອ່ານໃຫ້ແກ່ນ້ອງໆນັກຮຽນ ທົ່ວນະຄອນຫຼວງວຽງຈັນ, ພວກເຮົາກໍໄດ້ຂົນຂວາຍປຸກລະດົມການຊ່ວຍເຫຼືອຈາກພາກສ່ວນສໍານັກພິມຕ່າງໆ ເຊິ່ງໃນຄັ້ງນີ້ໄດ້ມີ ສໍານັກພິມ 9 ແຫ່ງຄື: 1. ສຳນັກພິມສານຝັນ ອາຄາເດມີ, 2. ສຳນັກພິມໄວເດັກ, 3. ສໍານັກພິມມີດີບຸກ, 4. ມູນນິທິເຈືອງສົມບູນຂັນ, 5. ສໍານັກພິມປຶ້ມອ່ານ, 6. ສຳນັກພິມດີບຸກ, 7. ສຳນັກພິມມັກອ່ານ, 8. ສຳນັກພິມຊ້າງລາວ, 9. ສຳນັກພິມກະຕ່າຍນ້ອຍ ທີ່ໄດ້ປະກອບສ່ວນຊຸກຍູ້ອຸປະຖໍາປື້ມອ່ານ ເປັນຕົ້ນ: ປື້ມນີ້ທານ, ປື້ມຄວາມຮູ້ຮອບຕົວ ແລະ ປື້ມກ່ຽວກັບປະຫວດສາດ ຈຳນວນ 4.000 ຫົວ, ລວມມູນຄ່າ 140.000.000 ກີບ ໃຫ້ແກ່ສະພາປະຊາຊົນ ນະຄອນຫຼວງວຽງຈັນ. ໃນຕອນທ້າຍ, ທ່ານ ນາງ ລຳພອຍ ສີອັກຄະຈັນ ໄດ້ມີຄໍາເຫັນໂອ້ລົມ ແລະ ກ່າວຂອບໃຈຕໍ່ການຊຸກຍູ້ຊ່ວຍເຫຼືອຂອງທຸກພາກສ່ວນ; ເຊິ່ງການຊຸກຍູ້ດັ່ງກ່າວ ແມ່ນເປັນສ່ວນສຳຄັນໃນການສົ່ງເສີມການອ່ານໃຫ້ແກ່ນ້ອງນັກຮຽນ ນັບແຕ່ຊັ້ນອະນຸບານ, ປະຖົມ, ມໍຕົ້ນ ໂດຍທາງສະພາປະຊາຊົນ ນະຄອນຫຼວງວຽງຈັນ ຈະຊຸກຍູ້ປື້ມດັ່ງກ່າວໃຫ້ບັນດາໂຮງຮຽນລັດຕາມຄວາມເໝາະສົມ ຜ່ານຫ້ອງການສຶກສາທິການ ແລະ ກິລາ ທົ່ວນະຄອນ ຫຼວງວຽງຈັນ ເນື່ອງຈາກນ້ອງໆຮັກຮຽນໃນຕອນນີ້ ກໍຄືອານາຄົດຂອງພວກເຮົາໃນຕໍ່ໜ້າ.